Иоано

9 Кала о Исусо жалас па дром, во додиқля манушэс, саво арақаделя коро. 2 И ученикоря пушлэ лэстар: «Учителё*, васо во арақаделя коро? Ко стердя бэзэх: во или лэстирэ родителя?» 3 О Исусо ԥэндя лэнди: «Ни во, ни лэстирэ родителя на стердэ бэзэх, но через лэско насвалимос сможэт тэ дицол лэ Дэвлэско зор*. 4 Амэ трэбуй тэ терас кода, со уӷодно* кодэлэсти, ко бишалдя ман, пока инке жал о дес. Пашол и рят, кала нико не сможэт нисо тэ терэл. 5 Пока мэ андэ люма, мэ — свето важ и люма». 6 Посли кадэла алава во шунгардя пэ ԥув и зӷамисардя и саля ла ӷлинаса*. Тоди во мақля и смесь, сави получисайля, пэ яқа лэ корэсти 7 и ԥэндя лэсти: «Жа халав о муй андо басэйно Силаа́мо» (ай о Силаа́мо пэрэандярдёл сар «бишалдо»). Кодэва мануш жыля, халадя о муй и ля тэ диқэл.

8 И сосидоря и кодэла, ко диқэлас, сар во май англал мангэлас ловэ, линэ тэ ԥэнэн: «Када чаче кодэва мануш, саво бэшэлас и мангэлас ловэ?» 9 Дэсавэ доԥэнэнас: «Да, када во». Авэр спороса ԥэнэнас: «Най, во просто шолпэ пэр лэстэ». Ай во ԥэнэнас: «Када мэ». 10 Тоди вонэ пушлэ лэстар: «Сар жэ ту лян тэ диқэс?» 11 Во ԥэндя лэнди: «О мануш, савэс ақарэн Исусо, стердя варисави-то смесь, мақля манди ла пэ яқа и ԥэндя: „Жа каринг о Силаа́мо и халав о муй“. Мэ жылэм, халадэм о муй — и лэм тэ диқав». 12 Вонэ пушлэ: «Кай кадэва мануш?» Во ԥэндя: «На ӷанав».

13 Посли када лэ манушэс, саво сас коро, одындярдэ каринг и фарисеёря. 14 Ай о дес, кала о Исусо стердя и смесь и исцэлисардя лэ корэс, сас субота. 15 И фарисеёря тожэ линэ тэ пушэн лэстар, сар во ля тэ диқэл, и во ԥэндя лэнди: «Во стодя манди пэ яқа варисави-то смесь, мэ халадэм о муй и акана диқав». 16 Тоди дэсавэ фарисеёря линэ тэ ԥэнэн: «Кадэва мануш най лэ Дэвлэстар, важ кода кай во на ритярэл о законо пала субота». Ай авэр ԥэнэнас: «Хэба бэзэхэско мануш можэт тэ терэл кацавэ чудеса?» И вонэ на зжылэпэ андо гиндо. 17 Вонэ упалэ пушлэ лэ манушэстар, савэс исцэлисардя о Исусо: «Ай ту со ԥэнэса пала лэстэ? Када жэ через лэстэ ту лян тэ диқэс». Кодэва мануш ԥэндя: «Во лэ Дэвлэско особо мануш».

18 Но и иудеёря на патянас, кай во сас коро, пока на ақардэ лэстирэ родителёнэн. 19 Вонэ пушлэ лэндар: «Када тумаро шаво? Тумэ ԥэнэн, кай во арақаделя коро? Сар жэ вижыля, кай во акана диқэл?» 20 Лэстирэ родителя ԥэндэ: «Да, амэ точно ӷанас, кай када амаро шаво и кай во арақаделя коро. 21 Ай сар вижыля, кай во акана диқэл, амэ на ӷанас, и, ко исцэлисардя лэс, амэ тожэ на ӷанас. Пушэн лэстар. Во взросло, мэк екжэно дэл дума важ пэстэ». 22 Лэстирэ родителя ԥэндэ кадя важ кода, кай даранас лэ иудеёнэндар, савэ ужэ прилинэ решэния тэ видаравэн анда синагога кажнонэс, ко прижанэна, кай о Исусо, — када Христос. 23 Кочай лэстирэ родителя и ԥэндэ: «Во взросло, пушэн лэстар».

24 Тоди и иудеёря упалэ ақардэ лэ манушэс, саво сас коро, и ԥэндэ лэсти: «Ԥэн чачимос англа Дэл*. Амэ ӷанас, кай кадэва мануш — бэзэхэско». 25 Кодэва мануш ԥэндя: «Бэзэхэско во чи най, мэ на ӷанав. Мэ ӷанав ек: мэ сымас коро, ай акана диқав». 26 Вонэ пушлэ лэстар: «Со во туса стердя? Сар во исцэлисардя тут?» 27 Во ԥэндя лэнди: «Мэ ужэ ԥэнавас тумэнди, но тумэ на ашунэнас. Состэ тумэ упалэ камэн када тэ ашунэн? Тумэ со, тожэ камэн тэ андярэн лэстири время*?» 28 Вонэ найпативалэс ԥэндэ лэсти: «Када ту андярэс лэстири время*, ай амэ андярас лэ Маисеёстири время*. 29 Амэ ӷанас, кай лэ Маисеёса дэлас дума о Дэл, ай катар кадэва мануш, амэ на ӷанас». 30 Во ԥэндя: «Акэ када мэ и нащи полав! Тумэ на ӷанэн, катар кадэва мануш, ай во ман исцэлисардя. 31 Амэ ӷанас, кай бэзэхэстирэ манушэн о Дэл на шол сама*. Во шол сама кати кодэлэн, ко лэстар дарал* и терэл кода, со лэсти уӷодно. 32 Никала кацаво на сас, кай о мануш, саво арақаделя коро, тэ исцэлийпэ. 33 Тэ авелоп кадэва мануш най лэ Дэвлэстар, во нисо на стердоп». 34 Пэ када вонэ ԥэндэ: «Ту арақадо андо бэзэх и инке ӷулес амэн тэ сытярэс?» — и видарадэ лэс*.

35 О Исусо ашундя, кай вонэ видарадэ кадэлэ манушэс, и, кала диқляпэ лэса, пушля: «Ту патяс андэ лэ манушэско Шаво?» 36 Кодэва мануш ԥэндя: «Ай ко во? Ԥэн манди, кай мэ андэр лэстэ тэ патяв». 37 О Исусо ԥэндя: «Ту диқлян лэс, и щас во дэл дума туса». 38 Кодэва мануш ԥэндя: «Патяв, Учителё*», и тэлеля лэсти. 39 О Исусо ԥэндя: «Мэ авелэм андэ кадэя люма, кай тэ авэл васо тэ стидэлпэ о сындо: кай и корэ тэ диқэн, ай и зрячи тэ коравэн». 40 И фарисеёря, савэ сас найдур, ашундэ када и пушлэ лэстар: «Камэс тэ ԥэнэс, амэ тожэ корэ?» 41 О Исусо ԥэндя лэнди: «Тэ авелоп тумэ корэ, тоди на авелоп дошалэ андо бэзэх. Ай если тумэ ԥэнэн: „Амэ диқас“, тоди пэр тумэндэ ашэлпэ и дош андо бэзэх».