Марко

13 Кала о Исусо вижалас анда қандири, ек ученико зацыписайля: «Учителё, дик, савэ бара и савэ здании!» 2 Но о Исусо ԥэндя лэсти: «Диқэс кадэла барэ здании? Катэ на ашэлапэ бар пэ барэстэ, вся авэла розмардо».

3 Кала во бэшэлас по Масли́чно плай, катар дицолас и қандири, о Пётро, о Иа́ково, о Иоа́но и о Андрий пашэлэ каринг лэстэ и пушлэ: 4 «Ԥэн амэнди, кала када авэла и со сыкавэла, кай всаворэсти кадэлэсти пашон и послидни деса?» 5 О Исусо ԥэндя лэнди: «Диқэн, кай тумэн тэ на обдилярэн. 6 Бут ко авэла мэрнэ алавэстар и лэла тэ ԥэнэн: „Када мэ“, и бутэн обдилярэна. 7 И кала тумэ ашунэна, кай андэ разни краёря жал маримос*, на́ даран. Вся када трэбуй тэ терэлпэ, но када инке на сыкавэл, кай и время пашэля.

8 Ек народо жала войнаса пэ авэр народо, и о царство — пэ авэр царство. Андэ разни краёря лэла тэ тинойпэ и ԥув*, кадяжэ авэла боқалимос. Када сыкавэл, кай и ԥари время кати залэлпэ*.

9 Ай тумэ авэн ӷотови. Тумэн лэна тэ отдэн андо сындо, тэ марэн андэ синагоги и через мэрно алав андярэна каринг и правителя и каринг и царёря, кай вонэ тэ ашунэн пала мандэ. 10 Кадяжэ всаворэ народоря спэрва трэбуй тэ ашунэн и лащи новость. 11 Кала тумэн астарэна и андярэна каринг и барэ мануша, не пережывайте май англал пала кода, со тэ ԥэнэн. Дэн дума кода, со тумэнди авэла по гиндо андэ кодэва часо, важ кода кай най тумэ лэна тэ дэн дума, ай о свынто зор. 12 О ԥрал отдэла пэ смэрть пэстирэ ԥралэс, и о дад — пэстирэ бэятос. И бэяцэ жана против пэстирэ родителя и отдэна лэн пэ смэрть. 13 Всаворэ лэна тумэн тэ вэрыцын через мэрно алав. Но кодэва, ко вся виритярэла, спасыяпэ.

14 Кала тумэ додиқэна, кай о гряцымос, саво анэн шушымос, тердёл котэ, кай лэсти на трэбуй тэ авэл (мэк кодэва, ко адиной*, росполэл када), тоди кодэла, ко андэ Иуде́я, мэк нашэн андэ плая. 15 Кодэва, ко пэ крыша, на трэбуй тэ змэкэлпэ и тэ зажал андо цэр, кай тэ лэл варисо котар. 16 И кодэва, ко андэ мал, на трэбуй тэ рийпэ пала пэстири жылетка. 17 Сар дэ ԥарэс авэла андэ кодэла деса лэ жувлянди, савэ аштярэн бэятос, и лэ манушнянди, савэ праварэн лэ колинэса! 18 Мангэнпэ, кай када тэ на авэл ӥвэндэ. 19 Важ кода кай андэ кодэла деса авэла кацави бида, сави на сас кодэла времятар, сар о Дэл создал и люма, жы кай амарэ деса и будэр никала на авэла. 20 И если о Иегова* на скуртярэла кодэла деса*, тоди нико на спасыяпэ. Но важ пэстирэ избрани во скуртярэла кодэла деса.

21 Если тумэнди андэ кодэя время ԥэнэна: „О Христос катэ!“ или „Во котэ!“ — на́ патян. 22 Важ кода кай появинапэ хохавнэ мануша, савэ ԥэнэна пэр пэстэ лэ Христоско алав, ай кадяжэ хохавнэ мануша, савэ притерэнапэ лэ Дэвлэстирэ. Вонэ лэна тэ терэн барэ чудеса, кай тэ обдилярэн лэ Дэвлэстирэ манушэн, савэн во витидя. 23 Кочай авэн осторожни. Мэ ԥэндэм тумэнди пала вся када май данглал.

24 Андэ кодэла деса, посли кодэя бида, о қам тэмноя и о шон парашэла тэ светий, 25 упрал* пэрэна и черӷая и о небо затинояпэ. 26 И тоди о миро додиқэла лэ манушэстирэ Шавэс, саво жал па тучи. Лэнди дицола, саво дэ баро зор лэстэ и сави дэ бари бах лэстар марэл. 27 Во бишалэла лэ анӷелонэн и стидэла кодэлэн, кас витидя, па штар ла люматирэ краёря, ла ԥувьятар жы каринг о небо*.

28 Например, погиндон пала инжырово витка. Кала пэ латирэ тэрнорэ и ковлорэ виточки розмэкэнпэ и листоря, тумэ полэн, кай ӥто авэла о милай. 29 Точно кадя жэ, кала тумэ диқэна, кай вся када терэлпэ, ӷанэн, кай лэ манушэско Шаво пашэ, паша вудара. 30 Чаче ԥэнав тумэнди: на прожала кадэлэ манушэндири время*, сар вся када авэла. 31 О небо и ԥув на ашэнапэ, но мэрнэ алава ашэнапэ.

32 Нико на ӷанэн, кала авэла кадэва дес и часо: ни ек анӷело по небо, ни о Шаво — када ӷанэн ек о Дад. 33 Диқэн, отшон и линдра, важ кода кай на ӷанэн, кала поджала кадэя время. 34 Када можно тэ сыстос кодэлэса, кай о мануш, кала лагля андэ авэр страна, ашадя о цэр пэ раборя и дя кажнонэсти андар лэндэ пэстири дила, ай лэ манушэсти, саво сторожый и вороты, приԥэндя тэ на совэл. 35 Ни акэ, отшон и линдра, важ кода кай на ӷанэн, кала рияпэ лэ цэрэско хулай: вечером, андэ епаш рят* или рано тэсара, 36 кай во, кала авэла неожыдано, тэ на заастарэл тумэн сутэн. 37 Ԥэнав най кати тумэнди, ԥэнав всаворэнди: отшон и линдра».