1 Пётро

4 О Христос пэрэандярдя о ԥаримос и бида, кала сас мануш, тоди и тумэ, сар халавдэ, старыинпэ тэ пэрэлэн лэско гиндо*. Важ кода кай кодэва, ко пэрэандярдя о ԥаримос и бида, парашэля тэ терэл бэзэх, 2 кай кодэя время, сави лэсти ашэляпэ пэ ԥув, во тэ жувэл ужэ най кай тэ терэл кадя, сар камэл лэ манушэско ди, ай кай тэ терэл кода, со уӷодно лэ Дэвлэсти. 3 Хутила, кай варикала тумэ терэнас сар и мануша андэ кадэя люма: андярэнас пэс бесовестно*, здранас тэ терэн кода, со неправильно, упэнаспэ и виринаспэ пэ ӷульбы, стидэнаспэ тэ допэнпэ и гряцаливо тэлёнас лэ дэвлэндирэ статуэткэнди. 4 И акана вонэ нащи полэн, васо тумэ будэр на жан вместе лэнца кодэлэ жэ билажавардэ дромэса, и найпативалэс дэн дума пала тумэндэ. 5 Но лэндар спушэла кодэва, ко ӥто лэла тэ сындой лэ жундэн и лэ мулэн. 6 Важ када и лащи новость сас росԥэнди и лэ мулэнди, кай англа Дэл вонэ тэ андярэн дэвликуни жызня*, хоть лэн и сындон кадя, сар сындон всаворэ́ манушэн.

7 Ӥто вся парашэла тэ авэл. Важ када старыинпэ здраво тэ гиндон и никала на́ бистрэн, пэскати дэ важно и молитва*. 8 Со май важно, фартэ любин ек еқэс, важ кода кай, если тумэ любин, тумэ лэна тэ простин аврэн*. 9 Авэн ӷотови тэ прилэн пэстэ ек еқэс*, но на́ ровэнпэ кадэлэстар. 10 Сар кажнонэсти андар тумэндэ дорэсляпэ пэско лашымос, кадя и пользуинпэ лэса, кала поможын ек еқэсти сар идеальни помошникоря, савэ хулаин разнонэ лашымаса. Кацаво лашымос амэнди дорэсляпэ, важ кода кай о Дэл здиқля пар мэндэ па пэско баро ковло ди. 11 Кодэва, ко дэл дума, трэбуй тэ дэл дума кадя, кай важ всаворэ када тэ авэл алав лэ Дэвлэстар. Кодэва, ко терэл и дила важ авэр, трэбуй тэ терэл и дила и тэ надеийпэ по зор, саво дэл о Дэл. И тоди о Дэл ашэла ашунгло андэ вся через о Исусо Христос. Лэсти прижал тэ авэл само ашунгло и само зорало о вико вечно. Аминь.

12 Кучутнэ ԥрала, на́ удивинпэ, кай тумэнди прижалпэ тэ пэрэандярэн фартэ ԥари время*, — када най варисо нэво. 13 Наоборот, лошавэн, кай тумэндэ кацаво жэ ԥаримос и бида, сар сас кай о Христос. Тоди тумэ лэна тэ лошавэн и андэ кодэя время, кала дицола, сави бах лэстар марэл. 14 Если важ лэ Христоско алав пала тумэндэ найпативалэс дэн дума, тумэ бахталэ, важ кода кай када сыкавэл, кай пэр тумэндэ исин лэ Дэвлэско ашунгло зор.

15 Но мэ на камав, кай варико андар тумэндэ тэ пэрэандярэл бида сар кодэва, ко умарэл, или сар кодэва, ко чорэл, или сар кодэва, ко терэл найлашымос, или сар кодэва, ко ӷулел най андэ пэстири дила. 16 Ай если варико пэрэандярэла бида сар христианино, мэк на́ лажал кадэлэстар, но мэк и май дур на́ парашэл тэ жувэл сар лэ Христоско рабо, и кадя тэ андярэл лашо алав по Дэл. 17 Важ кода кай пашэля и время важ о сындо, и спэрва во авэла пэ кодэла, ко анда лэ Дэвлэско цэр. Если жэ спэрва сындона амэн, тоди со авэла кодэлэнца, ко на приашундёл каринг лэ Дэвлэстири лащи новость? 18 «И если лэ правильнонэ манушэсти найвушэро тэ спасыйпэ, тоди со авэла лэ найлашэ манушэса и лэ бэзэхэстирэ манушэса?» 19 Ай кодэла, кастэ ԥаримос и бида, кай терэн кода, со уӷодно лэ Дэвлэсти, мэк на́ парашэн тэ надеинпэ по Создателё, савэсти исин патяимос, и мэк на́ парашэн тэ терэн лашымос.