Дила
22 «Ԥрала и пативалэ мануша*, ашунэн, мэ ԥэнава, васо пэр мандэ нинай дош». 2 Кала вонэ ашундэ, кай во дэл дума пэ еврейско шыб, ашэля инке май тихо. О Павло ԥэндя: 3 «Мэ сым евреё, арақаделэм андо Та́рсо, саво андэ Килики́я, ай учисайлэм андэ кадэва форо кай о Гамали́ло*. Ман сытярдэ андэ вся тэ ритярав лэ ԥурэнго законо, и мэ хваткаса андяравас лэ Дэвлэстири время кадя жэ, сар и всаворэ тумэ. 4 Мэ ӷонисаравас и дажэ умаравас кодэлэн, ко жалас па кадэва Дром, астаравас и шавас андо баруно муршэн и жувлян, 5 и када можэт тэ потвердий о ӷлавно рашай и всаворэ сындомаря анда Ӷлавно иудейско сындо*. Вонэ динэ манди письморя каринг и ԥрала андо Дама́ско, и мэ жылэм, кай и котэ тэ хутилав кодэлэн, ко прижал каринг о Дром, и тэ андярав лэн андо Иерусалимо, кай лэндар тэ спушэн.
6 Но кала мэ пашувавас каринг о Дама́ско, варикай в 12 часов дня пэр мандэ дядап о ярко свето па небо. 7 Мэ пэлэм пэ ԥув и ашундэм о ӷолосо: „Са́вло! Са́вло, васо ту ман ӷонис?“ 8 Мэ пушлэм: „Ко дэл дума?“ Во ԥэндя: „Када о Исусо анда Назаре́то, савэс ту ӷонис“. 9 И мануша, савэ манца сас, диқлэ о свето, но на ашундэ о ӷолосо кодэлэско, ко манца дэлас дума. 10 Тоди мэ пушлэм: „Баро Хулай, со мэ тэ терав?“ Во ԥэндя: „Ущи, жа андо Дама́ско, и котэ тути ԥэнэна, со трэбуй тэ терэс“. 11 Но мэ корайлэм через о ярко свето, важ када мэрнэ мануша андярдэ ман вастэстар андо Дама́ско.
12 Котэ жувэлас ек фартэ верущё мануш, савэс ақарэнас Ана́ния. Во ритярэлас о законо, и пэр лэстэ стонас патив всаворэ евреёря андо Дама́ско. 13 Во авеля каринг мандэ, терделя паша мандэ и ԥэндя: „Са́вло, ԥрал, мэк каринг тутэ рийпэ и зрения!“ И мэ сразу лэс додиқлэм. 14 О Ана́ния ԥэндя: „Амарэ ԥурэнго Дэл витидя тут, кай ту тэ уӷанэс лэстири время, тэ диқэс Кодэлэс, ко андэ вся правильно, и тэ ашунэс лэско ӷолосо, 15 важ кода кай ту авэса лэско свидетелё и лэса всаворэнди тэ ԥэнэс, со диқлян и со ашундян. 16 Кочай на́ цырдэ и время! Ущи, болдюв и прижан лэско алав, кай тэ схалавэс пэско бэзэх“.
17 Кала мэ рисайлэм андо Иерусалимо и мангаваспэ андэ қандири, манди сыкаделя, 18 сар о Баро Хулай ԥэндя манди: „Грабисав, ужа анда Иерусалимо со май ӥто, важ кода кай катэ на приашундёна, кала ту лэса тэ потвердис о алав пала мандэ“. 19 И мэ ԥэндэм: „Баро Хулай, вонэ ӷанэн, кай кодэлэн, ко патял андэр тутэ, мэ шавас андо баруно и маравас андэ синагоги. 20 И кала умарэнас тирэ свидетелёс лэ Стефанос, мэ тердювавас найдур и подритяравас када, и диқавас пала ӥда кодэлэ манушэндири, ко лэс умарэлас“. 21 Но во ԥэндя манди: „Жа, мэ бишалава тут ӷаласвета, каринг авэр народоря“».
22 Вонэ ашунэнас лэ Павлос, но посли кадэла алава линэ тэ цыпин: «Злэн кадэлэ манушэс па парни люма! Во трэбуй тэ мэрэл!» 23 Вонэ цыпинас, росшонас пэстири ӥда и веинас о прахо. 24 О барэдэр халавдо приԥэндя тэ ундярэн лэ Павлос андэ халавдицки баракоря, тэ марэн чукняса и тэ допушэн, кай тэ уӷанэн, васо вонэ камэн лэс тэ умарэн. 25 Но кала лэ Павлос приԥанглэ, кай тэ марэн ла чукняса, во ԥэндя лэ барэ халавдэсти, саво тердёлас паша лэстэ: «Хэба када па законо би сындоско тэ марэн кодэлэс, кастэ исин римско ӷражданство?» 26 Кала о баро халавдо ашундя када, во жыля кай о барэдэр халавдо и ԥэндя: «Со ту терэс? Кадэва мануш — римско ӷражданино». 27 Тоди о барэдэр халавдо пашэля каринг о Павло и пушля: «Ԥэн, ту чаче римско ӷражданино?» Во ԥэндя лэсти: «Да». 28 О барэдэр халавдо ԥэндя: «Мэ тиндэм кадэва ӷражданство важ барэ ловэ». Пэ када о Павло ԥэндя: «Ай мэ лэса арақаделэм».
29 И халавдэ, савэ камлэ тэ допушэн лэ Павлос, сразу оджылэ лэстар. Ай о барэдэр халавдо пэрэдарайля, кай шутя цэпоря по римско ӷражданино.
30 Пэ авэр дес, кай всаек тэ полэл, андэр со и евреёря дошалярэн лэ Павлос, о барэдэр халавдо зля пар лэстэ и цэпоря и приԥэндя, кай тэ стидэнпэ и барэ рашая и всаворэ сындомаря анда Ӷлавно иудейско сындо. Тоди во андя каринг лэндэ лэ Павлос и стодя англа лэндэ.