1 Тимафеё

1 Мэ, о Павло, лэ Христоско лэ Исусоско апостало, сар када сас уӷодно лэ Дэвлэсти, саво спасый амэн, и лэ Христости лэ Исусости, пэр кастэ амэ надеисавас. 2 Мэ пистросарав лэ Тимафеёсти*, саво па лэ Дэвлэстири время чаче ашэля важ мандэ сар шаво.

Мэк о Дэл, амаро Дад, и о Христос Исусо, амаро Баро Хулай, здиқэн пэр тутэ па пэско баро ковло ди, авэн одялэ каринг тутэ и дэн мирно жызня.

3 Англа кода сар тэ жав андэ Македо́ния, мэ манглэм тут тэ ашэспэ андо Ефе́со. Мангав тут пала када и акана. Уԥэн дэсавэнди тэ на сытярэн лэ хохаимасти, 4 тэ на ашунэн разни сказки и тэ на тратин и время, кай тэ виадинон, ко анда саво колено. Кадэлэстар нинай нисаво толко, но через кацави дума о миро лэл евья тэ спорийпэ. Кадяжэ када на сас дино лэ Дэвлэстар, кай амэ май фартэ тэ патяс. 5 Кадэлэсти трэбуй тэ приԥэнэс, кай всаворэ тэ любин ек еқэс. Всаворэ лэна тэ любин, если лэндэ вужо ди, пала лэндэ нинай нисави дош и вонэ на притерэнпэ, кай патян. 6 Дэсавэ парашэлэ тэ цырдэнпэ каринг када, и лэнди чалеля евья тэ дэн дума. 7 Вонэ камэн тэ сытярэн лэ законости, но на полэн ни кода, со дэн дума, ни кода, андэр со фартэ патян.

8 Но амэ ӷанас, кай о законо* лашо, если тэ ритярэс лэс правильно*. 9 Важ кода кай о законо стон най важ кодэла, ко вся терэл правильно, ай важ кодэла, ко ԥагэл о законо, ко зваздэлпэ против авэр, ко на терэл правильно, ко терэл бэзэх, ко придэл аврэн*, ко маӷрий кода, со свынто, ко умарэл пэстирэ родителёнэн и аврэ манушэн, 10 важ кодэла, ко здрал пала билажавардимос*, ко совэл аврэ муршэнца*, ко чорэл лэ манушэн, ко хохавэл, ко дэл хохавни солах и важ всаворэ авэр, ко терэл кода, со жал против о правильно* законо. 11 Кадэва правильно законо ритярдёл пэ райкани лащи новость, сави жал лэ бахталэ Дэвлэстар. Када во дя манди ла тэ росԥэнав.

12 О Христос Исусо, амаро Баро Хулай, дя манди зор, и мэ блаӷодарно лэсти важ кода, кай во патяя манди и дя тэ терав и дила. 13 Во стердя када, хоть варикала мэ найпативалэс давас дума, ӷонисаравас лэ мирос и андяравас пэс наӷло. И всаек о Дэл сас одяло каринг мандэ, важ кода кай мэ на ӷанавас и на патявас. 14 Но амаро Баро Хулай здиқля пэр мандэ па пэско фартэ баро ковло ди, и через о Христос Исусо мэ лэм тэ патяв и тэ любисарав. 15 Акэ и алава, савэ чачунэ и савэнди андэ вся исин патяимос: о Христос Исусо авеля андэ люма, кай тэ спасый лэ дошалэн*, анда савэ мэ — пэрво. 16 Но ман жалуисардэ*, кай о Христос о Исусо тэ сыкавэл па мэрни жызня, хоть мэ и пэрво анда бэзэхэстирэ мануша, пэскати дэ фартэ во ӷанэн тэ тэрпий. Кадя мэ ашэлэм примеро важ кодэла, ко патяла андэр лэстэ и касти дорэсэлапэ и вечно жызня.

17 Мэк ла времятирэ Царёсти и еқэ Дэвлэсти — Кодэлэсти, ко на дицол и жувэл вечно, — жал о ашунгло алав и патив о вико вечно. Аминь.

18 Мэрно шаво Тимафеё, мэ приԥэнав тути када, сар сас ԥэндо пала тутэ лэ Дэвлэстар. Кадэла дэвликунэ алава придэна тути зор тэ на парашэс достойно тэ бориспэ. 19 Важ када тути трэбуй тэ на парашэс тэ патяс и тэ терэс вся, кай тиро ди тэ авэл вужо*. Дэсавэ на закамлэ тэ жувэн вужэ одеса и кочай вонэ парашэлэ тэ патян и ашэлэ сар о кораблё, саво тасыля. 20 Машкар лэндэ о Гимене́ё и о Алекса́ндро, савэн мэ отдэм лэ Сатанасти, кай тэ спушав лэндар и тэ сытярав лэн тэ на дэн дума пала Дэл найпативалэс.