Евреёря
9 Па пурано доӷоворо сас законо, кай и мануша тэ андярэн лэ Дэвлэстири время, и кадяжэ свынто катуна пэ ԥув. 2 Андэ кадэя катуна сас дуй комнаты. Андэ пэрво комната сас лампа, столо и свынто марно, и пэр латэ ԥэнэнас Свынто комната. 3 Ай пала дуйто шырма сас авэр комната, пэ сави ԥэнэнас Само свынто комната. 4 Котэ сас сомнакуни кадила и о сэртари важ и важни лила, саво сас опшуто сомнакаса. Андо сэртари сас сомнакуни ваза, андэ сави сас и ма́на, лэ Ароностири росцветимэ рувли, ай кадяжэ и бара, пэ савэ сас пистромэ лэ Дэвлэско законо. 5 Ай по сэртари сас зоралэ херувиморя, савэндар пэрэлас и тень пэ крышка* па сэртари. Но акана най вой и время фартэ тэ розласпэ андэ када.
6 Вся када сас заандярдо кадя, и кодэла времятар и рашая кажно дес зажан андэ ла катунатири пэрво комната, кай тэ терэн пэстири дила. 7 Но андэ дуйто комната зажал кати о ӷлавно рашай — еқвар андо бэрш и кати лэ ратэса, саво во анэн важ пэстэ и важ лэ народоско бэзэх, пала саво вонэ на ӷанэнас и стердэ. 8 Кадя о свынто зор ворта сыкавэл: пока сас и пэрво катуна, о дром андо свынто ҭан инке на сас ԥэрнадо. 9 Кадэя катуна сыкавэл кода, со исин щас, и лэ Дэвлэсти идоси анэн и сԥабарэн и жэртвы. Но када на хутилэл, кай андэ вся тэ ашэл вужо оди кодэлэстэ, ко полэл лэ Дэвлэс. 10 Кадэла жэртвы трэбуй кати важ о хамос и важ о пимос, ай кадяжэ кай тэ ашэл вужо о мануш и вся авэр. Када трэбуй сас па законо важ и тила, пока на поджылоп и время, кай андэ вся тэ авэл порядко.
11 Но авеля о Христос — о ӷлавно рашай, саво трэбуй сас тэ анэн о лашымос (и во ужэ дорэсляпэ амэнди). Во зажыля андэ катуна, сави май ашунгли и май идеально и сави стерди най лэ манушэндирэ вастэнца, и вой тердёл най пэ ԥув. 12 Во зажыля андо свынто ҭан, но най лэ бузнэндирэ и лэ гуруворэндирэ ратэса, ай пэстирэ ратэса. Во стердя када кати еқвар и тиндя амэнди возможность тэ спасысавас пэ вся и время. 13 И рашая через лэ бузнэнго и лэ гурувэнго рат и ла гурувняко пепло поможын кодэлэнди, ко мэлалэ*, тэ ашэн свынти, и тоди кацавэ мануша ашэн вужэ андэ лэ Дэвлэстирэ яқа. 14 Если када возможно через лэ жывотнонэнго рат, тоди пэскати май баро зор исин кай лэ Христоско рат! Во через о вечно свынто зор отдя пэстири жызня лэ Дэвлэсти сар бидошатири жэртва. Через лэско рат амаро ди ашэл вужо и амэ парашас тэ терас и мули дила, важ када амэ можэм тэ терас свынто дила важ о жундо Дэл.
15 Акэ васо через лэстэ сас стердо о нэво доӷоворо. Кадя кодэлэнди, кас о Дэл ақардя, сас дини обещания, кай лэнди тэ дорэсэнпэ и вечни блаӷословении. Вся када ашэля возможно важ кода, кай о Христос пэстиря смэртяса витиндя лэн и зля пар лэндэ и дош, сави пэрэлас пэр лэндэ через о законо. 16 Кала терэлпэ о доӷоворо, трэбуй, кай о мануш, саво стердя о доӷоворо, тэ мэрэл. 17 Кай о доӷоворо тэ авэл састо, трэбуй тэ мэрэл кодэва, ко лэс стердя, но нинай нисаво толко, если жундо о мануш, саво лэс стердя. 18 Важ када, кала терэнас о пурано доӷоворо, трэбуй сас варико тэ мэрэл, кай вся тэ залэлпэ. 19 Кала о Маисеё ԥэндя лэ народости вся о законо, во ля лэ гуруворэнго рат, лэ бузнэнго рат, о паи, и ярко-лоли шэрсть и о исопо и опшутя кадэлэса о свынто лил* и всаворэ́ народос. 20 Во ԥэндя: «Кадэва рат важ о доӷоворо, савэсти о Дэл ԥэндя тумэнди тэ приритярдён». 21 Точно кадя жэ во опшутя лэ ратэса и катуна и вся и посуда, сави трэбуй важ и свынто дила. 22 Сар пистромэ андо законо, почти вся ашэл вужо через о рат, и би лэ ратэско лэ манушэсти на простийпэ.
23 Ни акэ, кода, со шолпэ по небесно, трэбуй тэ ашэл вужо через лэ жывотнонэнго рат, но важ о небесно трэбуй жэртвы, савэ пэбутэстэ май лашэ. 24 О Христос зажыля най андо свынто ҭан, саво стердо лэ манушэндирэ вастэнца и стидо кадя, кай тэ шолпэ по чачуно. Но во зажыля ворта андо небо, кай тэ тердёл важ амэндэ англа Дэл. 25 О ӷлавно рашай зажал андо свынто ҭан бэрш бэршэстар, и най пэстирэ ратэса, ай лэ жывотнонэндирэ ратэса. Ай лэ Христости на трэбуй тэ отдэл корко пэс сар жэртва май бут чем еқвар. 26 Тэ авелоп када кадя, лэсти прижылопэ бутвар тэ мучийпэ кодэла времятар, сар появисайля о миро. Но акана, андэ послидни деса кадэла времяти, во сыкадя пэс кати еқвар, кай тэ отдэл пэстири жызня сар жэртва и тэ улэл о бэзэх. 27 И сар и мануша мэрэн еқвар, ай потом лэн аштярэл о сындо, 28 кадя и о Христос кати еқвар отдя пэстири жызня сар жэртва, кай тэ лэл пэр пэстэ бутэнго бэзэх. До дуйто во авэла ужэ най важ кода, кай тэ улэл о бэзэх. Ай кодэла, ко фартэ лэс аштярэл, кай тэ спасынпэ, додиқэна лэс.