Лука
15 Круӷом о Исусо стидэнаспэ всаворэ мануша анда налоӷово и лэ бэзэхэстирэ мануша, кай тэ ашунэн лэс. 2 Ай лэ фарисеёнэнди и лэ закониконэнди када на чалёлас и вонэ ԥэнэнас: «Кадэва мануш вэдийпэ лэ бэзэхэстирэ манушэнца и хал лэнца». 3 Тоди во призындярдя лэнди кацаво примеро: 4 «Ԥэнаса, варикастэ андар тумэндэ исин 100 бакрэ и ек андар лэндэ хасарделя. Хэба тумэ на ашавэна кадэлэ 99 бакрэн пэ мал* и на лэна тэ родэн кодэлэ бакрэс, саво хасарделя, пока на виарақэна? 5 Ай кала виарақэна, залошавэна и андярэна лэс пэ ԥиқэ. 6 И, кала авэна цэрэ, ақарэна лэ друӷонэн и лэ сосидонэн и ԥэнэна лэнди: „Лошавэн манца, важ кода кай мэ виарақлэм лэ бакрэс, саво хасарделя“. 7 Ԥэнав тумэнди: кадя и по небо лэна май фартэ тэ лошавэн пала ек бэзэхэско мануш, саво каисайля, чем пала 99 правильни мануша, савэнди на трэбуй тэ каинпэ.
8 Или прецтавьте манушня, савятэ сас дэш рупунэ манеты* и сави хасардя ек андар лэндэ. Хэба вой на дэягэла и лампа и на лэла драго тэ шулавэл па цэр, кай тэ родэл ла, пока на виарақэла? 9 Ай кала виарақэла, вой ақарэла лэ подружкэн и лэ сосидкэн и ԥэнэна: „Лошавэн манца, важ кода кай мэ виарақлэм и рупуни манета*, сави хасарделя“. 10 Ԥэнав тумэнди: кадя лошавэн и лэ Дэвлэстирэ анӷелоря, кала каийпэ ек бэзэхэско мануш».
11 Потом во ля тэ росԥэнэн: «Еқэ манушэстэ сас дуй шавэ. 12 О цыкнэдэр шаво ԥэндя пэстирэ дадэсти: „Дадэ, дэ и пай, сави прижал манди“. И о дад розделисардя машкар лэндэ пэско мищимос. 13 Через дэсавэ деса о цыкнэдэр шаво стидя пэстирэ кирпы и жыля дур андэ авэр страна. Котэ во андярэлас роспутно* жызня и проандярдя вся, со дорэсляпэ лэсти лэ дадэстар. 14 Кала во вся проандярдя, андэ кодэя страна заляпэ баро боқалимос, и во попэля андэ ԥари ситуацыя. 15 Тоди лэс наймисардя ек катутно мануш, саво бишалдя лэс пэ пэстирэ маля тэ пасый лэ балэн. 16 Во кадя диляйля тэ хал, кай дажэ камля тэ хал лэ балэнго хамос*, но дажэ када лэсти на дэнас.
17 Кала во поля, со витердя, во ԥэндя: „И бутярнэ, савэн наймисардя мэрно дад, хан чалэс, ай мэ катэ мэрав боқатар! 18 Жава каринг о дад и ԥэнава лэсти: ‚Дадэ, мэ стердэм бэзэх против о Дэл* и против тутэ. 19 Мэ будэр на ашав, кай ман тэ прижанэн тирэ шавэса. Наймисар ман каринг пэстэ сар бутярнэс‘“. 20 И во жыля каринг пэско дад. О дад дурал додиқля лэс, и лэсти ашэля жалко пэстирэ шавэс. Во прастая каринг лэстэ, обля лэс* и чуминдя. 21 О шаво ԥэндя лэсти: „Дадэ, мэ стердэм бэзэх против о Дэл* и против тутэ. Мэ будэр на ашав, кай ман тэ прижанэн тирэ шавэса“. 22 Но лэско дад ԥэндя лэ рабонэнди: „Май ӥто анэн со май лащи ӥда и утидэн лэс. Стон лэсти по вас и янгрусни и пэ пэрнэ и сандали. 23 Лэн виправардэ гуруворэс и зашынэн лэс. Хам и лошавам, 24 важ кода кай мэрно шаво сас муло и жунделя, хасарделя и рисайля“. И всаворэ линэ тэ лошавэн.
25 Андэ кодэя время лэско барэдэр шаво сас пэ мал. Кала во рияспэ цэрэ, во ашундя, сар дилабэл и музыка и сар цэлэн. 26 Во подақардя еқэ слуӷос и пушля, со терэлпэ. 27 О слуӷо ԥэндя: „Авеля тиро ԥрал, жундо и зорало, и тиро дад зашындя виправардэ гуруворэс“. 28 О барэдэр шаво захоляйля и на закамля тэ зажал андо цэр. Тоди вижыля лэско дад и ля тэ мангэл лэс тэ зажал. 29 Пэ када во ԥэндя лэ дадэсти: „Мэ скати бэрша теравас пэр тутэ, сар рабо, и никала на пэрэԥэнавас тути алав. Но ту ни еқвар на дян манди дажэ тэ зашынав бузнорэс, кай мэ тэ хав, тэ пав и тэ лошавав лэ друӷонэнца. 30 Ай сар кати рисайля кадэва тиро шаво, саво проандярдя тиро мищимос лэ шоваркэнца, ту зашындян важ лэстэ виправардэ гуруворэс. 31 О дад ԥэндя: „Сынок, ту вся и время манца, и вся, со мандэ исин, — тиро. 32 И сар амэ тэ на радосавас и тэ на лошавас, если тиро ԥрал сас муло и жунделя, хасарделя и рисайля!“».