Свынто тайна
11 Манди динэ рувли, савяса мериин, и ԥэндэ: «Жа измерисар лэ Дэвлэстири қандири и о жэртвенико и подадиносар кодэлэн, ко тэлёл андэ қандири. 2 Ай и града паша қандири на́ измерисар, важ кода кай кадэя града отдини лэ народонэнди, и вонэ на дэна жызня лэ свынтонэ форости 42 шона. 3 Мэ стерава кадя, кай дуй мэрнэ свидетеля андэ травурно ӥда лэна тэ пэрэдэн и дэвликунэ алава 1 260 деса». 4 Кадэла свидетеля — дуй оливкови витки и дуй лампы, вонэ тердён англа Всаворя ԥувьяко Хулай.
5 Если варико закамэла тэ стерэл лэнди вэрыто, анда лэнго муй вижала яг и сԥабарэла лэ вороӷонэн. Кадя авэна умардэ всаворэ, ко закамэла тэ стерэл лэнди вэрыто. 6 Лэндэ исин право тэ ԥандавэн о небо, кай андэ кодэла деса, кала вонэ лэна тэ пэрэдэн и дэвликунэ алава, тэ на жал брышын. Кадяжэ лэндэ исин право тэ стерэн рат анда паи и тэ бишалэн пэ ԥув разно бида, кала закамэна.
7 Кала и дуй свидетеля парашэна тэ пэрэдэн и дэвликунэ алава, о зверё, саво виӷульдя анда пропость, лэла тэ марэлпэ лэнца, победия лэн и умарэла. 8 Вонэ* лэна тэ пашлён пэ ӷлавно вулица андо ашунгло форо, пэ саво аврэ алавэса ԥэнэн Садо́мо и Египто, кай по столбо сас казнисардо и лэнго Баро Хулай. 9 И мануша анда разни породы, народоря и нацыи, савэ дэн дума пэ разни шыба, лэна тэ диқэн пэр лэндэ* трин епашэса дес и на домэкэна тэ притидэн лэн. 10 Кодэла, ко жувэл пэ ԥув, лэна тэ лошавэн, кай лэн нинай. Вонэ лэна тэ радуинпэ и тэ бишалэн ек еқэсти подаркоря, важ кода кай кадэла дуй лэ Дэвлэстирэ особи мануша мучинас лэн.
11 Через трин епашэса дес о Дэл жундярдя лэн, вонэ терделэ пэ пэрнэ, и кодэлэн, ко када диқля, ля и дар. 12 Па небо ашунделя ӷромко ӷолосо, и во ԥэндя дуе лэ Дэвлэстирэ особонэ манушэнди: «Ваздэнпэ кардэ». Вонэ вазглэпэ андэ туча по небо, ай и вороӷоря диқлэ лэн. 13 Андэ кодэва жэ маменто фартэ пэрэтиносайля и ԥув, и часть* лэ форостар сас розмарди. Через кадэя бида хынделэ 7 000 мануша, ай кодэла, ко вижудэ, пэрэдарайлэ и прижанглэ ашунглэса лэ Дэвлэс по небо.
14 И дуйто бида прожыля. Ӥто пашолас и трито бида.
15 О седьмо анӷело заӷудисардя андэ труба. Па небо ашунделя, сар ӷромко ԥэнэн: «Акана пэ люма правий* амаро Баро Хулай и лэско Христос, и во* лэла тэ правий о вико вечно».
16 И 24 барэдэра, савэ бэшэнас англа Дэл пэ троноря, пэлинэ пэ чанга и тэлелэ лэ Дэвлэсти. 17 Вонэ ԥэнэнас: «Иегова*, Само Зорало Дэл, ту исин и санас, блаӷодарисарас тут важ кода, кай ту лянпэ хуласа и залян тэ правис. 18 Но и народоря фартэ захоляйлэ, и поджыля и время важ тири холи и время тэ виандярэс о приӷоворо лэ мулэнди и тэ блаӷословис тирэ рабонэн, лэ особонэ манушэн, и лэ свынтонэн, ай инке всаворэн, ко дарал тутар, сар лэ цыкнэн, кадя и лэ барэн. И кадяжэ поджыля и время тэ умарэс кодэлэн, ко римой и ԥув».
19 По небо ԥэрнаделя лэ Дэвлэстири қандири*, и андэ қандири дицэля о сэртари важ и важни лила. Динэдап и молнии, ашунделэ ӷолосоря, мардя о ӷромо, пэрэтиносайля и ԥув, и жыля баро ӷрадо.