Дила
24 Через панч дес авеля о ӷлавно рашай о Ана́ния и лэса дэсавэ барэдэра и о адвакато* Терту́ло. Вонэ ԥэндэ лэ правителёсти, андэр со дошалярэн лэ Павлос. 2 Кала ақардэ лэ Тертулос, во ля тэ дошалярэл лэ Павлос англа Фе́ликсо. Во ԥэндя:
«Пативало Фе́ликсо! Амэ блаӷодарни тути, кай жувас мирно, и через тири годявэрни правления бут со терэлпэ, кай амаро народо тэ жувэл драго. 3 И амэ вся и время и всаворэ́ одеса блаӷодарни тути важ када. 4 Амэ на камас тэ заритярас тут, важ када мангав тэ виашунэс амэн и тэ сыкавэс, кай тутэ лашо ди. 5 Амэ гиндосарас, кай кадэва мануш май хужэ, чем варисави зараза*, во зваздэл лэ мирос машкар евреёря па вся и ԥув и во ӷлавно андэ религиозно ӷрупа, пэ сави ԥэнэн назаретя́норя. 6 Тай инке во камэлас тэ маӷрий и қандири, важ када амэ лэс хутилдям. 7 ——* 8 Кала ту лэс допушэса, ту диқэса, кай амэ най евья лэс дошалярас».
9 Кадэлэ алавэнца соӷласисайлэ и евреёря, и вонэ линэ тэ доԥэнэн, кай вся кадя и сас. 10 О Фе́ликсо кивнул лэ шэрэса и дя лэ Павлости тэ дэл дума, тоди о Павло ԥэндя:
«Мэ ӷанав, кай ту бут бэрша сындос кадэлэ народос, и важ када мэ камлоп тэ дав дума и тэ зашавпэ пала пэстэ. 11 Ту екжэно можэш тэ розуӷанэс, кай варикай 12 деса палпалэ мэ авелэм андо Иерусалимо, кай тэ тэлював лэ Дэвлэсти, 12 и нико на диқля, кай андэ қандири мэ варикаса тэ спорисавав или тэ подваздав лэ мирос андэ синагоги или андо форо. 13 Вонэ не моӷут тэ доԥэнэн кода, андэр со ман адес дошалярэн. 14 Но мэ прижанав, кай терав амарэ ԥурэндирэ Дэвлэстири дила кадя, сар па лэндирятэ неправильно, и патяв всаворэсти, со пистромэ андо законо и со пистросардэ лэ Дэвлэстирэ особи мануша. 15 Мэ надеисавав по Дэл, сар и вонэ надеинпэ, кай жундёна кодэла, ко терэлас правильно и ко терэлас неправильно. 16 Важ када мэ старысавав, кай мандэ вся и время тэ авэл вужи совесть англа Дэл и англа мануша. 17 Через бут бэрша мэ рисайлэм андо Иерусалимо, кай тэ анав мэрнэ народости подаркоря и тэ анав жэртвы лэ Дэвлэсти. 18 Посли кода сар мэ па обрядо вихаладелэм, вонэ додиқлэ ман андэ қандири. Манца на сас толпа, и мэ на теравас нисави бида. Но котэ сас и евреёря анда Азия*, 19 и када вонэ трэбуй сас тэ авэн каринг тутэ и тэ дошалярэн ман, если лэндэ исин васо када тэ терэн. 20 Или мэк кодэла, ко катэ тердёл, ԥэнэн, андэр со сас мэрни дош, кала мэ тердювавас англа Ӷлавно иудейско сындо*, 21 если мэрни дош кати андэ кода, кай ԥэндэм: „Мэ патяв, кай и мулэ моӷут тэ жундён — пала када ман адес и сындон!“».
22 О Фе́ликсо, саво драго ӷанэнас пала Дром, отстодя лэндири дила и ԥэндя: «Сар кати авэла о барэдэр халавдо о Ли́сиё, мэ виандярава решэния па тумаро вопросо». 23 Во приԥэндя лэ барэ халавдэсти тэ ритярэл лэ Павлос тала охрана, но дя лэсти найбари свобода и домэкля лэстирэ друӷонэнди тэ заботинпэ пала лэстэ.
24 Через дэсавэ деса о Фе́ликсо авеля пэстиря хулаяса ла Друзиласа (вой сас еврейка) и бишалдя тэ ақарэн лэ Павлос, кай во тэ росԥэнэн пала патяимос андо Христос Исусо. 25 Но кала о Павло ля тэ росԥэнэн, сар тэ андярэн пэс правильно, сар тэ зритярэн пэс и пала сындо, саво трэбуй тэ авэл, о Фе́ликсо пэрэдарайля и ԥэндя лэсти: «Пока можэш тэ жас, ай если мандэ авэла время, мэ упалэ бишалава, кай тут тэ ақарэн». 26 Во кадяжэ надеияспэ, кай о Павло дэла лэсти ловэ, важ када во часто бишалэлас, кай тэ ақарэн лэ Павлос, и дэлас дума лэса. 27 Прожыля дуй бэрш, и вместо Фе́ликсо правителёса ашэля о По́рцыё Фе́сто. Но о Фе́ликсо, кай тэ уӷодий лэ евреёнэнди, ашадя лэ Павлос тала охрана.