Евреёря

5 Кала анда мануша витидэн лэ ӷлавнонэ рашас, во терэл лэ Дэвлэстири дила, кай тэ авэл драго лэ мирости: во сԥабарэл и анэн и жэртвы пала бэзэх. 2 Кацаво ӷлавно рашай можэт драго тэ обжалпэ кодэлэнца, ко на ӷанэн и терэл бэзэх*, важ кода кай екжэно о рашай би зорэско 3 и кочай трэбуй тэ сԥабарэл и жэртвы най кати важ лэ народоско бэзэх, но и важ пэско бэзэх.

4 Екжэно о мануш не можэт тэ витидэл корко пэс важ кадэя пативали дила. Лэс можэт тэ витидэл кати о Дэл, сар када сас лэ Ароноса. 5 Кадя и о Христос най корко пэстар ашэля ӷлавно рашай. Лэс стодя пэ кадэва ҭан кодэва, ко ԥэндя лэсти: «Ту — мэрно шаво, адес мэ ашэлэм тирэ дадэса». 6 Кадяжэ во ԥэндя: «Ту — вечно рашай, кацаво, сар о Мелхиседэ́ко».

7 Кала о Христос жувэлас пэ ԥув, во пэ ӷласонэндэ и ясвэнца фартэ мангэласпэ кодэлэсти, ко моӷ тэ фэрий лэс ла смэртятар, и о Дэл ашундя лэс, важ кода кай о Христос даралас лэстар. 8 Хоть во сас шаво, во пэрэандярдя и ԥари время и кадя сытеля тэ кандэл. 9 Во ашэля кандино андэ вся и акана через лэстэ всаворэ мануша, савэ лэс кандэн, моӷут тэ спасынпэ пэ вся и вечность, 10 важ кода кай о Дэл стодя лэс ӷлавнонэ рашаса, саво сар о Мелхиседэ́ко.

11 Амэ бут со ԥэндоп пала лэстэ, но када найвушэро тэ доандярас тумэнди, важ кода кай тумэ на старыинпэ тэ полэн, со ашунэн. 12 Тумэ екжэнэ ужэ трэбуй тэ сытярэн аврэн, но упалэ трэбуй, кай варико тэ сытярэл тумэн лэ чачимасти, саво тумэ спэрва уӷанглэ анда свынто алав лэ Дэвлэстар. Тумэнди трэбуй тэ пэн ҭуд, саво важ и бэяцэ, ай най тэ хан кода, со хан и взросли. 13 Ко правардёл ҭудэса, во на ӷанэн о алав лэ Дэвлэстар пала кода, со правильно, важ кода кай во ԥарнэнго бэято. 14 Ай о взросло хамос — важ и дэвликунэ мануша, савэ састэ па лэ Дэвлэстири время. Вонэ через и время сытярдэ пэстири годи тэ ӷатярэл, со лашо, ай со най.