Дила

16 О Павло авеля андэ Де́рвия, ай потом жыля андэ Ли́стра. Котэ сас ек ученико, савэс ақарэнас Тимафеё. Лэстири дэй сас еврейка — вой тожэ ашэля ученица, ай лэско дад сас греко. 2 И ԥрала андэ Ли́стра и андо Ико́ниё драго дэнас дума пала Тимафе́ё, 3 и о Павло закамля тэ лэл лэс пэса. Но о Павло спэрва опшындя лэс, важ кода кай андэ кодэла краёря всаворэ евреёря ӷанэнас, кай лэско дад греко. 4 Вонэ обжанас разни фороря и росԥэнэнас пала решэнии, савэ прилинэ и апосталоря и барэдэр ԥрала андо Иерусалимо и савэнди трэбуй сас тэ приритярдён. 5 Кадэлэстар и ӷурторя ашэнас май састэ андо патяимос, и лэ ԥралэн и лэ ԥэян кажно дес ашэлас май бут.

6 Вонэ прожылэ через и Фри́гия и через и Гала́тия, важ кода кай о свынто зор на мэкля лэн тэ росԥэнэн о алав лэ Дэвлэстар андэ Азия*. 7 Тоди, кала вонэ дожылэ жы каринг и Ми́сия, вонэ камлэ тэ жан андэ Вифи́ния, но о Исусо через о свынто зор на домэкля када. 8 Важ када вонэ прожылэ и Ми́сия и авелэ андэ Траа́да. 9 И рят лэ Павлости сыкаделя, кай англа лэстэ тердёл македо́нцо и мангэл: «Ав андэ Македо́ния и поможысар амэнди». 10 Посли када амэ сразу решыли тэ жас андэ Македо́ния, важ кода кай полям: о Дэл камэл, кай амэ тэ жас и котэ тэ росԥэнас и лащи новость.

11 Анда Траа́да амэ отплывисардям андэ Самафра́кия (па дром амэ никай на терделям), ай пэ авэр дес лаглям андо Неа́палё*. 12 Котар амэ жылям андэ Фили́пы, андо Римско форо и ӷлавно форо пэ кодэва краё андэ Македо́ния, и ашэлямпэ котэ пэ дэсави время. 13 В суботу амэ вижылям анда форо и жылям каринг и лэн. Амэ гиндосарасас, кай котэ исин ҭан важ и молитва. Котэ амэ прибэшлям и залям и дума лэ манушнянца, савэ кордэ авелэ. 14 Ек андар лэндэ сас и Ли́дия анда Фяти́ра, сави даралас лэ Дэвлэстар. Кадэя манушни залэласпэ кодэлэса, кай битинэлас о пурпуро. И Ли́дия ашунэлас амэн, и о Иегова* ԥэрнадя лако ди, и вой приля кода, со ԥэнэнас о Павло. 15 Кала вой и всаворэ анда лако цэр болделэ, вой ля фартэ тэ мангэл амэн: «Если тумэ гиндон, кай мэ уӷодно лэ Иеговасти, авэн и жувэн андэ мэрно цэр» — и амэ ашэлямпэ латэ.

16 Еқвар амэ жасас каринг о ҭан важ и молитва и додиқлям ла служанка, андэ сави сас о найвужо и сави лэстирэ зорэса ԥэнэнас, со трэбуй тэ авэл англэ. Кадэлэса вой затерэлас барэ ловэ кодэлэнди, кастири служанка вой сас. 17 Кадэя тэрни манушни ԥирэлас пала амэндэ и пала Павло и цыпияс: «Кадэла мануша — лэ Барэ Дэвлэстирэ раборя! Вонэ росԥэнэн тумэнди пала дром каринг и спасения!» 18 Кадя вой терэлас бут деса, пока о Павло на цыеля кадэлэстар. Во обрисайля и ԥэндя лэ найвужэсти: «Лэ Исусостирэ лэ Христостирэ алавэстар ԥэнав тути тэ вижас андар латэ!» — и во сразу вижыля.

19 Кала и мануша, савэнди вой затерэлас, полинэ, кай хасардэ о затеримос, вонэ хутилдэ лэ Павлос и лэ Силас и цырдэ лэн пэ ӷлавно площадь* каринг и барэ мануша. 20 Вонэ андэ́ лэн каринг и форицки барэдэра* и ԥэндэ: «Кадэлэ манушэндар нинай покоё лэ мирости андэ амаро форо. Вонэ евреёря 21 и сытярэн кодэлэсти, со амэ, ри́мляноря, на трэбуй тэ прилас и тэ ритярас». 22 О миро ля тэ холявэл, и барэдэра приԥэндэ тэ сцырдэн пар лэндэ и ӥда и тэ зашындярэн лэн лозынкэнца. 23 Лэн фартэ мардэ и шутэ андо баруно, ай лэ охраникости ԥэндэ драго тэ диқэл пала лэндэ. 24 Кала о охранико ашундя када, во шутя лэн андэ дурутни камера андо бар и заԥандадя лэндирэ пэрнэ андэ каш.

25 Варикай андэ епаш рят о Павло и о Си́ла мангэнаспэ лэ Дэвлэсти и хвалинас лэс андэ диля, ай и барунаря лэн ашунэнас. 26 Неожыдано фартэ пэрэтиносайля и ԥув, и о баруно затрусисайля. Всаворэ вудара поԥэрнаделэ, ай и цэпоря па барунаря спэлинэ. 27 Кала о охранико прошутяпэ и додиқля, кай и вудара андо баруно ԥэрнадэ, во хутилдя и бари шури и камля тэ умарэл пэс, важ кода кай гиндояс, кай и барунаря позанашлэ. 28 Но о Павло зацыписайля: «На́ тер када! Амэ всаворэ катэ!» 29 О охранико ԥэндя тэ анэн и лампы и запрастая андэ камера. Лэс тинояс, и во пэля пэ чанга англа Павло и Си́ла. 30 Во виандярдя лэн анда баруно и пушля: «Со мэ тэ терав, кай тэ спасысавав?» 31 Вонэ ԥэндэ: «Патя андо Баро Хулай андо Исусо, и спасысапэ — и ту, и тиро ери». 32 И вонэ линэ тэ росԥэнэн и лащи новость пала алав лэ Иеговастар лэсти и всаворэнди, ко сас андэ лэско цэр. 33 Андэ кодэя познё время о охранико андярдя лэн пэса и прохаладя лэнди и раны. Ай потом во и всаворэ, ко сас андэ лэско цэр, сразу болделэ. 34 О охранико андя лэн пэстэ цэрэ и стодя важ лэндэ мисяйля. Вместе пэстирэ ереса во фартэ лошавэлас, кай патяя андо Дэл.

35 Тэсара и форицки барэдэра бишалдэ каринг о охранико пэстирэ помошниконэн*, кай вонэ тэ приԥэнэн лэсти: «Одмэк кодэлэ манушэн». 36 О охранико ԥэндя лэ Павлости: «И форицки барэдэра приԥэндэ тэ одмэкав тумэн лэдон. Важ када вижан и жан Дэвлэса». 37 Но о Павло ԥэндя: «Амэ — римски ӷражданоря, и амэн би сындоско англа всаворэ мардэ и шутэ андо баруно, ай акана чоралэс одмэкэн? Най, мэк екжэнэ авэн и одмэкэн амэн!» 38 И помошникоря пэрэдинэ лэ барэдэрэнди андо форо кадэла алава, и вонэ пэрэдарайлэ, кала уӷанглэ, кай о Павло и о Си́ла — римски ӷражданоря. 39 Вонэ авелэ и манглэ лэндар извинении, ай потом освободисардэ лэн анда баруно и манглэ тэ ужан анда форо. 40 Но о Павло и о Си́ла вижылэ анда бар и жылэ андо цэр кай и Ли́дия. Котэ вонэ диқлэпэ лэ ԥралэнца, подритярдэ лэн и ужылэ анда форо.