Свынто тайна

16 Мэ ашундэм, сар варико ӷромко взвисайля анда қандири* каринг и семь анӷелоря: «Жан и вишон пэ ԥув лэ Дэвлэстиря холятирэ семь чарэ».

2 О пэрво анӷело жыля и вишутя кода, со сас андо чаро, пэ ԥув. Тоди пэ мануша, савэндэ сас лэ зверёско знако и савэ тэлёнас лэстиря статуяти, повиӷульдэ страшни ӷнойни чирки.

3 О дуйто анӷело вишутя кода, со сас андо чаро, андэ моря. И моря ашэля сар лэ мулэско рат, и вся жундо андэр латэ хынделя.

4 О трито анӷело вишутя кода, со сас андо чаро, андэ лэна и андэ родникоря, и вонэ ашэлэ ратвалэ. 5 Мэ ашундэм, сар о анӷело, савэстэ сас право тэ хулаий по паи, ԥэндя: «Амаро надёжно Дэл, саво исин и сас, ту справедливо, важ кода кай виандярдян кацаво сындо. 6 Вонэ умардэ лэ свынтонэн и лэ Дэвлэстирэ особонэ манушэн, кочай ту лэн застависардян тэ пэн лэнго рат. Вонэ када затердэ». 7 И мэ ашундэм, сар о жэртвенико ԥэндя: «Иегова*, Само Зорало Дэл, вся, со ту виандярдян по сындо, правильно и справедливо».

8 О штарто анӷело вишутя кода, со сас андо чаро, по қам, и лэ қамэсти сас домэкло тэ ԥабарэл лэ манушэн. 9 Лэ манушэн фартэ смалияс о қам, но вонэ на каисайлэ. Вонэ видэнас амрая лэ Дэвлэско алав, савэстэ исин право тэ хулаий пэ кадэла биды, и на прижанглэ лэс ашунглэса.

10 О панчто анӷело вишутя кода, со сас андо чаро, пэ лэ зверёско троно, и лэско царство ушарадя и тэмнота. И мануша линэ тэ дэндалэн и шыб дуқаимастар, 11 но на каисайлэ андэ пэстири дила и видэнас амрая лэ небеснонэ Дэвлэс пала кода, кай мучинаспэ и кай пэр лэндэ виӷульдэ и чирки.

12 О шовто анӷело вишутя кода, со сас андо чаро, андэ ашунгли лэн Ефра́то, и вой вишутеля, кай тэ дэл дром лэ царёнэнди, савэ жан па востоко.

13 Мэ додиқлэм, кай анда драконо, анда зверё и анда хохавно*, саво притерэлпэ лэ Дэвлэско, вижан трин найвужэ алава, савэ шонпэ пэ ляӷушки. 14 Кадэла алава лэ найвужэндар и терэн чудеса. Вонэ жан каринг всаворя ԥувьятирэ царёря, кай тэ стидэн лэн пэ война, сави авэла андо баро дес лэ Само Зоралэ Дэвлэско.

15 «Мэ авава сар чор! Бахтало кодэва, ко на совэл и фэрий пэстири ӥда, — во на лэла тэ ԥирэл найутидо и нико на диқэла лэско страмо».

16 И вонэ стидэ́ лэ царёнэн по ҭан, пэ саво пэ еврейско шыб ԥэнэн Армагедо́но*.

17 О седьмо анӷело вишутя кода, со сас андо чаро, по воздухо. И анда қандири лэ троностар ӷромко ашунделя: «Стердо!» 18 Тоди динэдап молнии, ашунделэ ӷолосоря, мардя ӷромо и фартэ пэрэтиносайля и ԥув. И ԥув кадя фартэ на тиносайлясас кодэла времятар, сар пэр латэ появисайлэ и мануша. 19 О ашунгло форо роспэляпэ пэ трин котора, ай и фороря андэ всаворэ страны розмарделэ. О Дэл згиндосардя пала Ашунгло Вавилоно и дя лэсти тэ пэл о вино* пэстиря баря холяса. 20 Всаворэ островоря тасылэ андо паи, и на ашэлэ и плая. 21 Па небо пэ мануша зжыля баро ӷрадо, саво сас варикай 20 килоӷраморя*, ай и мануша дэнас амрая лэ Дэвлэс пала кадэва ӷрадо, важ кода кай кадэя бида сас фартэ ԥари.