Римо
2 Кочай, неважно, ко ту сан, тутэ нинай право тэ сындос аврэн. Важ кода кай кала ту лэн сындос, ту сындос корко пэс, кай екжэно терэс сар вонэ. 2 Но амэ ӷанас, кай, кала о Дэл сындой кодэлэн, ко кадя терэл, во сындой справедливо.
3 Ту чаче гиндос, кай обжаса лэ Дэвлэско сындо, если сындос аврэ манушэн, ай екжэно терэс сар вонэ? 4 Хэба ту на ӷанэс, кай о Дэл па пэско баро ковло ди драго обжалпэ туса, анда ди жалуий тут и тэрпий? Хэба ту на полэс, кай па пэско баро ковло ди во камэл тэ поможый тути тэ каиспэ? 5 Но ту тердёс пэ пэско и на камэс тэ каиспэ, и важ када о Дэл спушэла тутар андо дес важ пэстири холи, кала поджала и время важ лэско справедливо сындо. 6 Во спушэла кажнонэстар па лэстири дила. 7 Во дэла тэ жувэн вечно кодэлэнди, ко на парашэл тэ терэл лашымос. Кацавэ мануша старыинпэ тэ ашэн ашунглэ, тэ затерэн и патив и тэ жувэн вечно*. 8 Но о Дэл лэла фартэ тэ холявэл и спушэла кодэлэндар, касти чалёл тэ спорийпэ, ко на приашундёл каринг о чачимос и терэл неправильно дила. 9 Пэ всаворэ, ко терэл найлашымос, — сар пэ евреёря, кадя и пэ грекоря, — дэла и бида и о ԥаримос. 10 Ай всаворэ, ко терэл лашымос, — спэрва и евреёря, ай потом и грекоря, — ашэна ашунглэ, затерэна и патив и жувэна мирно. 11 Важ кода кай о Дэл всаворэнца обжалпэ еқэндар.
12 Всаворэ, ко на ӷанэнас о законо и стердя бэзэх, мэрэна, хоть и на ӷанэнас о законо. Ай всаворэн, ко ӷанэнас о законо и стердя бэзэх, лэна тэ сындон па законо. 13 Важ о Дэл уӷодни най кодэла, ко кати ашунэл о законо, ай кодэла, ко ритярэл лэс. 14 И мануша анда авэр народоря на ӷанэн о законо. Но вонэ всаек корко пэстар терэн кода, со трэбуй па законо, и кадя сыкавэн, кай о законо лэндэ андо ди. 15 Вонэ сыкавэн, кай кода, сости сытярэл о законо, пистромэ лэндэ андо ди. Када жэ потвердий лэндири совесть, и андэ пэско гиндо вонэ дошалярэн пэс или виправин. 16 Кадя авэла андэ кодэва дес, кала о Дэл через о Христос о Исусо лэла тэ сындой лэ манушэн важ кода, со вонэ чоралэс гиндонас и терэнас. И када ужал андэ лащи новость, сави мэ росԥэнав.
17 Ту ԥэнэс пэр пэстэ евреё, надеиспэ по законо и путёс, кай ту анда лэ Дэвлэско народо. 18 Ту ӷанэс лэ Дэвлэстири время и полэс, со па чачимастэ важно, важ кода кай тут сытярэнас лэ законости. 19 Ту патяс, кай можэш тэ андярэс лэ корэн и тэ светис кодэлэнди, ко андэ тэмнота. 20 Ту гиндос, кай тути па зор тэ вилашарэс лэ дилэн и тэ сытярэс ԥарнэндирэ бэятонэн, важ кода кай ӷанэс ӷлавно, со ужал андо чачимос, саво исин андо законо. 21 Ай акана васо ту сытярэс аврэн, но на сытярэс корко пэс? Ту росԥэнэс: «На́ чор», ай екжэно чорэс. 22 Ту ԥэнэс: «На́ придэ лэ хулас и ла хулая*», ай екжэно придэс. Ту доԥэнэс, кай вэрыцыс лэ хохавнэ дэвлэн, ай екжэно опчорэс и қандиря. 23 Ту абурос, кай ӷанэс о законо, ай екжэно лажаварэс лэ Дэвлэс, кала ԥагэс о законо. 24 И, сар пистромэ андэ Свынти Лила, «через тумэндэ пала лэ Дэвлэско алав найпативалэс дэн дума машкар о миро».
25 Тэ опшындёс* трэбуй кати тоди, кала ту ритярэс о законо. Ай кала ту ԥагэс о законо, тоди нинай нисаво толко, опшынделян ту чи най. 26 Если кодэва, ко найопшындо, ритярэл о законо, тоди хэба о Дэл на диқэла пэр лэстэ, сар пэ кодэва, ко опшындо? 27 Тут сытярэнас, кай трэбуй тэ опшындёс и тэ ритярэс о законо, но ту на приритярдёс кадэлэсти. Важ када, кала кодэва, ко найопшындо, ритярэл о законо, кадя во лажаварэл тут. 28 Важ кода кай о чачуно евреё* — най кодэва, ко кацаво па муй, и тэ авэс опшындо — най котэ, кай када терэлпэ пэ тила. 29 Но о чачуно евреё — кодэва, ко кацаво андо ди и каско ди опшындя о свынто зор, ай най ко опшындёл па законо. Кацаво мануш затерэл лашо алав лэ Дэвлэстар, ай най лэ миростар.