Матфеё

11 Кала о Исусо парашэля тэ росԥэнэн, со трэбуй тэ терэн и 12 ученикоря, во жыля тэ сытярэл и тэ росԥэнэн андэ авэр фороря.

2 О Иоа́но сас андо баруно и ашундя пала дила, сави терэл о Христос. Во бишалдя пэстирэ учениконэн 3 тэ пушэн лэстар: «Ту кодэва, ко трэбуй тэ авэл, или амэнди тэ аштярас аврэс?» 4 Пэ када о Исусо ԥэндя лэнди: «Жан и росԥэнэн лэ Иоаности, со тумэ диқэн и ашунэн: 5 и корэ диқэн, и ланганэ ԥирэн, и дералэ исцэлинпэ, и кашукэ ашунэн, и мулэ жундён и лэ чорорэнди росԥэнэнпэ и лащи новость. 6 Бахтало кодэва, ко на парашэл тэ патял* через мандэ».

7 Кала лэ Иоаностирэ ученикоря ужылэтар, о Исусо ля тэ дэл дума лэ народоса пала Иоа́но: «Со тумэ жылэсас тэ диқэн андэ пустыня? И вучи чар, сави* шатыийпэ ла балвалятар? 8 Со тоди тумэ жылэсас тэ диқэн? Лэ манушэс, саво утидо андэ кучутни ӥда? Но кодэла, ко ԥиравэл кучутни ӥда, жувэн андэ барвалэ цэра*. 9 Тоди состэ тумэ жылэсас интя? Тэ диқэн лэ Дэвлэстирэ особонэ манушэс? Да, ԥэнав тумэнди, во особо мануш, и пэбутэстэ май баро, чем особо мануш. 10 Када пала лэстэ пистромэ: „Мэ бишалава май англал тутар пэстирэ прецтавителёс*, саво стерэла важ тутэ о дром“. 11 Чаче ԥэнав тумэнди: машкар всаворэ, ко варикала жувэлас, на сас нико май баро, чем о Иоа́но Крестителё, но само цыкно андо небесно Царство май баро лэстар. 12 Кодэлэ десэстар, сар авеля о Иоа́но Крестителё, и мануша старыинпэ тэ попэрэн андо небесно Царство, и кодэла, ко пристол вся о зор, домардён када. 13 Важ кода кай всаворэ лэ Дэвлэстирэ особи мануша и о законо росԥэнэнас и дэвликунэ алава, пока на авеля о Иоа́но. 14 И, если тумэ камэн тэ ӷанэн, во — „о Илья, саво трэбуй тэ авэл“. 15 Кастэ исин кан, мэк ашунэл.

16 Каса манди тэ сыстосарав кадэла времятирэ мирос*? Кадэла мануша шонпэ пэ бэяцэ, савэ бэшэн пэ базароря и ԥэнэн аврэ бэятонэнди: 17 „Амэ дилабасас тумэнди пэ флейта, ай тумэ на цэлэнас. Амэ ровасас, ай тумэнди на сас ԥарэс*“. 18 Авеля о Иоа́но — на хал и на пэл, ай о миро ԥэнэн: „Андэр лэстэ о найвужо“. 19 Авеля лэ манушэско Шаво — хал и пэл, ай о миро ԥэнэн: „Акэ хавджяло и матимари*, приятелё лэ манушэнди анда налоӷово и лэ бэзэхэстирэ манушэнди“. Но всаек, о годявэрнимос доԥэндёл диласа».

20 Посли када о Исусо ля тэ сындой и фороря, андэ савэ во стердя со май бут чудеса, пала кода, кай и мануша котэ на каисайлэ. 21 Во ԥэндя: «Бида тути, Харази́но! Бида тути, Вифсаи́да! Важ кода кай тэ стердопэ андо Ти́ро и Сидо́но и чудеса, савэ сас стердэ тумэндэ, тоди и мануша котэ дэлмут каисайлоп, цырдоп пэр пэстэ травурно ӥда и бэшлоп андо пепло. 22 Ԥэнав тумэнди: май ӥто о Ти́ро и о Сидо́но виритярэна андо Дес важ о сындо, чем тумэ. 23 И ту, Капернау́мо, хэба ваздэсапэ жы каринг о небо? Ту жаса андэ ԥув*! Важ кода кай тэ стердопэ андо Садо́мо и чудеса, савэ сас стердэ тутэ, тоди во терделоп идоси. 24 Ԥэнав тути: май ӥто о Садо́мо виритярэла андо Дес важ о сындо, чем ту».

25 Тоди о Исусо ԥэндя: «Дадэ, лэ небоско и ла ԥувьяко Хулай, тэ авэс ту ашунгло англа всаворэ. Ту гарадян када лэ годявэрнэндар и лэ бужанглэндар и дян тэ полэн лэ цынёне бэятонэнди! 26 Чаче, Дадэ, акэ када и сас тути уӷодно. 27 Мэрно Дад пэрэдя манди вся, и нико на ӷанэн вся пала Шаво — када ӷанэн ек о Дад, и нико на ӷанэн вся пала Дад — када ӷанэн ек о Шаво и кодэла, касти о Шаво камэл тэ дэл тэ ӷанэн о чачимос пала Дад. 28 Авэн каринг мандэ, всаворэ, ко пристол бут зор и терэл ԥари дила, и мэ дава тумэнди зор. 29 Авэн мэрнэ рабонэнца* и сытён мандар, важ кода кай мэрно ди ковло и найабуримаско, и тумэ лэна зор*. 30 Тэ авэн мэрнэ раборя — када вушэро* и тэ терэн мэрни дила* — найԥарэс».