Марко
15 Рано тэсара и барэ рашая лэ барэдэрэнца и лэ закониконэнца — вся о Ӷлавно иудейско сындо* — подинэ дума ек еқэса, сԥанглэ лэ Исусос, одындярдэ лэс и отдинэ лэ Пилатости. 2 О Пила́то пушля лэстар: «Ту иудейско царё?» Во ԥэндя: «Ту екжэно када ԥэнэс». 3 Но и барэ рашая бут андэр со дошалярэнас лэ Исусос. 4 Тоди о Пила́то упалэ лэстар пушля: «Тути найсо тэ ԥэнэс? Дик, скати дош пэр тутэ шон». 5 Но о Исусо будэр нисо на ԥэндя, и када сас удивительно важ о Пила́то.
6 Пэ Патради о Пила́то обычно одмэкэлас анда баруно еқэ манушэс, пала саво мангэлас о народо. 7 Андэ кодэя время андо бар бэшэлас мануш, савэс ақарэнас Вара́ва. Во сас котэ аврэ манушэнца, савэ звазглэ лэ мирос и умардэ манушэн. 8 Стидяпэ толпа, и вой ля тэ мангэл лэ Пилатос тэ стерэл кода, со во обычно терэлас важ о народо. 9 О Пила́то пушля лэндар: «Камэн, одмэкава важ тумэндэ лэ иудейсконэ царёс?» 10 Ай во ӷанэнас, кай и барэ рашая завидуинас лэ Исусости и важ када андярдэ лэс по сындо. 11 Но и барэ рашая подмардэ лэ манушэн, кай вонэ тэ мангэн тэ освободий най лэс, ай лэ Варавас. 12 О Пила́то пушля: «Ай со мэ тэ терав кодэлэса, пэр кастэ тумэ ԥэнэн иудейско царё?» 13 Вонэ зацыписайлэ: «Казнисар* лэс!» 14 О Пила́то пушля: «Васо? Саво найлашымос во стердя?» Но вонэ зацыписайлэ инке май фартэ: «Казнисар лэс!» 15 Тоди о Пила́то, кай тэ уӷодий лэ мирости, одмэкля лэ Варавас, ай лэ Исусос приԥэндя тэ марэн чукняса и потом тэ казнин по столбо.
16 И халавдэ ундярдэ лэ Исусос андэ града, сави андэ лэ правителёско дворецо, и стидэ́ котэ вся о отрядо. 17 Вонэ шутэ по Исусо фиалетово жылетка, анқудэ анда калючки винко, стодэ пэр лэстэ 18 и линэ тэ цыпин: «Тэ авэл зор лэ иудейсконэ царёсти!» 19 Вонэ марэнас лэс па шэрэстэ ла рувляса, шунгардэнас пэр лэстэ и тэлёнас лэсти пэ чанга. 20 Кала вонэ парашэлэ тэ издеваюца, вонэ злинэ пар лэстэ и фиалетово жылетка, шутэ пэр лэстэ лэстири ӥда и ундярдэ тэ примарэн по столбо. 21 Вонэ застависардэ еқэ манушэс, лэ Симанос анда Кире́на (лэ Александростирэ и лэ Руфостирэ дадэс), саво жалас анда гав, тэ андярэл о столбо, пэ саво трэбуй сас тэ казнин лэ Исусос.
22 И акэ лэс андэ́ по ҭан, пэ саво ԥэнэн Галго́фа, со означает «черепо». 23 Котэ лэсти динэ вино, андэ саво сас зӷамимэ и мира*, но во на ля лэс тэ пэл. 24 И халавдэ примардэ лэ Исусос по столбо и росцэлдэ лэстири ӥда*, кай тэ розделин ла машкар пэстэ. 25 Кала лэс примардэ по столбо, сас тэсара варикай девять часов*. 26 Пэ досточка, кай пистрон и дош, сас пистромэ: «Иудейско царё». 27 Паша лэстэ пэ столборя сас амбладэ дуй чордэӷаря: ек справа лэстар, ай авэр слева. 28 ——* 29 И мануша, савэ прожанас мимо, найпативалэс дэнас дума пала лэстэ. Вонэ кунинас лэ шэрэса и ԥэнэнас: «Эй, када жэ ту камлян тэ розмарэс и қандири и важ трин дес тэ ваздэс ла. 30 Акана спасысар пэс — зӷуль па столбо!» 31 И барэ рашая лэ закониконэнца тожэ асанаспэ лэ Исусостар и ԥэнэнас: «Аврэн спасыяс, ай корко пэс тэ спасый не можэт! 32 Мэк о Христос, лэ Израилёско царё, зӷулел акана па столбо, кай амэ тэ диқас када и тэ патяс». И дажэ и чордэӷаря, савэ сас амбладэ паша лэстэ, найпативалэс дэнас дума пала лэстэ.
33 Десэ варикай в 12 часов* па вся кодэва краё* ашэля фартэ тэмно, и кадя сас до трёх часов дня*. 34 Варикай в три часа о Исусо фартэ зацыписайля: «Эли́, Эли́, лама́ савахфани́?» — со означает «Дэвла, Дэвла*, васо ту ман ашадян?». 35 Кала дэсавэ, ко котэ тердёлас, ашундэ када, вонэ линэ тэ ԥэнэн: «Диқэн, во ақарэл лэ Ильяс». 36 Ай ек мануш прастая, тиндярдя и ӷубка андо шукло вино, стодя ла пэ рувли и дя лэсти тэ пэл. Кадэва мануш ԥэнэнас: «На́ ӷулен лэстэ! Диқаса, авэла о Илья тэ злэл лэс па столбо». 37 О Исусо фартэ зацыписайля и муля. 38 Тоди и шырма андэ қандири росшынделя пэдондэ, упрал жы тэлэ. 39 О баро халавдо*, саво тердёлас найдур лэ Исусостар, кала додиқля, сар во муля, ԥэндя: «Кадэва мануш чаче сас лэ Дэвлэско Шаво».
40 Пэ вся када дурал диқэнас и манушня. Машкар лэндэ сас и Мария Магдали́на, ай кадяжэ и Мария, лэ Яковостири лэ Цынёнестири и лэ Ёзэфостири дэй, и инке тердёлас котэ и Салами́я. 41 Вонэ ԥирэнас лэ Исусоса и поможынас лэсти, кала во сас андэ Галиле́я. Кадяжэ машкар лэндэ сас бут авэр манушня, савэ авелэ лэса андо Иерусалимо.
42 Поджалас о вечеро. И важ кода кай када сас дес, кала вся подӷотавливали каринг и субота, 43 о Ёсифо анда Аримафе́я (во сас пативало сындомари анда Ӷлавно иудейско сындо* и тожэ аштярэлас, кала лэла тэ правий лэ Дэвлэско Царство), биросардя пэстири дар, жыля каринг о Пила́то и мангля тэ залэл лэ Исусостири тила. 44 О Пила́то удивисайля, кай о Исусо ужэ муля, и ақардя лэ барэ халавдэс, кай тэ пушэл, чаче када кадя чи най. 45 Кала о халавдо потвердисардя када, о Пила́то отдя и тила лэ Ёсифости. 46 И о Ёсифо тиндя котор материя анда сано лёно, зля и тила, замотысардя ла андэ кадэва котор и стодя андэ моӷилка, сави сас вишынди андо плай. Каринг о входо во поткотисардя баро бар. 47 Ай и Мария Магдали́на и Мария, лэ Ёзэфостири дэй, ашэлэпэ тэ диқэн по ҭан, кай сас притидо о Исусо.