Иоано

6 Посли када о Исусо лагля пэ авэр береӷо андэ Галилейско моря, пэ сави кадяжэ ԥэнэнас Тивериа́цко. 2 Пала лэстэ ԥирэнас бут мануша, важ кода кай вонэ диқэнас, сар во исцэлияс лэ насвалэн. 3 О Исусо вазгляпэ по плай и бэшля котэ пэстирэ учениконэнца. 4 Када сас время, кала пашолас о иудейско празнико Патради. 5 Кала о Исусо додиқля, кай каринг лэстэ жан бут мануша, во пушля кай о Фили́по: «Кай амэнди тэ тинас марно, кай лэн тэ праварас?» 6 Во ӷанэнас, со лэла тэ терэл, но пушля када, кай тэ диқэл, сар о Фили́по андярэла пэс. 7 О Фили́по ԥэндя лэсти: «Дажэ если тэ тинэс марно пэ 200 дина́рии*, када на хутилэла, кай кажнонэсти тэ дорэсэлпэ хоть набут». 8 Авэр лэско ученико, о Андрий, лэ Симаноско лэ Петроско ԥрал, ԥэндя лэсти: 9 «Катэ кай ек бэято исин панч ячмени марнэ и дуй маще. Но хэба када хутила важ скати мануша?»

10 О Исусо ԥэндя: «Мэк всаворэ бэшэн». Котэ сас бут чар, и о миро бэшля пэ ԥув. Ек и мурш машкар лэндэ сас варикай 5 000. 11 О Исусо ля о марно, поблаӷодарисардя лэ Дэвлэс и роздя лэс лэ манушэнди; кода жэ во стердя и лэ мащеса, и кажно получисардя, скати камля. 12 Ай кала и мануша чалелэ, во мангля лэ учениконэн: «Стидэн вся, со ашэляпэ, кай нисо тэ на хындёл». 13 Вонэ стидэ́ и котора, савэ ашэлэпэ лэ панчже марнэндар, и вижылэ 12 ԥэрди корзины.

14 Кала и мануша диқлэ, сави чуда стердя о Исусо, вонэ линэ тэ ԥэнэн: «Када чаче кодэва лэ Дэвлэско особо мануш, саво трэбуй сас тэ авэл андэ люма». 15 Ай о Исусо ӷанэнас, кай вонэ камэн тэ заставин лэс тэ ашэл лэнго царё, и важ када упалэ ужыля по плай, кай тэ авэл екжэно.

16 Вечером и ученикоря змэклэпэ каринг и моря, 17 бэшлэ андэ лодка и лаглэ пэ авэр ла морятири риг, андо Капернау́мо. (Ужэ тэмносайля, ай о Исусо инке на рисайля.) 18 Андэ кодэя время вазгляпэ бари балвал, ай и моря ля тэ бурлий и тэ пенийпэ. 19 Вонэ проплывисардэ ужэ панч чи шов километроря*, кала додиқлэ лэ Исусос, саво жалас па моря каринг и лодка, и пэрэдарайлэ. 20 Во ԥэндя лэнди: «На́ даран! Када мэ». 21 Тоди вонэ сас ради тэ лэн лэс андэ лодка и ӥто авелэ кай о береӷо, каринг саво плывинас.

22 Пэ авэр дес о миро, саво ашэлясаспэ пэ кодэя ла морятири риг, додиқля, кай паша береӷо будэр нинай ни ек лодка. Май англал котэ сас найбари лодка, но о Исусо на лагля пэр латэ. Лэстирэ ученикоря уплывисардэ би лэско. 23 Андэ кодэя жэ время авелэ лодки анда Тивериа́да. Вонэ терделэ найдур кодэлэ ҭанэстар, кай о миро халя о марно, посли кода сар о Исусо* поблаӷодарисардя лэ Дэвлэс. 24 Кала и мануша додиқлэ, кай нинай ни лэ Исусос, ни лэстирэ учениконэн, вонэ бэшлэ андэ кадэла лодки и лаглэ андо Капернау́мо тэ родэн лэ Исусос.

25 Вонэ виарақлэ лэс пэ авэр ла моряко береӷо и пушлэ: «Учителё*, кала ту кардэ авелян?» 26 О Исусо ԥэндя: «Чаче ԥэнав тумэнди: тумэ родэн ман най важ кода, кай диқлэ и чудеса, ай важ кода, кай халэ о марно и чалелэ. 27 Стон о зор най важ о хамос, саво римойпэ, ай важ о хамос, саво на римойпэ и саво анэн вечно жызня. Кацаво хамос дэл тумэнди лэ манушэско Шаво, важ кода кай о Дад, о Дэл, дя лэсти пэ када право*».

28 Тоди вонэ пушлэ лэстар: «Со амэнди тэ терас, кай тэ авас уӷодни лэ Дэвлэсти?» 29 О Исусо ԥэндя: «О Дэл камэл, кай тумэ тэ патян андэ кодэва, кас во бишалдя». 30 Ай вонэ ԥэндэ лэсти: «Сави чуда ту сыкавэса, кай амэ тути тэ патяс? Со ту стерэса? 31 Например, амарэ папоря ханас и ма́на андэ пустыня. Андэ Свынти Лила пистромэ: „Во дя лэнди марно па небо“». 32 О Исусо ԥэндя: «Чаче ԥэнав тумэнди: о Маисеё на дя тумэнди чачуно марно па небо. Но акана лэс дэл тумэнди мэрно Дад. 33 Важ кода кай лэ Дэвлэско марно — када кодэва, ко змэкэлпэ па небо и дэл ла люмати и жызня». 34 Пэ када вонэ ԥэндэ: «Учителё*, вся и время дэ амэнди кадэва марно».

35 О Исусо ԥэндя лэнди: «Мэ — ла жызняко марно. Кодэва, ко авэл каринг мандэ, никала на авэла боқало, и кодэва, ко патял андэр мандэ, никала на закамэла тэ пэл. 36 Но, сар мэ тумэнди ужэ ԥэнавас, тумэ, хоть и диқэн ман, всаек на патян. 37 Всаворэ, кас дэл манди о Дад, авэна каринг мандэ, и мэ никала на видаравава кодэлэс, ко авэл каринг мандэ. 38 Важ кода кай мэ змэклэмпэ па небо, кай тэ терав най кода, со уӷодно манди, ай кода, со уӷодно кодэлэсти, ко бишалдя ман. 39 И лэсти уӷодно, кай мэ тэ на хасарав ни еқэс анда кодэла, кас во манди дя, но тэ жундярав лэн андо послиднё дес. 40 Мэрнэ Дадэсти уӷодно, кай кажно, ко прижанэн лэ Шавэс и патял андэр лэстэ, тэ жувэл вечно, и мэ жундярава лэс андо послиднё дес».

41 Тоди и иудеёря линэ тэ холявэн, кай во ԥэндя: «Мэ — марно, саво змэкляпэ па небо». 42 Вонэ ԥэнэнас: «Хэба када най о Исусо, лэ Иосифоско шаво? Амэ жэ ӷанас лэстирэ дадэс и лэстиря да. Сар во можэт тэ ԥэнэн: „Мэ змэклэмпэ па небо“?» 43 Тоди о Исусо ԥэндя: «Парашэн тэ холявэн. 44 Нико не можэт тэ авэл каринг мандэ, если о Дад, саво ман бишалдя, на пашарэла лэс каринг мандэ, и мэ жундярава лэс андо послиднё дес. 45 Лэ Дэвлэстирэ особи мануша пистросардэ: „Лэн всаворэн лэла тэ сытярэл о Иегова*“. Кажно, ко ашунэл лэ Дадэс и сытёл лэстар, авэл каринг мандэ. 46 Када на сыкавэл, кай варико анда мануша диқля лэ Дадэс. Лэ Дадэс диқля кати кодэва, ко лэ Дэвлэстар. 47 Патян: кодэва, ко патял, лэла вечно тэ жувэл.

48 Мэ — ла жызняко марно. 49 Хоть тумарэ папоря и ханас и ма́на андэ пустыня, вонэ всаек мулинэ. 50 Ай кажно, ко хал о марно, саво змэкэлпэ па небо, на мэрэла. 51 Мэ — жундо марно, саво змэкляпэ па небо. Кодэва, ко хал кадэва марно, лэла тэ жувэл вечно. Кадэва марно — мэрни тила, сави мэ отдава, кай и люма тэ жувэл».

52 Тоди и иудеёря линэ тэ споринпэ ек еқэса. Вонэ ԥэнэнас: «Сар кадэва мануш можэт тэ дэл амэнди тэ хас лэстири тила?» 53 Пэ када о Исусо ԥэндя лэнди: «Патян манди: если тумэ на хан лэ манушэстирэ Шавэстири тила и на пэн лэско рат, тоди тумэнди на дорэсэлапэ жызня*. 54 Кодэва, ко хал мэрни тила и пэл мэрно рат, лэла вечно тэ жувэл, и мэ жундярава лэс андо послиднё дес. 55 Важ кода кай мэрни тила — када чачуно хамос и мэрно рат — чачуно пимос. 56 Кодэва, ко хал мэрни тила и пэл мэрно рат, — лэстэ ек гиндо манца, ай мандэ ек гиндо лэса. 57 Сар мэ жував через о Дад, саво жундо и саво бишалдя ман, кадя и кодэва, ко хал мэрни тила, лэла тэ жувэл через мандэ. 58 Акэ о марно, саво змэкляпэ па небо. Во най кацаво, саво ханас тумарэ папоря — ханас и всаек мулинэ. Кодэва, ко хал кадэва марно, лэла тэ жувэл вечно». 59 Во ԥэндя када, кала сытярэлас андэ синагога* андо Капернау́мо.

60 Кала бут анда лэстирэ ученикоря ашундэ кадэла алава, вонэ ԥэндэ: «Када баро дело! Сар кацаво можно тэ ашунас?» 61 О Исусо ӷанэнас, кай лэстирэ ученикоря холяйлэ пэ када, и ԥэндя лэнди: «Чаче када тумэн кадя холярдя? 62 Ай со, если тумэ диқэна, кай лэ манушэско Шаво ваздэлпэ интя, кай сас май англал? 63 Кати о свынто зор дэл и жызня, екжэнэ и мануша не моӷут ла тэ затерэн*. И алава, савэ мэ тумэнди ԥэнавас, жан лэ свынтонэ зорэстар и дэн и жызня. 64 Но машкар тумэндэ исин кодэла, ко на патял». (Важ кода кай о Исусо сразу ӷанэнас, ко андэр лэстэ на патял и ко лэс придэла.) 65 Инке во ԥэндя: «Акэ васо мэ ԥэнавас тумэнди: нико не сможэт тэ авэл каринг мандэ, если лэсти на домэкэла о Дад».

66 Посли када бут лэ Исусостирэ ученикоря рисайлэ каринг пэстири обычно дила и будэр на ԥирэнас лэса. 67 О Исусо пушля кай и 12 апосталоря: «Можэт, тумэ тожэ камэн тэ ужан?» 68 О Си́мано Пётро ԥэндя лэсти: «Учителё*, кастэ амэ тэ жас? Тирэ алава дэн вечно жызня. 69 И амэ патяям и ӷанас, кай ту — Свынто, кодэва, кас бишалдя о Дэл». 70 О Исусо ԥэндя лэнди: «Хэба най мэ витидэм тумэн, всаворэн 12? Но ек андар тумэндэ — хохавно*». 71 Во ԥэнэнас пала Иу́да, пала лэ Симаноско лэ Искариотоско шаво, саво, хоть и сас ек анда 12 апосталоря, ӷэт май интя придя лэс.