Свынто тайна
17 Ек анда семь анӷелоря, савэндэ сас семь чарэ, поджыля каринг мандэ и ԥэндя: «Мэ сыкавава тути, сар терэна сындо пэ ашунгли шоварка*, сави бэшэл пэ бут пая. 2 Лэ ԥувьятирэ царёря шалыинаспэ ласа, и кодэла, ко жувэл пэ ԥув, упэнаспэ латирэ билажавардэ виноса».
3 Лэ свынтонэ зорэса во пэрэандярдя ман андэ пустыня. Котэ мэ додиқлэм ла жувля — вой бэшэлас по лоло зверё, савэстэ сас семь шэрэ и дэш роӷоря. Пэ вся лэстири тила сас пистромэ найпативалэ алава по Дэл. 4 Пэ жувли сас фиалетово и тэмно лоли ӥда, ай кадяжэ сомнак, кучутнэ бара и жэмчуӷо. Андо вас вой ритярэлас сомнакуно стакано, андэ саво сас ԥэрдо гряцымос* и мэлалимос латирэ билажавардимастар. 5 Латэ по чикат сас пистромэ алав, пала саво нико на ӷанэнас: «Ашунгло Вавило́но, лэ шоваркэндири дэй и всаворэ гряцымастири, саво терэлпэ пэ ԥув». 6 Мэ додиқлэм, кай и жувли сас мати лэ свынтонэндирэ ратэстар и лэ Исусостирэ свидетелёнэндирэ ратэстар.
Кала мэ додиқлэм ла, мэ фартэ удивисайлэм. 7 О анӷело ԥэндя манди: «Состар ту кадя фартэ удивисайлян? Мэ дава тути тэ ӷанэс, со сыкавэл* кадэя жувли и со сыкавэл о зверё, пэ саво вой бэшэл и савэстэ семь шэрэ и дэш роӷоря. 8 О зверё, савэс ту диқлян, спэрва сас, потом лэс на ашэля, но ӥто во виӷулела анда пропость и лэстар нисо на ашэлапэ. Ай и мануша пэ ԥув — кодэла, кастирэ алава на запистронпэ андэ ла жызняко лил кодэла времятар, сар появисайля о миро, — удивинапэ, кала диқэна, кай о зверё спэрва сас, потом лэс на ашэля, но во появисайля упалэ.
9 Важ када трэбуй драго тэ терэл и годи. И семь шэрэ — када семь плая, пэ савэ бэшэл и жувли, 10 и када вонэ жэ и семь царёря: панч андар лэндэ ужэ ужылэ, ек правий акана, ай о послиднё инке на авеля; но кала авэла, правия найдолӷо. 11 О зверё, саво сас и саво на ашэля, када кадяжэ о восьмо царё; во появисайля анда семь царёря, и лэстар нисо на ашэлапэ.
12 Лэ зверёстирэ дэш роӷоря — када дэш царёря, савэ инке на линэ тэ правин. Лэндэ авэла право тэ правин лэ зверёса ек часо. 13 Лэндэ ек гиндо, кочай вонэ отдэн пэско зор и о право тэ хулаин лэ зверёсти. 14 Лэндэ авэла война лэ Бакрорэса, о Бакроро победия лэн, важ кода кай во Хулай лэ хуланго и Царё лэ царёнэнго. И лэса победина кодэла, ко сас ақардо и витидо и ашэласпэ кандино».
15 Во ԥэндя манди: «И пая, пэ савэ бэшэл и шоварка, — када нацыи, толпы и народоря, савэ дэн дума пэ разни шыба. 16 О зверё и лэстирэ дэш роӷоря, савэ ту диқлян, завэрыцына ла шоварка, вся латар одлэна и злэна пар латэ и ӥда, похана пар латэ о мас и сԥабарэна ла. 17 Важ кода кай о Дэл стодя лэнди андо гиндо тэ стерэн кадя, сар во камэл — кай вонэ тэ домардён ек пэско гиндо: тэ отдэн пэско право тэ правин лэ зверёсти, пока на ашэла кадя, сар ԥэндя о Дэл. 18 Ай и жувли, савя ту диқлян, — када о ашунгло форо, саво хулаий пэ ла ԥувьятирэ царёря».