1 Тимафеё

6 И раборя трэбуй тэ стон патив пэ пэстирэ хула́я, кай и мануша тэ на дэн дума найпативалэс пала лэ Дэвлэско алав и пала лэско законо. 2 Ай если лэндирэ хула́я андярэн лэ Христостири время, тоди лэ рабонэнди на трэбуй тэ андярэн пэс лэнца найпативалэс кати важ кода, кай вонэ — лэндирэ ԥрала. Наоборот, вонэ трэбуй инке май анда ди тэ терэн пэр лэндэ, важ кода кай лэндирэ хула́я — када лэндирэ кучутнэ ԥрала, савэ андярэн лэ Христостири время.

Сытяр и приԥэн кадэлэсти. 3 Но варико можэт тэ сытярэл аврэсти и тэ на соӷласийпэ кодэлэса, савэ правильни* алава ԥэнэн амаро Баро Хулай о Исусо Христос, и лэ законоса, саво сыкавэл, кай трэбуй тэ стас бари патив по Дэл. 4 Если варико кадя терэл, тоди во запутеля и нисо на полэл. Во здрал тэ спорийпэ и долэлпэ каринг и алава. Через вся када и мануша лэн тэ завидуин, тэ скандалин, тэ розындярэн и хохавни дума пэ авэр*, тэ на допатян 5 и вся и время евья тэ споринпэ. Када терэн и мануша, савэндэ пэрэбандярдо о гиндо. Вонэ парашэлэ тэ полэн о чачимос и гиндон, кай, если стон бари патив по Дэл, лэнди можэт варисо тэ дорэсэлпэ кадэлэстар. 6 Да, амэнди чаче бут со дорэсэлпэ, если амэ стас бари патив по Дэл и лошалэ кодэлэсти, со амэндэ исин. 7 Важ кода кай амэ нисо на андям андэ люма и нисо катар не можэм тэ виандярас. 8 Кочай, если амэндэ исин со тэ хас и со тэ лас пэр пэстэ, аваса кадэлэсти лошалэ.

9 Ай кодэлэн, ко закамля тэ розбарвадёл, можэт бут со тэ змарэл, и вонэ моӷут тэ пэрэн андэ яма. Пэр лэндэ лэн тэ хулаин бут диливанэ и вэрыти гиндоря, савэ цырдэн бида и смэрть пэ лэнго шэро. 10 Важ кода кай вся о найлашымос залэлпэ кодэлэстар, кай лэ манушэско ди приԥандёл каринг и ловэ. И дэсавэ через када оджылэ лэ Дэвлэстар и затердэ бут ԥаримос андэ пэстири жызня.

11 Ай ту, лэ Дэвлэско мануш, трэбуй тэ нашэс кадэлэстар. Старысав тэ терэс вся правильно, тэ стос бари патив по Дэл, тэ патяс, тэ любис, тэ ашэспэ састо, тэ обжаспэ аврэнца ковлэс. 12 Достойно борисав пала кода, андэр со патяс, састэс ритярдюв пала вечно жызня, важ сави о Дэл тут витидя и пала сави ту драго росԥэнэсас англа бут мануша.

13 Англа Дэл, саво дэл всаворэсти жызня, и англа Христос Исусо, саво сар свидетелё драго дя дума англа По́нтиё Пила́то, приԥэнав тути: 14 приритярдюв кадэлэсти и тер вся, кай тэ на вимақадёс и тэ авэс бидошако, пока на сыкадёла амаро Баро Хулай о Исусо Христос. 15 Важ кода кай андэ кодэя время, сави стоди кадэлэсти, ек бахтало Зорало Хулай сыкавэла пэско зор*. Во Царё лэ царёнэнго и Хулай лэ хуланго. 16 Во ек, ко не можэт тэ мэрэл, ко жувэл андо ашунгло свитло ҭан, каринг нико нащи тэ пашол, и кас нико анда мануша на диқля и не можэт тэ диқэл. Тэ авэл лэсти вся и патив и вечно зор. Аминь.

17 Приԥэн кодэлэнди, ко барвало андэ кадэя люма, тэ на авэн путярдэ и тэ надеинпэ най по барвалимос, саво будэр на авэла, ай по Дэл, саво анда ди делийпэ амэнца всаворэса, со дэл тэ лошавас. 18 Ԥэн лэнди тэ терэн лашымос, тэ авэн барвалэ лащя диласа, анда ди тэ дэн аврэнди кода, со лэндэ исин, и тэ авэн ӷотови тэ делинпэ. 19 Кацавя диласа вонэ стидэна пэсти барвалимос лэ Дэвлэстар, кай лэндэ тэ авэл спокойно и лащи жызня англэ, и тоди лэндэ вижала састэс тэ ритярдён пала чачуни жызня.

20 Тимафеё, фэрисар кода, со тути сас дино. На́ приашундюв каринг и евутни дума, сави лажаварэл лэ Дэвлэс, и кадяжэ ритярдюв май дур лэ гиндонэндар, савэнца путён дэсавэ мануша, но савэ жан против о чачимос. 21 Дэсавэ оджылэ лэ Дэвлэстар, кала линэ тэ путён кадэлэ гиндонэнца.

Мэк о Дэл здиқэл пэр тумэндэ па пэско баро ковло ди.