Иоано

7 Посли када о Исусо ашэласпэ андэ Галиле́я. Во на камэлас тэ жал андэ Иуде́я, важ кода кай и иудеёря камэнас лэс тэ умарэн. 2 Пашолас иудейско лэ Катунэнго празнико, 3 и лэстирэ ԥрала ԥэндэ лэсти: «Жа андэ Иуде́я, кай и авэр тирэ ученикоря тэ диқэн тири дила. 4 Если о мануш камэл, кай о миро тэ уӷанэн пала лэстэ, во на лэла тэ гаравэл пэстири дила. Ай ту терэс кацави дила! Ни акэ, сыкав пэс лэ мирости!» 5 Но па чачимастэ лэстирэ ԥрала на патянас андэр лэстэ. 6 О Исусо ԥэндя лэнди: «Мэрни время инке на поджыля, ай тумэнди поджал любо время. 7 Ла люмати найвасо тумэн тэ вэрыцый, ай ман вой вэрыцый, важ кода кай мэ росԥэнав, кай латири дила найлащи. 8 Тумэ жан по празнико, ай мэ пэр лэстэ пока на жава, важ кода кай мэрни время инке на поджыля». 9 Посли кадэла алава во ашэляпэ андэ Галиле́я.

10 Но кала лэстирэ ԥрала ужылэ по празнико, во всаек жыля интя, кати кадя, кай пала када нико тэ на ӷанэн. 11 По празнико и иудеёря линэ тэ родэн лэс и тэ пушэн, кай во. 12 Машкар о народо пала лэстэ сас бут разно дума. Дэсавэ ԥэнэнас: «Во лашо мануш». Ай авэр пэ када ԥэнэнас: «Най, во дилярэл лэ народос». 13 Но через и дар англа иудеёря* нико на дэлас дума пала лэстэ ворта.

14 Кала епаш празнико ужэ прожыля, о Исусо авеля андэ қандири и ля тэ сытярэл лэ мирос. 15 И иудеёря удивинаспэ и ԥэнэнас: «Катар во кадя драго ӷанэн и Свынти Лила? Во жэ никай на учисайля*!» 16 Пэ када о Исусо ԥэндя лэнди: «Кода, сости мэ сытярав, — най мандар, ай кодэлэстар, ко ман бишалдя. 17 Кодэва, ко камэл тэ терэл кода, со лэсти уӷодно, уӷанэна, лэ Дэвлэстар мэ сытярав или дав дума корко пэстар. 18 Кодэва, ко дэл дума корко пэстар, родэл пэсти ашунгло алав, ай кодэва, ко камэл тэ жал ашунгло алав пэ кодэва, ко бишалдя лэс, ԥэнэн чачимос, и андэ лэско ди нинай хохаимос. 19 О Маисеё дя тумэнди законо, кадя? Но нико андар тумэндэ на ритярэл кадэва законо. Важ сави дила тумэ камэн ман тэ умарэн?» 20 Тоди о миро ля тэ ԥэнэн: «Андэр тутэ о найвужо. Ко камэл тут тэ умарэл?» 21 О Исусо ԥэндя лэнди: «Мэ стердэм кати ек чуда в суботу — и тумэ всаворэ удивинпэ. 22 Но погиндон акэ пала со: о Маисеё дя тумэнди законо тэ опшынэн и мурцы (хоть када сас най лэ Маисеёстар, ай лэ ԥурэндар) и тумэ приритярдён кадэлэ законости дажэ в суботу. 23 Если лэ муршэс опшынэн в суботу, кай тэ на ԥагэн лэ Маисеёско законо, тоди васо тумэ холяйлэ, кай мэ в суботу исцэлисардэм лэ манушэс? 24 На́ сындон* па кода, со диқэн, — сындон справедливо*».

25 Дэсавэ анда Иерусалимо линэ тэ ԥэнэн: «Када най кодэва мануш, савэс камэн тэ умарэн? 26 Во ворта дэл дума лэ манушэнца, но нико лэсти нисо на ԥэнэн. Можэт, чаче и барэдэра полинэ, кай када Христос? 27 Но амэ жэ ӷанас, катар во, ай кала авэла о Христос, нико на лэла тэ ӷанэн, катар во». 28 И тоди о Исусо, саво сытярэлас андэ қандири, ӷромко ԥэндя: «Тумэ ӷанэн ман и ӷанэн, катар мэ. Мэ авелэм най корко пэстар. Кодэва, ко бишалдя ман, па чачимастэ исин, но тумэ лэс на ӷанэн. 29 Ай мэ ӷанав лэс, важ кода кай мэ авелэм лэстар. Во бишалдя ман». 30 Вонэ камлэ лэс тэ хутилэн, но никастэ када на вижыля, важ кода кай лэстири время инке на поджыля. 31 Ай бут мануша патяе андэр лэстэ и линэ тэ ԥэнэн: «Хэба о Христос, кала авэла, стерэла май бут чудеса, чем стердя кадэва мануш?»

32 И фарисеёря уӷанглэ, сави дума жал пала лэстэ машкар о народо, важ када и барэ рашая и фарисеёря бишалдэ ла қандирятирэ охраниконэн тэ хутилэн лэс. 33 О Исусо ԥэндя лэ манушэнди: «Мэ авава тумэнца инке набут, ай потом жава каринг кодэва, ко ман бишалдя. 34 Тумэ лэна тэ родэн ман, но на виарақэна, и интя, кай мэ авава, тумэ не сможэте тэ авэн». 35 Тоди и иудеёря линэ тэ дэн дума машкар пэстэ: «Каринг када во тидяпэ тэ ужал, кай амэ лэс тэ на виарақас? На камэл во тэ жал кай и евреёря, савэ жувэн машкар и грекоря, и тэ сытярэл инке и лэ греконэн? 36 Сар тэ полас лэстирэ алава: „Тумэ лэна тэ родэн ман, но на виарақэна, и интя, кай мэ авава, тумэ не сможэте тэ авэн“?»

37 Андо послиднё, само баро лэ празникоско дес о Исусо ущеля и ӷромко ԥэндя: «Ко камэл тэ пэл, мэк авэл каринг мандэ и пэл. 38 Кодэлэстэ, ко патял андэр мандэ, „андрал* питяла бут жундо паи“, сар пистромэ андэ Свынти Лила». 39 Во ԥэндя када пала свынто зор, саво трэбуй сас тэ авэл дино кодэлэнди, ко патяя андэр лэстэ. Тоди лэнди инке на сас дино кадэва зор, важ кода кай о Исусо инке на ашэля ашунгло. 40 Кала дэсавэ мануша андэ толпа ашундэ кадэла алава, вонэ линэ тэ ԥэнэн: «Када чаче лэ Дэвлэско особо мануш». 41 Авэр ԥэнэнас: «Када Христос». Сас и кодэла, ко спороса ԥэнэнас: «Хэба о Христос авэла анда Галиле́я? 42 На ԥэндо андэ Свынти Лила, кай о Христос авэла анда лэ Давидоско колено и арақадёла андо* Вифлее́мо, андо гав, кай жувэлас о Давидо?» 43 Кадя через лэстэ о миро ля тэ спорийпэ. 44 Дэсавэ камэнас лэс тэ хутилэн, но никастэ када на вижыля.

45 Кала и охраникоря рисайлэ каринг и барэ рашая и каринг и фарисеёря, лэндар пушлэ: «Васо тумэ лэс на андэ́?» 46 И охраникоря ԥэндэ лэнди: «Нико никала на дэлас дума кадя, сар во». 47 Пэ када и фарисеёря ԥэндэ: «Во со, и тумэнди замардя о шэро? 48 Хэба патяя андэр лэстэ варико анда барэдэра или анда фарисеёря? 49 Ай кадэла мануша, савэ лэс ашунэн, на ӷанэн о законо. Вонэ бибахталэ». 50 О Никади́мо, саво авэлас каринг о Исусо и сас фарисеё, ԥэндя: 51 «Хэба па амаро законо можно тэ сындосарас лэ манушэс, если спэрва на виашундям лэс и на уӷанглям, со во стердя?» 52 Пэ када и барэ рашая и фарисеёря ԥэндэ лэсти: «Ту со, тожэ анда Галиле́я? Розуӷан, со пистромэ андэ Свынти Лила, и диқэса, кай лэ Дэвлэско особо мануш не можэт тэ авэл анда Галиле́я»*.