Матфеё

23 Тоди о Исусо взвисайля каринг о народо и каринг пэстирэ ученикоря кацавэ алавэнца: 2 «И фарисеёря и законикоря залинэ лэ Маисеёско ҭан. 3 Кочай терэн вся, со вонэ тумэнди ԥэнэн, но на́ андярэн пэс сар вонэ, важ кода кай вонэ ԥэнэн, со трэбуй тэ терэн, но екжэнэ када на терэн. 4 Вонэ стон лэ манушэнди пэ кор ԥаримос, ай екжэнэ и наеса на лэнпэ, кай тэ стерэн лэс май вушэро. 5 Вонэ вся терэн, кай када авэр тэ диқэн: терэн май барэ и коробочки* важ и которора анда Свынти Лила*, савэ ԥиравэн сар амулеторя, и терэн май лунго и брыжа пэ ӥда. 6 Лэнди чалёл тэ залэн само лашэ ҭана пэ мисяйли и тэ бэшэн англал* андэ синагоги. 7 Кадяжэ лэнди чалёл, кала лэнца здоровкиинпэ пэ базароря и ԥэнэн пэр лэндэ учителёря*. 8 Ай тумэ на́ домэкэн, кай пэр тумэндэ тэ ԥэнэн учителёря, важ кода кай тумэндэ ек Учителё, ай тумэ всаворэ — ԥрала. 9 И дад ни пэр кастэ пэ ԥув на́ ԥэнэн, важ кода кай тумэндэ ек Дад — небесно. 10 И на́ домэкэн, кай пэр тумэндэ тэ ԥэнэн хула́я, важ кода кай тумэндэ ек Хулай — о Христос. 11 Само ашунгло машкар тумэндэ трэбуй тэ авэл тумэнди слуӷо. 12 Кодэва, ко путёл, авэла тэлярдо, ай кодэва, ко найабуримаско, ашэла ашунгло.

13 Бида тумэнди, законикоря и фарисеёря, двухлични мануша, важ кода кай тумэ ԥандавэн англа миро и вудара андо небесно Царство. Тумэ екжэнэ на зажан и на мэкэн кодэлэн, ко камэл тэ зажал. 14 ——*

15 Бида тумэнди, законикоря и фарисеёря, двухлични мануша, важ кода кай тумэ обладэн и моря и обжан и ԥув, кай тэ зацырдэн андэ пэстири вера хоть еқэ манушэс, и, кала тумэндэ када вижал, кадэва мануш ашэл кацаво, кай затерэл тэ попэрэл андэ гее́на инке* май фартэ, чем тумэ екжэнэ.

16 Бида тумэнди, корэ, савэ сыкавэн о дром аврэнди, важ кода кай тумэ ԥэнэн: „Если варико солахал пэ қандири, када нинай нисо, но если варико солахал по сомнак андэ қандири, тоди во трэбуй тэ зритярэл о алав“. 17 Корэ и дилэ мануша! Со май важно: о сомнак или и қандири, сави свынцосардя о сомнак? 18 И инке тумэ ԥэнэн: „Если варико солахал по жэртвенико, када нинай нисо, но если варико солахал пэ жэртва, сави пэр лэстэ, тоди во трэбуй тэ зритярэл о алав“. 19 Корэ! Со май важно: и жэртва или о жэртвенико, саво свынцой и жэртва? 20 Важ када кодэва, ко солахал по жэртвенико, солахал лэса и всаворэса, со пэр лэстэ; 21 кодэва, ко солахал пэ қандири, солахал пэр латэ и пэ кодэва, ко жувэл андэр латэ; 22 и кодэва, ко солахал по небо, солахал пэ лэ Дэвлэско троно* и пэ кодэва, ко бэшэл пэр лэстэ.

23 Бида тумэнди, законикоря и фарисеёря, двухлични мануша, важ кода кай тумэ дэн десято часть па мята, укропо и зира, но отшон кода, со май важно андо законо, — тэ авэн справедливи, тэ авэн одялэ и тэ на ашавэн аврэн. И кода трэбуй тэ терэн, и пала авэр тэ на бистрэн. 24 Корэ, савэ сыкавэн о дром аврэнди! Тумэ сцэдин лэ комарес, ай лэ верблюдос нақавэн!

25 Бида тумэнди, законикоря и фарисеёря, двухлични мануша, важ кода кай тумэ вихалавэн о стакано и о тэляри упрал, но андрэ ԥэрдо чик кодэлэстар, кай тумэ чорымастирэ и гиндон кати пала пэстэ. 26 Коро фарисеё, вихалав спэрва о стакано и о тэляри андрал, тоди вонэ ашэна вужэ и упрал.

27 Бида тумэнди, законикоря и фарисеёря, двухлични мануша, важ кода кай тумэ сар белимэ моӷилки. Упрал вонэ дицон шукарнэ, ай андрэ ԥэрдо лэ мулэндирэ кокаля и мэлалимос. 28 Кадя и тумэ упрал дицон лэ мирости сар правильни мануша, ай андо ди тумэндэ ԥэрдо хохаимос и найлашымос.

29 Бида тумэнди, законикоря и фарисеёря, двухлични мануша, важ кода кай тумэ терэн моӷилки лэ Дэвлэстирэ особонэ манушэнди, вурявэн и памятникоря лэ правильнонэ манушэнди 30 и ԥэнэн: „Тэ жудоп амэ андэ кодэя время, кала жувэнас амарэ ԥурэ, тоди на умардоп вместе лэнца лэ Дэвлэстирэ особонэ манушэн“. 31 Кадя тумэ прижанэн, кай тумарэ дада умарэнас лэ Дэвлэстирэ особонэ манушэн. 32 Со ж, достерэн и дила, сави залинэ тумарэ ԥурэ!

33 Сапа, лэ сапэндирэ* бэяцэ, сар тумэ сможэте тэ фэринпэ лэ сындостар и тэ на попэрэн андэ гее́на? 34 Важ када мэ бишалав каринг тумэндэ лэ Дэвлэстирэ особонэ манушэн, лэ годявэрнэ манушэн и лэ учителёнэн. Дэсавэн андар лэндэ тумэ умарэна и казнина по столбо, ай дэсавэн лэна тэ марэн чукнянца андэ синагоги и тэ ӷонин па всаворэ фороря, 35 и пэр тумэндэ пэрэла и дош, кай сас умардэ и правильни мануша, — лэ Авелёстиря смэртятар жы кай лэ Захариястири смэрть, лэ Варахиястирэ шавэстири, савэс тумэ умардэ машкар свынто ҭан и жэртвенико. 36 Чаче ԥэнав тумэнди: и дош пала вся када пэрэла пэ всаворэ мануша, савэ жувэн андэ кадэя время.

37 Иерусалимо, Иерусалимо, саво умарэл лэ Дэвлэстирэ особонэ манушэн и помарэл барэнца кодэлэн, кас бишалэн каринг тутэ... Скативар мэ камавас тэ стидав тирэ бэятонэн, сар и каӷни стидэл тала ԥақа пэстирэ пуёнэн! Но тумэ на закамлэ. 38 Важ када тумаро цэр авэла замэкло*. 39 Ԥэнав тумэнди: тумэ на диқэна ман, пока на ԥэнэна: „Бахтало* кодэва, ко жал лэ Иеговастирэ* алавэстар!“».