1 Иоано

3 Сар дэ фартэ любий амэн о Дад! Во прижанэн амэн сар пэстирэ бэятонэн, и амэ па чачимастэ лэ Дэвлэстирэ бэяцэ. И люма на ӷанэн амэн важ кода, кай на уӷангля лэс*. 2 Мэрнэ кучутнэ, хоть амэ лэ Дэвлэстирэ бэяцэ, амэнди инке на дино тэ ӷанас, савэ амэ аваса. Амэ кати ӷанас, кай, кала во сыкавэла пэс, амэ ашаса кацавэ, сар во, важ кода кай диқаса лэс кацавэса, саво во сыно. 3 И всаворэ, ко надеийпэ пэр лэстэ, ашэн вужэ, важ кода кай во вужо.

4 Кажно, ко терэл* бэзэх, жал против законо, важ кода кай о бэзэх ԥагэл о законо. 5 Тумэ ӷанэн, кай о Исусо авеля тэ злэл пар мэндэ о бэзэх, ай андэр лэстэ бэзэх нинай. 6 Кодэва, кастэ лэса ек гиндо, на терэл бэзэх. Ай кодэва, ко терэл бэзэх, на диқля и на ӷанэн лэс. 7 Мэрнэ сомнакунэ бэяцэ, на́ домэкэн, кай тумэн тэ заандярэн андо хохаимос. Кодэва, ко ритярэл о законо, уӷодно лэ Дэвлэсти кадя жэ, сар и о Исусо. 8 Ай кодэва, ко терэл бэзэх, — лэ Бэнгэстар, важ кода кай о Бэнг терэл бэзэх жы анда дэлмутни время*. Лэ Дэвлэско Шаво авеля, кай тэ парувэл вся, со стердя о Бэнг*.

9 Лэ Дэвлэстирэ бэяцэ на терэн бэзэх, важ кода кай пэр лэндэ лэ Дэвлэско свынто зор. Вонэ не моӷут тэ терэн бэзэх, важ кода кай вонэ — лэ Дэвлэстирэ бэяцэ. 10 Тэ уӷанэн, ко лэ Дэвлэстирэ бэяцэ, ай ко лэ Бэнгэстирэ бэяцэ, можно кадя: кодэва, ко на терэл правильно, — най лэ Дэвлэстар, сар и кодэва, ко на любий пэстирэ ԥралэс. 11 Акэ со тумэ дэлмут уӷанглэ лэ Дэвлэстар: амэ трэбуй тэ любисарас ек еқэс. 12 Амэнди нащи тэ авас кацавэ, сар о Ка́ино, саво сас лэ Бэнгэстар* и саво умардя пэстирэ ԥралэс. Ай васо во лэс умардя? Важ кода кай лэстири дила сас вэрыто, ай лэстирэ ԥралэстири дила сас уӷодно лэ Дэвлэсти.

13 Ԥрала, на́ удивинпэ, кай о миро тумэн вэрыцый. 14 Амэ ӷанас, кай самас мулэ, ай акана оджунделям, важ кода кай любисарас лэ ԥралэн. Кодэва, ко на любий, ашэлпэ муло. 15 Кажно, ко вэрыцый пэстирэ ԥралэс, — шындимари*, ай тумэ ӷанэн, кай ни ек шындимари на лэла вечно тэ жувэл. 16 О Исусо Христос отдя пала амэндэ пэстири жызня, и кадя амэ полям, со када любовь. И амэ тожэ трэбуй тэ авас ӷотови тэ отдас пэстири жызня пала ԥрала. 17 Ай если варикастэ исин вся, со трэбуй важ и жызня, но во, кала диқэл пэстирэ ԥралэс андэ ԥари ситуацыя, на камэл тэ жалуий лэс, тоди сар во можэт тэ ԥэнэн, кай любий лэ Дэвлэс? 18 Мэрнэ сомнакунэ бэяцэ, амари любовь трэбуй тэ дицол най андэ алава, ай пэ дила, па чачимастэ.

19 Кадя амэ уӷанаса, кай амэндэ исин о чачимос, и доԥэнаса корко пэсти, кай о Дэл любий амэн. 20 Дажэ если амаро ди хал амэн важ варисостэ, о Дэл май баро амарэ одестар и ӷанэн вся. 21 Мэрнэ кучутнэ, если амаро ди на хал амэн, амэндэ исин муй тэ взвисавас каринг о Дэл. 22 Со амэ тэ на манглоп лэстар, во дэл амэнди, важ кода кай ритярас лэско законо и терас кода, со уӷодно лэсти. 23 Ай во приԥэндя амэнди тэ патяс андэ лэско Шаво* андо Исусо Христос и тэ любисарас ек еқэс — акэ лэско законо. 24 Кодэлэндэ, ко ритярэл лэско законо, ек гиндо лэса, и лэстэ тожэ ек гиндо лэнца. И через о свынто зор, саво во дя амэнди, амэ ӷанас, кай лэстэ ек гиндо амэнца.