2 Каринфо

11 Через кода, со мэ камав тэ ԥэнав, тумэнди можэт тэ здэлпэ, кай мэ диляйлэм, но манди камлопэ, кай тумэ набут тэ потэрпин ман. Чаче тэ ԥэнав, тумэ и кадя тэрпин ман. 2 Мэ тиносавав пала тумэндэ, сар када уӷодно лэ Дэвлэсти. Мэ солахадэм, кай отдава тумэн пала Христос, и камав тэ отдав тумэн вужэн сар щяко шэро. 3 Но пережываю, кай тумэнца тэ на терэлпэ кода жэ, со ла Еваса, савя хытрияса опхохадя о сап. Кадяжэ мэ дарав, кай тумаро гиндо тэ на римойпэ и тумэ тэ на дурён кодэлэстар, кай всаворэ́ одеса тэ андярэн и вужи жызня, сави аштярэл тумэндар о Христос. 4 Важ кода кай кала тумэнди росԥэнэн най пала кодэва Исусо, пала саво росԥэнасас амэ, или кала тумэндэ най кацаво гиндо, саво щас исин амэндэ, или кала тумэнди росԥэнэн най кодэя лащи новость, сави тумэ уӷанглэ, тумэ нисо на терэн кацавэ манушэнца. 5 Но мэ гиндосарав, кай мэ ни андэр со най май хужэ тумарэ «ашунглэ» апосталонэндар. 6 И дажэ если мандэ на вижал шукарнэс тэ дав дума, мэ уж точно бут со ӷанав. Када амэ тумэнди доԥэндям найеқвар и сар кати на сыкадям пэ дила.

7 Мэ росԥэндэм тумэнди и лащи новость и нисо на манглэм тумэндар пала када. Мэ тэляравас пэс, кай тумэ тэ ашэн ашунглэ. Хэба мэ стердэм бэзэх кадэлэса? 8 Лэ ԥралэндар анда авэр лэ Дэвлэстирэ ӷурторя мэ прилавас помощь, можно тэ ԥэнас одлавас лэндар, кай тэ поможысарав тумэнди. 9 Но кала мэ сымас тумэндэ и манди на хутилэнас ловэ, мэ ни важ кастэ на сымас покута, важ кода кай пала мандэ позаботисайлэ и ԥрала, савэ авелэ анда Македо́ния, кала динэ манди дажэ май бут, чем трэбуй. Мэ старысававас нисар тэ на терав тумэнди ԥарэс и май англэ лава кадя тэ терав. 10 И мэ на парашав тэ путював кадэлэса андэ Ахайски области — када кацаво жэ чачимос, сар и кода, кай мэ андярав лэ Христостири время. 11 Васо мэ кадя терав? Важ кода кай на любисарав тумэн? О Дэл ӷанэн, кай любисарав.

12 Но дэсавэ мануша путён и старыинпэ тэ доԥэнэн, кай вонэ сыста амэнца. Важ када мэ лава тэ терав кадя, сар теравас, кай вонэ будэр тэ на путён пэстиря диласа. 13 Кацавэ мануша — хохавнэ апосталоря, савэ обдилярэн аврэн, кала видэн пэс сар лэ Христостирэ апосталоря. 14 И амэнди найԥарэс када тэ полас, важ кода кай екжэно о Сатана видэл пэс сар лашо* анӷело. 15 Важ када амэ на удивисавас, кай лэстирэ мануша* видэн пэс сар кодэла, ко терэл правильно дила. Но потом лэнди дорэсэлапэ кода, со вонэ затердэ.

16 Ԥэнава инке еқвар: на́ гиндон, кай мэ найгодявэрно. Но дажэ если тумэнди здэлпэ, кай мэ диляйлэм, всаек потэрпин ман, кай и мэ набут тэ путював. 17 Со ԥэнав, мэ ԥэнав най кадя, сар када стердоп о Баро Хулай, ай сар найгодявэрно, саво путяримаса фартэ патял андэр пэстэ. 18 Бут путён кодэлэса, соса обычно путён андэ кадэя люма, важ када и мэ лава тэ путював кадэлэса. 19 Тумэ кацавэ «годявэрнэ», кай камэн тэ тэрпин лэ найгодявэрнэн. 20 Тумэ тэрпин дажэ кодэлэн, ко лэлпэ хуласа пэр тумэндэ, одлэл тумаро мищимос, опчорэл тумэн, тэлярэл и марэл тумэн пар мостэ.

21 Амэнди лажаво када тэ ԥэнас, важ кода кай можэт тэ здэлпэ, кай амэ набут придарас.

Но если варико на дарал тэ путёл, тоди на дарав тэ путював и мэ, дажэ если дэсавэ гиндона, кай мэ диляйлэм. 22 Вонэ евреёря? Мэ тожэ. Вонэ израильтя́норя? Мэ тожэ. Вонэ анда лэ Авраамоско колено? Мэ тожэ. 23 Вонэ андярэн лэ Христостири время?* Ԥэнав сар дило: мэ домарделэм инке май бут, чем вонэ. Мэ май бут теравас дила, май часто сымас андо баруно, бут разоря ман марэнас, най еқвар мэ чуть на хынделэм. 24 Панчвар сас, кала и иудеёря мардэ ман по 39 раз, 25 тривар ман шындярэнас лозынкэнца, еқвар ман мардэ барэнца, тривар мэ пэрэжудэм, кала розмарделя о кораблё, сутка проандярдэм андэ моря. 26 Мэ часто сымас андо дром, манди камэнас тэ стерэн вэрыто и чордэӷаря, ай кадяжэ мэрно народо и мануша анда авэр народоря, ман аштярэлас бида пэ лэна, андо форо, андэ пустыня, пэ моря, ай кадяжэ машкар и хохавнэ ԥрала. 27 Мэ приставас бут зор, часто на совавас и рят, сымас боқало и камавас тэ пав, най еқвар сымас би хамаско, мэ мучисававас лэ шудримастар и сымас би ӥдако.

28 Тай инке, мэ кажно дес гиндосарав пала всаворэ лэ Дэвлэстирэ ӷурторя. 29 Варико би зорэско? И мэ ашав би зорэско. Варикас змардэ па правильно дром? Тоди ман лэл и холи.

30 Май если варисоса тэ путював, тоди путювава кодэлэса, со сыкавэл, пэскати мэ би зорэско. 31 Мэк амарэ Барэ Хуласко лэ Исусоско Дэл и Дад авэл ашунгло о вико вечно! Во ӷанэн, кай мэ на хохавав. 32 Андо Дама́ско ек барэдэр, пэ саво хулаий о царё Аре́та, стодя лэ халавдэн паша лэ форостирэ вороты, кай тэ астарэл ман, 33 но ман змэклэ андэ корзина через и фэлястра, сави сас андэ лэ форостири стина, и мандэ вижыля тэ фэрисавав лэстар.