1 Тимафеё

3 Чаче ԥэндо: ко пристол зор, кай тэ ашэл барэдэр ԥрал*, во цырдэлпэ каринг и лащи дила. 2 Акэ саво трэбуй тэ авэл о барэдэр ԥрал*. Пала лэстэ нинай нисави дош, лэстэ кати ек хулаи, во андэ вся ӷанэн мера, здраво* гиндой, лэстэ порядко андэ вся, во шол сама аврэн* и ӷанэн тэ сытярэл. 3 Во най матимари, на марэл аврэн, но во устожливо*, на ӷулел андо скандало и на здрал пала ловэ. 4 Во лашо хулай андэ пэско ери, лэстэ кандинэ и сытярдэ бэяцэ. 5 (Важ кода кай если мануш на ӷанэн тэ диқэл пала пэско ери, тоди сар во лэла тэ заботийпэ пала лэ Дэвлэско ӷурто*?) 6 Во най кодэва мануш, саво кати болделя, кай тэ на запутёл и кай лэсти тэ на виандярэн кацаво жэ приӷоворо, сар лэ Бэнгэсти. 7 Ай инке пала лэстэ драго дэн дума кодэла, ко най анда амари вера*, тоди лэс нико на лажаварэла* и лэс на змарэла* о Бэнг.

8 Акэ савэ трэбуй тэ авэн и помошникоря андо ӷурто. Вонэ андярэн пэс пативалэс*, вонэ найдвухлични*, на пэрэпэн, найчорымастирэ, кай тэ лэн и ловэ диляримаса, 9 но вонэ вужэ одеса* ритярдёнпэ пала кода, андэр со патян, — пала свынто тайна.

10 Спэрва трэбуй тэ диқэн, поджан вонэ важ кадэя дила чи най, и, если пала лэндэ нинай дош, мэк терэн ла.

11 И манушня трэбуй тэ андярэн пэс пативалэс*, тэ на андярэн и хохавни дума пэ авэр, андэ вся тэ ӷанэн мера, ай кадяжэ тэ авэн кандинэ.

12 Кай о помошнико андо ӷурто трэбуй тэ авэл ек хулаи, и во трэбуй тэ авэл лашо хулай пэ пэстирэ бэяцэ и пэ вся ери. 13 Важ кода кай кодэла, ко драго терэл пэстири дила, затерэн пэсти лашо алав и моӷут би дарако тэ ԥэнэн, кай вонэ патян андо Христос Исусо.

14 Мэ надеисавав, кай ӥто авава каринг тутэ, но всаек пистросарав тути, 15 если прижалапэ тэ заритярдював. Тоди ту лэса тэ ӷанэс, сар тэ андярэс пэс андэ лэ Дэвлэско цэр — када лэ жундэ Дэвлэско ӷурто, саво подритярэл и фэрий о чачимос. 16 Чаче, фартэ важно тэ шас сама пэ свынто тайна, сави поможый тэ стас бари патив по Дэл: «Во* ашэля манушэса; лэс прижанглэ найдошалэса, кала во ашэля анӷелоса; сыкаделя лэ анӷелонэнди; пала лэстэ сас росԥэндо машкар и народоря; андэр лэстэ патяе и мануша андэ люма; во сас залино по небо и ашэля ашунгло».