Матфеё
18 Тоди каринг о Исусо поджылэ лэстирэ ученикоря и пушлэ: «Ко само баро андо небесно Царство?» 2 О Исусо подақардя каринг пэстэ лэ бэятос, стодя лэс англа лэндэ 3 и ԥэндя: «Чаче ԥэнав тумэнди: если тумэ на парудёна и на ашэна сар бэяцэ, тумэ на попэрэна андо небесно Царство. 4 Ко ашэла найабуримаско, сар кадэва бэято, во и авэла само баро андо небесно Царство. 5 И ко шол сама* кацавэ бэятос ради мандэ*, шол сама и ман. 6 Ай важ кодэва, через кастэ змардёла ек анда кадэла прости мануша*, савэ патян андэр мандэ, авелоп фэдэр, если тэ амблавэн лэсти пэ кор баро бар* и тэ шон лэс тэ тасол андэ бари моря.
7 Бида кадэла люмати, важ кода кай вой подмарэл лэ манушэн каринг о бэзэх! Чаче, вся и время авэла тэ появийпэ варисо, со подмарэл лэ манушэн каринг о бэзэх, но бида кодэлэсти, через кастэ када терэлпэ. 8 Если тиро вас или пэрно цырдэл тут каринг о бэзэх, отшын лэс и вишув. Фэдэр ту ашэсапэ би вастэнго или би пэрнэнго, но лэса тэ жувэс, чем дуе вастэнца или дуе пэрнэнца ту попэрэса андэ вечно яг. 9 И если тири як цырдэл тут каринг о бэзэх, вишын ла и вишув. Фэдэр ту ашэсапэ би яқако, но лэса тэ жувэс, чем дуе яқэнца тэ попэрэс андэ гее́на. 10 Диқэн, на́ вэрыцын ни еқэс анда кадэла прости мануша, важ кода кай, ԥэнав тумэнди, лэндирэ анӷелоря по небо вся и время диқэн мэрнэ небеснонэ Дадэс*. 11 ——*
12 Сар тумэ гиндон, если кай о мануш авэла 100 бакрэ и ек андар лэндэ одмардёла лэ стадостар, хэба во на ашавэла 99 бакрэн андэ плая и на жала тэ родэл кодэлэ бакрэс, саво хасарделя? 13 И если во виарақэла лэс, тоди, патян, во авэла лошало лэсти май фартэ, чем кодэлэнди 99, савэ на хасарделэ. 14 Кадя и мэрно* небесно Дад на камэл, кай тэ хындёл дажэ ек анда кадэла прости мануша.
15 Если тиро ԥрал стерэла бэзэх против тутэ, жа и подэ дума кати лэса пала кода, со во стердя най кадя*. Если во приашундёла каринг тутэ, тоди ту поможысардян тирэ ԥралэсти*. 16 Ай если на приашундёла, лэ пэса инке еқэс или дуен, кай и дила тэ потвердин дуй или трин мануша*. 17 Если во на приашундёла каринг лэндэ, ԥэн лэ ӷуртости*. Ай если во на приашундёла и каринг о ӷурто, мэк во авэл важ тутэ сар мануш анда авэр народо или сар мануш анда налоӷово.
18 Чаче ԥэнав тумэнди: вся, со тумэ сԥандэна пэ ԥув, ужэ авэла сԥангло по небо, и вся, со тумэ росԥандэна пэ ԥув, ужэ авэла росԥангло по небо. 19 И инке ԥэнав тумэнди: если дуй андар тумэндэ пэ ԥув доԥэндёна тэ мангэнпэ пала варисо важно, мэрно небесно Дад стерэла када важ лэндэ. 20 Важ кода кай котэ, кай дуй или трин стидэ́пэ важ мэрно алав, и мэ авава машкар лэндэ».
21 Посли када каринг лэстэ поджыля о Пётро и пушля: «Учителё, скати мэ трэбуй тэ простисарав мэрнэ ԥралэс, если во терэл бэзэх против мандэ? Семь раз?» 22 О Исусо ԥэндя лэсти: «Ԥэнав тути: най семь раз, ай 77 раз*.
23 Важ кода кай о небесно Царство можно тэ сыстос лэ царёса, саво приԥэндя, кай лэстирэ раборя тэ отдэн лэсти о вужылимос. 24 Кала во ля тэ стидэл о вужылимос, каринг лэстэ андэ́ лэ манушэс, саво завужылисайля лэсти 10 000 таланторя*. 25 Но лэсти найсоса сас тэ випотинэл, и важ када о царё приԥэндя тэ битинэн лэс, лэстиря хулая́ и лэстирэ бэятонэн, ай кадяжэ вся лэско мищимос и тэ випотинэн о вужылимос. 26 Тоди кадэва рабо пэля пэ чанга и ля фартэ тэ мангэл лэс: „Поаштяр набут, и мэ отдава тути вся о вужылимос!“ 27 Лэ царёсти ашэля жалко лэ рабос, во одмэкля лэс и простисардя лэсти вся о вужылимос. 28 Ай кадэва рабо вижыля лэстар, виарақля лэ рабос, саво сас вужылэ лэсти 100 дина́рии*, хутилдя лэс коратар и ля тэ тасавэл и тэ ԥэнэн лэсти: „Отдэ манди вся о вужылимос!“ 29 Тоди кодэва рабо пэля пэ чанга и ля тэ мангэл лэс: „Поаштяр набут, и мэ тути вся отдава!“ 30 Но о пэрво рабо на закамля тэ аштярэл, ай приԥэндя тэ шон кадэлэ рабос андо баруно и тэ ритярэн котэ, пока во на отдэла о вужылимос. 31 Кала авэр раборя додиқлэ, со тердяпэ, лэнди ашэля кадэлэстар фартэ найдраго по ди. Вонэ жылэ каринг о царё и пала вся росԥэндэ лэсти. 32 Тоди о царё ақардя кодэлэ рабос и ԥэндя: „Найлашо рабо, кала ту мангэсас ман, мэ простисардэм тути вся о вужылимос. 33 Хэба ту на трэбуй сас тэ авэс одяло каринг тиро амал*, кадя жэ сар мэ сымас одяло каринг тутэ?“ 34 И о царё холяйля и ԥэндя тэ шон лэс андо баруно и тэ ритярэн лэс котэ, пока во на отдэла вся о вужылимос. 35 Кадя и мэрно небесно Дад обжалапэ тумэнца, если тумэ на лэна анда ди тэ простин пэстирэ ԥралэн».