Дила
9 Ай кай о Са́вло инке сас бари вэрыцыя каринг лэ Исусостирэ ученикоря, и во фартэ камэлас лэн тэ умарэл. Важ када во жыля кай о ӷлавно рашай 2 и мангля лэс тэ пистрой письморя андэ синагоги андо Дама́ско, кай лэстэ тэ авэл право тэ хутилэл и тэ андярэл андо Иерусалимо всаворэн, ко прижалас каринг о Дром*, и лэ муршэн, и лэ жувлян.
3 Кала о Са́вло поджалас каринг о Дама́ско, неожыдано па небо дядап ярко свето. 4 Во пэля пэ ԥув и ашундя: «Са́вло! Са́вло, васо ту ман ӷонис?» 5 О Са́вло пушля: «Ко дэл дума?» О ӷолосо ԥэндя лэсти: «Када о Исусо, савэс ту ӷонис. 6 Ущи и жа андо форо, котэ тути ԥэнэна, со тэ терэс». 7 И мануша, савэ сас лэса, кадя удивисайлэ, кай лэндэ аж одляпэ и шыб: вонэ ашунэнас о ӷолосо, но никас на диқэнас. 8 О Са́вло ущеля, и, хоть лэстирэ яқа сас ԥэрнадэ, во нисо на диқэлас, важ када лэс андярдэ андо Дама́ско тала вас. 9 Трин дес во нисо на диқэлас, на халас и на пэлас.
10 Андо Дама́ско жувэлас ек ученико, савэс ақарэнас Ана́ния. О Баро Хулай сыкаделя лэсти и взвисайля: «Ана́ния!» Кодэва ԥэндя лэсти: «Да, Баро Хулай». 11 О Баро Хулай ԥэндя лэсти: «Жа пэ вулица, пэ сави ԥэнэн Прямо́, и андэ лэ Юдаско цэр ԥэн, кай тэ ақарэн лэ Савлос, саво анда Та́рсо. 12 Лэсти сас сыкадо, сар авеля о мануш, савэс ақарэн Ана́ния, и стодя пэр лэстэ и вас, кай тэ рий лэсти и зрения». 13 Но пэ када о Ана́ния ԥэндя: «Баро Хулай, мэ бутэндар ашундэм пала кадэва мануш и пала кода, скати найлашымос во стердя тирэ свынтонэнди андо Иерусалимо. 14 Лэсти и андэ кадэва форо и барэ рашая динэ право тэ астарэл* всаворэн, ко прижанэн тиро алав». 15 Но о Баро Хулай ԥэндя лэсти: «Жа, важ кода кай мэ витидэм кадэлэ манушэс*, кай во тэ росԥэнэн пала мэрно алав лэ народонэнди, ай кадяжэ лэ царёнэнди и лэ израильтянонэнди. 16 Мэ сыкавава лэсти, скати ԥаримос и бида во трэбуй тэ пэрэандярэл через мэрно алав».
17 О Ана́ния авеля андэ кодэва цэр, стодя и вас по Са́вло и ԥэндя: «Са́вло, ԥрал, о Баро Хулай Исусо, саво сыкаделя тути, кала ту жасас па дром кардэ, бишалдя ман, кай ту упалэ тэ диқэс и кай тути тэ авэл дино о свынто зор». 18 Кала во када ԥэндя, сразу жэ па лэ Савлостирэ яқа отпэля варисо кацаво, со шолпэ пэ чешуя, и во упалэ ля тэ диқэл. Во болделя, 19 потом халя, и каринг лэстэ рисайля о зор.
О Са́вло ашэласпэ дэсавэ деса лэ учениконэнца андо Дама́ско. 20 Во сразу ля тэ росԥэнэн андэ синагоги, кай о Исусо — лэ Дэвлэско Шаво. 21 Всаворэ, ко лэс ашунэлас, удивинаспэ и ԥэнэнас: «Хэба най во ӷонияс андо Иерусалимо лэ Исусостирэ учениконэн*? Хэба во авеля кардэ най важ кода, кай тэ хутилэл лэн и тэ одындярэл кай и барэ рашая?» 22 Ай о Са́вло ашэлас май састо андэ дума. Во кадя драго доԥэнэнас, кай о Исусо — када Христос, кай лэ евреёнэнди андо Дама́ско сас найсо тэ ԥэнэн лэсти пэ када.
23 Прожыля набут время, и евреёря доԥэнделэ тэ умарэн лэс. 24 Но о Са́вло уӷангля пала када. Вонэ о дес и рят слединас пала лэ форостирэ вороты, кай лэс тэ умарэн. 25 Важ када лэстирэ ученикоря и рят змэклэ лэс андэ корзина через и фэлястра, сави сас андэ стина.
26 Кала о Са́вло авеля андо Иерусалимо, во камэлас тэ авэл вместе лэ Исусостирэ учениконэнца, но всаворэ лэстар даранас, важ кода кай на патянас, кай во ашэля ученико. 27 Тоди лэсти поможысардя о Варна́ва. Во андя лэ Савлос каринг и апосталоря и росԥэндя лэнди, сар андо дром о Са́вло диқля лэ Барэ Хулас и сар во дэлас дума лэса. Кадяжэ о Варна́ва росԥэндя, сар дэ смило о Са́вло дэлас дума лэ Исусостирэ алавэстар андо Дама́ско. 28 О Са́вло ашэляпэ лэ апосталонэнца. Во ԥирэлас па Иерусалимо и смило дэлас дума лэ Барэ Хуластирэ алавэстар. 29 Во андярэлас и дума лэ евреёнэнца, савэ дэнас дума пэ греческо шыб, и спорияспэ лэнца, и вонэ загиндосардэ лэс тэ умарэн. 30 Кала и ԥрала уӷанглэ пала када, вонэ ундярдэ лэс андэ Кеса́рия, ай потом бишалдэ лэс андо Та́рсо.
31 Важ и ӷурторя андэ Иуде́я, Галиле́я и Сама́рия ашэля спокойно время. Вонэ ашэнас май састэ, и лэн ашэлас май бут. Кадэла ӷурторя баря пативаса терэнас лэ Иеговастири* дила, и во подритярэлас лэн через о свынто зор.
32 Кала о Пётро обжалас кодэва краё, во кадяжэ зажыля кай и свынти андо форо Ли́да. 33 Котэ во додиқля манушэс, савэс ақарэнас Ене́ё. Кадэва мануш сас парализовано и ужэ восемь бэрш на ущелас па кровать. 34 О Пётро ԥэндя лэсти: «Ене́ё, о Исусо Христос исцэлий тут. Ущи и лашар пэско ҭан». И о Ене́ё сразу жэ ущеля. 35 Кала всаворэ, ко жувэлас андо форо Ли́да и андо Саро́но, додиқлэ, кай во вилечисайля, вонэ патяе андо Баро Хулай.
36 Андэ Ёпия жувэлас ек ученица, савя ақарэнас Тави́фа, или пэ греческо шыб До́рка*. Вой терэлас бут лашымос и анда ди поможыяс лэ чорорэнди. 37 Тердяпэ кадя, кай андэ кодэя время вой занасвайля и муля. Ла опхаладэ и стодэ тэ пашлёл упрэ андо цэр. 38 И фороря Ёпия и Ли́да находинпэ найдур ек еқэстар, важ када и ученикоря, кала уӷанглэ, кай о Пётро находийпэ андо форо Ли́да, бишалдэ каринг лэстэ дуе манушэн и манглэ срочно тэ авэл каринг лэндэ. 39 О Пётро стидяпэ и жыля лэнца. Кала во авеля, лэс проандярдэ упрэ андэ комната. Котэ круӷом лэстэ стидэ́пэ и ԥивля; вонэ ровэнас и сыкавэнас лэсти разно ӥда*, сави судя и До́рка. 40 О Пётро мангля всаворэн тэ вижан, ай екжэно терделя пэ чанга и мангляпэ. Посли када во банделя* и ԥэндя: «Тави́фо, ущи!» Вой ԥэрнадя и яқа, додиқля лэ Петрос и бэшля. 41 О Пётро подя лати о вас и поможысардя тэ ущел, потом во ақардя лэ свынтонэн и лэ ԥивлян, и вонэ додиқлэ, кай вой жунди. 42 Пала када ашунделя па вся Ёпия, и бут мануша патяе андо Баро Хулай. 43 О Пётро пэдолӷонэстэ заритярделя андэ Ёпия и жувэлас кай о Си́мано, саво сас мастеро пэ ӷаравля.