Лука
10 Посли када о Исусо* витидя инке 70 учениконэн и бишалдя лэн май англал пэстар по дуй андэ фороря и андэ гава, андэ савэ тидэласпэ тэ жал екжэно. 2 Во ԥэндя лэнди: «Пэ мал баро урожаё, ай лэ бутярнэн тэ стидэн лэс на хутилэл. Важ када мангэн ла малятирэ Хулас тэ бишалэл май бутэ манушэн тэ стидэн о урожаё. 3 Ни акэ, жан, но фэринпэ: мэ бишалав тумэн, сар бакрорэн каринг и рува. 4 На́ лэн пэса ни тышыла, ни сумка, ни сандали и па дром никаса на́ залэн и дума*. 5 Кала зажана андо цэр, спэрва ԥэнэн: „Тэ авэл лашымос андэ кадэва цэр“. 6 И если котэ авэла мануш, саво цырдэлпэ каринг и мирно жызня, тоди тумаро лашымос ашэлапэ лэстэ, ай если най — рияпэ тумэнди. 7 Ашэнпэ андэ кодэва цэр, хан и пэн, со тумэнди стона, важ кода кай лэ бутярнэсти трэбуй тэ потинэн. На́ ужан андэ авэр цэр*.
8 Если тумэ авэна андэ варисаво форо и котэ тумэн шона сама*, хан, со тумэнди стона, 9 исцэлин лэ насвалэн и ԥэнэн: „Лэ Дэвлэско Царство ашэля май пашэ каринг тумэндэ“. 10 Но если тумэ авэна андо форо и котэ тумэн на шона сама*, вижан пэ ӷлавни вулицы и ԥэнэн: 11 „Амэ стиносарас дажэ тумарэ фороско прахо, саво прилеписайля каринг амарэ пэрнэ. Но ӷанэн, кай лэ Дэвлэско Царство ашэля май пашэ“. 12 Ԥэнав тумэнди, важ о Садо́мо авэла май вушэро тэ виритярэл андэ кодэва дес, чем важ кадэва форо.
13 Бида тути, Харази́но! Бида тути, Вифсаи́да! Важ кода кай тэ стердопэ андо Ти́ро и Сидо́но и чудеса, савэ сас стердэ тумэндэ, тоди и мануша котэ дэлмут каисайлоп, цырдоп пэр пэстэ травурно ӥда* и бэшлоп андо пепло. 14 Кочай важ о Ти́ро и важ о Сидо́но авэла май вушэро тэ виритярэн, кала жала о сындо, чем важ тумэндэ. 15 И ту, Капернау́мо, хэба ваздэсапэ жы каринг о небо? Ту жаса андэ ԥув*!
16 Ко ашунэл тумэн, ашунэл и ман. Ко отԥэндёл тумэндар, отԥэндёл и мандар. Ай ко отԥэндёл мандар, отԥэндёл и кодэлэстар, ко ман бишалдя».
17 Ӷэт май интя рисайлэ и 70 ученикоря, вонэ сас лошалэ и ԥэндэ: «Учителё*, дажэ и найвужэ кандэн амэн, кала амэ ԥэнас тиро алав». 18 Во ԥэндя: «Мэ диқлэм, кай о Сатана сар молния пэля па небо. 19 Мэ дэм тумэнди право тэ топчин лэ сапэн и лэ скарпиононэн и тэ жан против лэ вороӷоско зор, и нисо не сможэт тэ стерэл тумэнди вэрыто. 20 Но лошавэн най кодэлэсти, кай тумэн кандэн и найвужэ, ай кодэлэсти, кай тумарэ алава запистромэ по небо». 21 Андэ кадэва жэ маменто о свынто зор дя лэ Исусости бари лош, и во ԥэндя: «Дадэ, лэ небоско и ла ԥувьяко Хулай, тэ авэс ту ашунгло* англа всаворэ, важ кода кай ту гарадян када кодэлэндар, ко годявэрно и ӷрамотно, и дян тэ полэн лэ цынёне бэятонэнди! Чаче, Дадэ, акэ када сас тути уӷодно. 22 Мэрно Дад пэрэдя манди вся, и нико на ӷанэн лэ Шавэс — лэс ӷанэн ек о Дад, и нико на ӷанэн лэ Дадэс — лэс ӷанэн ек о Шаво и кати кодэла, касти о Шаво камэл тэ росԥэнэн* о чачимос пала Дад».
23 Потом о Исусо ԥэндя лэ учениконэнди, кала вонэ сас екжэнэ: «Бахталэ кодэла, ко диқэл кода, со диқэн тумэ. 24 Ԥэнав тумэнди: бут лэ Дэвлэстирэ особи мануша и бут царёря камэнас тэ диқэн кода, со диқэн тумэ, но на диқлэ и тэ ашунэн кода, со ашунэн тумэ, но на ашундэ».
25 Ек законико ущеля и, кай тэ астарэл лэс по алав, пушля: «Учителё, со манди трэбуй тэ терав, кай тэ жував вечно?» 26 О Исусо пушля лэстар: «Со пистромэ андо законо? Сар ту када полэс?» 27 Кодэва мануш ԥэндя: «„Любин тумарэ Дэвлэс лэ Иеговас* всаворэ́ одеса, всаворя жызняса, всаворэ́ зорэса и всаворя годяса“ и „лэ манушэн, сар корко пэс“». 28 О Исусо ԥэндя лэсти: «Ту правильно ԥэндян. Тер кадя, и ту лэса вечно тэ жувэс».
29 Но кадэва мануш камля тэ сыкавэл, саво во дэ правильно, кочай пушля лэстар: «Ай савэ манушэн мэ трэбуй тэ любисарав?» 30 Пэ када о Исусо ԥэндя: «Ек мануш жалас анда Иерусалимо андо Ерихо́но, и пэр лэстэ динэ и чордэӷаря. Вонэ опчордэ лэс, фартэ мардэ и ужылэ. 31 Кадя вижыля, кай па кодэва жэ дром жалас рашай. Но во, кала додиқля кодэлэ манушэс, прожыля мимо па авэр лэ дромостири риг. 32 Точно кадя жэ тердя и о левито: кала во дожыля жы каринг кодэва ҭан и додиқля кодэлэ манушэс, во прожыля мимо па авэр лэ дромостири риг. 33 Ай ек самаритя́нино, кала жалас кодэлэ жэ дромэса, додиқля лэс, и лэсти ашэля лэс жалко. 34 Кадэва самаритя́нино поджыля каринг лэстэ, прохаладя лэстирэ раны лэ виноса, обмақля вулееса и пэрэԥангля лэн. Посли када во стодя лэс пэ пэско ишако, андя андэ ӷостиница и позаботисайля пала лэстэ. 35 Пэ авэр дес во дя лэ хуласти пэ ӷостиница дуй дина́рии* и ԥэндя: „Дик пала лэстэ. Ай если тратиса май бут, мэ потинава тути, кала рисавава“. 36 Сар ту гиндос, ко анда кадэла трин мануша сыкадя, кай любий кодэлэс, ко попэля андэ вас лэ чордэӷаренди?» 37 Пэ када во ԥэндя: «Кодэва, ко сас одяло каринг лэстэ». О Исусо ԥэндя лэсти: «Жа и тер кадя жэ».
38 О Исусо лэ учениконэнца жыля май дур и авеля андэ ек гав. Котэ ек манушни, савя ақарэнас Ма́рфа, ақардя лэс пэстэ цэрэ. 39 Латэ сас ԥэй Мария. Вой бэшля паша лэ Учителёстирэ* пэрнэ и ля лэс тэ ашунэл. 40 Ай и Ма́рфа вся сас андэ дилатэ. Вой поджыля каринг лэстэ и ԥэндя: «Учителё*, хэба тути всаек, кай мэрни ԥэй ашадя пэр мандэ вся и дила? Ԥэн лати тэ дэл манди зор». 41 О Исусо* ԥэндя лати: «Ма́рфо, Ма́рфо, ту пережываеш и заботиспэ пала бут. 42 Ай амэнди бут на трэбуй, хутила варисо ек. И Мария витидя со май лашо, и латар када нико на одлэла».