Матфеё

13 Андэ кодэва дес о Исусо вижыля анда цэр и бэшля паша моря. 2 Каринг лэстэ авеля фартэ бут миро, важ када во бэшля андэ лодка, ай вся о народо ашэляпэ тэ тердёл по береӷо. 3 И во ля бутэсти лэн тэ сытярэл и тэ призындярэл примероря: «Ек мануш вижыля тэ сеий пэ мал. 4 Кала во росшолас о зэрно, дэсавэ семена пэлинэ паша дром. Привуряйлэ и чирикля и виклюисардэ лэн. 5 Дэсавэ семена пэлинэ котэ, кай сас почти ек и бара, и сразу пробарелэ, важ кода кай котэ сас набут ԥув. 6 Но кала вазгляпэ о қам, во оԥабардя и росточкоря, и вонэ зашутелэ, важ кода кай лэндэ на сас корнёря. 7 Дэсавэ семена пэлинэ машкар калючки. И калючки вибарелэ и замардэ и росточкоря. 8 Ай дэсавэ семена пэлинэ пэ лащи ԥув и андэ́ урожаё: дэсавэ — в 100 раз май бут кодэлэстар, со сас посеимэ, авэр — в 60 раз май бут, ай инке — в 30 раз май бут. 9 Кастэ исин кан, мэк ашунэл».

10 Тоди каринг лэстэ поджылэ и ученикоря и пушлэ: «Васо ту дэс дума лэнца примеронэнца?» 11 Пэ када во ԥэндя лэнди: «Тумэнди дино тэ полэн и свынти тайны пала небесно Царство, ай лэнди най. 12 Кодэлэсти, кастэ исин*, авэла дино май бут, и лэстэ вся лэла тэ хутилэл, ай кодэлэстар, кастэ нинай, авэла одлино дажэ кода, со лэстэ исин. 13 Кочай мэ и дав дума лэнца примеронэнца. Важ кода кай вонэ диқэн, но на шон сама, ашунэн, но на приашундён и на полэн. 14 И тоди лэнца* ашэл кадя, сар май данглал ԥэндя о Иса́я: „Лэна тэ ашунэн, но на полэна и лэна тэ диқэн, но на шона сама. 15 Важ кода кай кадэлэ манушэнго ди ашэля баруно. Вонэ ашунэн лэ канэнца, но на взвинпэ и корадэ и яқа, и на камэн тэ диқэн лэ яқэнца, тэ ашунэн лэ канэнца, тэ полэн лэ одеса и тэ ринпэ каринг мандэ, кай мэ тэ исцэлисарав лэн“.

16 Ай тумэ бахталэ, важ кода кай тумарэ яқа диқэн и тумарэ кан ашунэн. 17 Чаче ԥэнав тумэнди: бут правильни мануша и лэ Дэвлэстирэ особи мануша* камэнас тэ диқэн кода, со диқэн тумэ, но на диқлэ и тэ ашунэн кода, со ашунэн тумэ, но на ашундэ.

18 Ай акана ашунэн, со сыкавэл о примеро пала мануш, саво сеий пэ мал. 19 Кала о мануш ашунэл о алав пала Царство, но на полэл лэс, каринг лэстэ авэл о Бэнг* и чорэл анда лэско ди кода, со сас посеимэ. Када и семена, савэ пэлинэ паша дром. 20 Кода, кай и семена пэлинэ котэ, кай сас почти ек и бара, сыкавэл, кай о мануш ашунэл о алав и сразу жэ радостяса лэс прилэл. 21 Но о алав на мэкэл корнё андэ лэско ди, важ када дэсави время о мануш патял, ай кала залэлпэ и ԥари время и лэс лэн тэ ӷонин важ о алав, во сразу парашэл тэ патял. 22 Кода, кай и семена пэлинэ машкар калючки, сыкавэл, кай о мануш ашунэл о алав, но кода, пала со пережывают и мануша андэ кадэя люма, и о хохавно барвалимос замарэн о алав*, и тоди лэстар нисо на вибарёл. 23 Ай кода, кай и семена пэлинэ пэ лащи ԥув, сыкавэл, кай о мануш ашунэл о алав, полэл лэс, и када анэн урожаё: дэсавэ — в 100 раз май бут кодэлэстар, со сас посеимэ, авэр — в 60 раз май бут, ай инке — в 30 раз май бут».

24 Во призындярдя лэнди инке ек примеро: «О небесно Царство шолпэ по мануш, саво посеисардя пэ мал лашэ семена. 25 Но пока всаворэ совэнас, авеля лэско вороӷо, посеисардя машкар пшэница о бурьяно и ужылятар. 26 Кала виӷульдя о зэрно и дицэля и пшэница, ля тэ дицол и о бурьяно. 27 И раборя авелэ кай ла маляко хулай и ԥэндэ: „Хулай, ту жэ сеисардян пэ пэстири мал лашэ семена. Катар котэ ляпэ о бурьяно?“ 28 Во ԥэндя лэнди: „Када стердя мэрно вороӷо“. Вонэ пушлэ лэстар: „Камэс, амэ жаса и повицырдаса о бурьяно?“ 29 Во ԥэндя: „Най, на трэбуй, а то вместе лэ бурьяноса тумэ можэте дэзначай тэ вицырдэн и пшэница. 30 Мэк барён вместе, пока на поджала время тэ стидэн лэн, ай кала залэна тэ стидэн, мэ ԥэнава мэрнэ манушэнди*: ‚Спэрва вицырдэн о бурьяно и сԥандэн лэс, кай тэ сԥабарэн, ай потом стидэн и пшэница и стон андэ мэрно складо‘“».

31 Во призындярдя лэнди инке ек примеро: «О небесно Царство шолпэ пэ само цынёнё* зэрницо, саво о мануш посадисардя пэ пэстири мал. 32 Во со май цынёнё анда всаворэ авэр семена, но андар лэстэ вибарёл само бари витка анда всаворэ авэр растении андо садо. Тоди привурян и чирикля и терэн ӷниздоря пэр латэ».

33 Во призындярдя лэнди инке ек примеро: «О небесно Царство шолпэ пэ опара, сави и манушни зӷамисардя тринэ сатэнца* яро, и вазгляпэ вся о хумэр».

34 Пала вся када о Исусо дэлас дума лэ манушэнца примеронэнца. Во на дэлас дума лэнца би примеронэнго. 35 Кадя ашэля, сар сас ԥэндо через лэ Дэвлэско особо мануш: «Лава тэ дав дума примеронэнца, росԥэнава кода, со сас гарадо анда дэлмутни время*».

36 Посли када о Исусо одмэкля лэ народос и зажыля андо цэр. Каринг лэстэ поджылэ лэстирэ ученикоря и манглэ: «Поможысар амэнди тэ полас о примеро пала бурьяно пэ мал». 37 Пэ када во ԥэндя: «О мануш, саво сеисардя лашэ семена, — када лэ манушэско Шаво, 38 мал — када и люма, лашэ семена — када лэ Царствостирэ шавэ, ай о бурьяно — лэ Бэнгэстирэ* шавэ 39 и о вороӷо, саво садисардя лэс, — о Бэнг. И время, кала стидэн урожаё, — када послидни деса кадэла люмати, ай и мануша, савэ стидэн, — када и анӷелоря. 40 Сар стидэн о бурьяно и сԥабарэн лэс, кадя авэла и андэ послидни деса кадэла люмати. 41 Лэ манушэско Шаво бишалэла пэстирэ анӷелонэн, и вонэ стидэна и вишона анда лэско Царство всаворэн, ко подмарэл лэ манушэн каринг о бэзэх, и всаворэн, ко терэл найлашымос, 42 и шона лэн андо росԥабардо бов. Котэ вонэ лэна тэ ровэн и тэ мучинпэ*. 43 Ай и правильни мануша* андэ кодэя время лэна тэ светин, сар о қам, андэ пэстирэ Дадэско Царство. Кастэ исин кан, мэк ашунэл.

44 О небесно Царство шолпэ по сомнак, саво гарадо андэ мал, лэс о мануш арақля и упалэ гарадя. Во кадя залошайля, кай жыля, битиндя вся, со лэстэ сас, и тиндя кодэя мал.

45 Инке о небесно Царство шолпэ по торӷовцо, саво ездий па разни фороря и родэл лашо жэмчуӷо. 46 Кала во арақля фартэ кучутни жэмчужына, во сразу жэ битиндя вся, со лэстэ сас, и тиндя ла.

47 Инке о небесно Царство шолпэ пэ бари сетка, сави зашутэ андэ моря и андэ сави попэля бут разно мащё. 48 Кала и сетка ԥэрделя, и мануша вицырдэ ла по береӷо. Потом вонэ бэшлэ и стидэ́ лашо мащё андэ корзины, ай неӷожо вишутэ. 49 Кадя авэла и андэ послидни деса кадэла люмати. Авэна и анӷелоря, отделина лэ найлашэн лэ лашэндар*, 50 и шона лэ найлашэн андо росԥабардо бов. Котэ вонэ лэна тэ ровэн и тэ мучинпэ*».

51 Посли када о Исусо пушля: «Тумэ полинэ вся када?» И ученикоря ԥэндэ: «Да». 52 Во ԥэндя: «Тоди ӷанэн: кажно учителё, саво уӷангля пала небесно Царство, шолпэ пэ лэ цэрэско хулай, саво вилэл анда пэско сэртари и о нэво, и о пурано».

53 Кала о Исусо парашэля тэ призындярэл кадэла примероря, во ужыля котар. 54 Во авеля пэ пэстирэ краёря и ля тэ сытярэл андэ синагога. О миро удивияспэ и ԥэнэнас: «Катар лэстэ кацаво годявэрнимос и зор тэ терэл кацавэ чудеса? 55 Лэско дад — мастеро по каш*. Лэстири дэй — и Мария, ай лэстирэ ԥрала — о Иа́ково, о Ёсифо, о Си́мано и о Иу́да, 56 и всаворэ лэстирэ ԥэя жувэн катэ, машкар амэндэ. Катар жэ во вся када ӷанэн?» 57 И вонэ отшутэ лэс*. О Исусо ԥэндя лэнди: «Лэ Дэвлэстирэ особонэ манушэса вся и время обжанпэ пативаса — кати най пэ лэстирэ краёря и най андэ лэско цэр». 58 И важ кода кай вонэ на патяе андэр лэстэ, во стердя котэ кати набут чудеса.