Иаково

4 Через со тумэ вороӷуин ек еқэс и скандалин ек еқэса? Хэба най через лэ бэзэхэско ди, саво борийпэ против тумэндэ? 2 Тумэ варисо камэн, но тумэндэ када нинай. Тумэ умарэн и камэн кода, со най тумаро, но тумэндэ на вижал када тэ получин. Тумэ скандалин ек еқэса и вороӷуин ек еқэс. Тумэндэ нинай кода, со камэн, важ кода кай на мангэн. 3 Ай кала мангэн, на получин, важ кода кай мангэн, кай тэ подэнпэ кодэлэсти, каринг со тумэн цырдэл тумаро бэзэхэско ди.

4 Тумэ, кодэла, ко придэл лэ Дэвлэс*, хэба на ӷанэн, кай тэ дружын кадэлэ мироса — када тэ ашэн вороӷоря лэ Дэвлэсти? Важ кода кай кодэва, ко камэл тэ авэл друӷо кадэла люмати, ашэл вороӷо лэ Дэвлэсти. 5 Или тумэ гиндон, кай андэ Свынти Лила евья ԥэнэнпэ: «Амаро ди, саво цырдэл амэн тэ завидуисарас, вся и время варисо камэл»? 6 Но лэ Дэвлэско баро ковло ди май зорало, чем кода, каринг со амэн цырдэл амаро ди. Акэ васо андэ Свынти Лила пистромэ: «О Дэл дурёл кодэлэндар, ко путярдо, ай пэ кодэла, ко найабуримаско, здиқэл па пэско баро ковло ди».

7 Важ када кандэн лэ Дэвлэс, но жан против о Бэнг, и во занашэла тумэндар. 8 Ашэн май пашэ каринг о Дэл, и во ашэла май пашэ каринг тумэндэ. Вихалавэн пэстирэ вас, бэзэхэстирэ мануша, и стерэн вужо пэско ди, даранэ* мануша. 9 Тумэ трэбуй тэ помэкэн пэско муй, тэ умардён бидатар и тэ ровэн. Вместо кода, кай тэ асан, тумэ трэбуй тэ ровэн, вместо кода, кай тэ лошавэн, — тэ умэкэн и вас. 10 Тэлярэн пэс англа Иегова*, и во ваздэла тумэн.

11 Ԥрала, парашэн тэ дошалярэн* ек еқэс. Ко дошалярэл пэстирэ ԥралэс или сындой лэс, во дошалярэл и сындой о законо. Ай если ту сындос о законо, тоди ту ужэ лэс на ритярэс, ай ашэс сындомари. 12 Кати о Дэл можэт тэ стол законо и тэ сындой, и кати во можэт тэ спасый или тэ умарэл. Ай ко ту кацаво, кай тэ сындос аврэ манушэс?

13 Акана ашунэн тумэ, кодэла, ко ԥэнэн: «Адес или тэся амэ ладаса андэ кацаво-то форо и аваса котэ ек бэрш, ласа тэ терас дила и тэ марас и бажын», 14 хоть тумэ на ӷанэн, со авэла тумэнца тэся. Тумэ — тумано, саво найпэдолӷонэстэ появийпэ, ай потом ужалтар. 15 Фэдэр тумэ тэ ԥэнэн кадя: «Если лэ Иеговасти авэла уӷодно, амэ аваса жундэ и стераса кода или када». 16 Ай тумэ чересчур абурон и путён. Кацаво путяримос — вэрыто. 17 И акэ, ко ӷанэн, сар тэ терэл правильно, но кадя на терэл, во терэл бэзэх.