Галатия

5 Кай амэ тэ авас кадя свободни, амэн и освободисардя о Христос. Важ када авэн састэ и на́ домэкэн, кай упалэ тэ ашэн рабонэнца.

2 Мэ, о Павло, ԥэнав тумэнди: если тумэ опшындёна, на авэла тумэнди лэ Христостар нисо лашо. 3 Инке еқвар ԥэнав, кай кажно, ко опшындёл, трэбуй тэ ритярэл вся о законо. 4 Если тумэ домардён, кай тумэн тэ прижанэн найдошалэнца через о законо, тоди тумэ дурелэ лэ Христостар. О Дэл ужэ на здиқэла пэр тумэндэ па пэско баро ковло ди. 5 Ай амэ лэ Дэвлэстирэ зорэса фартэ аштярас и надеисавас, кала ашаса уӷодни англа Дэл через амаро патяимос. 6 Кала амэндэ ек гиндо лэ Христоса лэ Исусоса, тоди неважно, опшындо о мануш или найопшындо, — важно, кай лэстэ тэ авэл патяимос, саво дицол, кала во любий.

7 Тумэ прастэнас драго. Ко на дя тумэнди и май дур тэ андярэн лэ Дэвлэстири время*? 8 Ко сытярдя тумэн кадэлэсти? Када най кодэва, ко ақардя тумэн. 9 На́ бистрэн, кай набут опара ваздэл вся о хумэр. 10 Мэ патяв: тумэ, кастэ ек гиндо лэ Барэ Хуласа, на лэна тэ гиндон па аврятэ. И неважно, через кастэ тумэндэ и ԥари время, лэстар спушэна кадя, сар во затердя. 11 Ԥрала, тэ сытярдоп мэ идоси, кай трэбуй тэ опшындён, тоди ман нико на ӷонисардоп. И тоди через лэ Христоско столбо на авелоп ԥарэс по ди* кодэлэнди, ко жал против мандэ. 12 Ай кодэла, ко камэл тэ обдилярэл тумэн, мэк отшынэн пэсти вся*.

13 Ԥрала, тумэ сас витидэ, кай тэ авэн свободни. Но хоть тумэ и свободни, на́ подэнпэ кодэлэсти, каринг со цырдэл лэ бэзэхэско ди. Ай если тумэ любин аврэн, уӷодин ек еқэсти сар раборя. 14 Важ кода кай вся о законо можно тэ ԥэнэс еқэ алавэса: «Любин лэ манушэн, сар корко пэс». 15 Ай если тумэ ханпэ машкар пэстэ и вэрыцын ек еқэс, тоди диқэн, кай тумэ тэ на поумарэн ек еқэс.

16 Ԥэнав тумэнди: жувэн кадя, сар андярэл лэ Дэвлэско зор, и тоди тумэ на лэна тэ подэнпэ кодэлэсти, каринг со цырдэл лэ бэзэхэско ди. 17 Через кода, каринг со цырдэл лэ бэзэхэстири тила, вой жал против лэ Дэвлэско зор, ай лэ Дэвлэско зор — против лэ бэзэхэстири тила. Вонэ на подэнпэ ек еқэсти, и кочай тумэ на терэн кода, со камлоп тэ терэн. 18 Ай если тумэн андярэл лэ Дэвлэско зор, тумэ най тала законо.

19 Лэ бэзэхэстиря тилатири дила драго дицол: када тэ терэн билажавардимос*, тэ терэн мэлали дила, бесовестно* тэ андярэн пэс, 20 тэ тэлён лэ дэвлэндирэ статуэткэнди, тэ драбатярэн*, тэ вороӷуин, тэ скандалин, тэ ревнуин, тэ холявэн*, тэ споринпэ, тэ розделин, тэ оджан лэ чачимастар, 21 тэ вэрыцын*, тэ упэнпэ*, тэ виринпэ пэ ӷульбы и авэр кацави жэ дила. Мэ ужэ ԥэнавас тумэнди и ԥэнав инке еқвар: кодэлэн, ко залэлпэ кацавя диласа, о Дэл на мэкэла андэ пэско Царство.

22 Ай о лашымос лэ Дэвлэстирэ зорэстар — када тэ любин, тэ лошавэн, тэ ладин*, тэ тэрпин, драго тэ обжанпэ аврэнца*, тэ терэн лашымос*, тэ патян, 23 тэ андярэн пэс ковлэс*, тэ ритярэн пэс андэ вас. Против кацаво ни ек законо нисо на ԥэнэна. 24 Тай инке, лэ Христостирэ ученикоря* примардэ каринг о столбо пэстири лэ бэзэхэстири тила и вместе ласа вся о вэрытимос, со исин андэ лэнго ди и годи.

25 Если амэ жувас кадя, сар андярэл лэ Дэвлэско зор, тоди на́ парашам тэ терас кадя, сар андярэл лэ Дэвлэско зор. 26 На ласа тэ ашас путярдэ*, на ласа тэ подмарас аврэн тэ сыстон пэс ек еқэса и на ласа тэ завидуисарас* ек еқэсти.