1 Иоано

1 Амэ пистросарас тумэнди пала кодэва, ко сас спэрва, кас амэ ашундям и кас амэ диқлям пэстирэ яқэнца, пала кастэ амэ следисардям и кастэ лямаспэ вастэнца, — пала кодэва, ко росԥэнэн* о алав, саво дэл и жызня. 2 (Да, амэнди динэ тэ уӷанас и тэ полас и вечно жызня, сави жал лэ Дадэстар. Амэ диқлям ла, и акана сар свидетеля росԥэнас тумэнди пала латэ.) 3 Амэ росԥэнас тумэнди пала кода, со диқлям и ашундям, кай тумэндэ тэ авэл ек гиндо* амэнца, сар и амэндэ ек гиндо лэ Дадэса и лэстирэ шавэса лэ Исусоса лэ Христоса. 4 И амэ пистросарас пала када, кай всаворэ амэ андэ вся тэ авас лошалэ.

5 Амэ росԥэнас тумэнди пала кода, со ашундям лэстар: о Дэл — када свето и андэр лэстэ нинай нисави тэмнота. 6 Если амэ ԥэнас, кай амэндэ лэса ек гиндо, ай екжэнэ ԥирас андэ тэмнота, тоди амэ хохавас и на андярас лэ Дэвлэстири время. 7 Но если амэ ԥирас андо свето, важ кода кай во жувэл андо свето, тоди амэндэ па чачимастэ лэса ек гиндо, и через лэ Исусоско рат, лэстирэ Шавэско, амэ ашас вужэ любонэ бэзэхэстар.

8 Если амэ ԥэнас, кай андар мэндэ нинай бэзэх, тоди амэ дилярас корко пэс и дицол, кай амэ на полям лэ Дэвлэстири время. 9 Если амэ прижанас пэско бэзэх, о Дэл простия амэн, и лэстирэ зорэса амэ ашаса вужэ всаворя найлащя дилатар, важ кода кай во састо пэстирэ алавэсти и вся терэл правильно. 10 Если амэ ԥэнас, кай ни еқвар на стердям бэзэх, тоди амэ вистас лэс хохавнэса и на патяс лэстирэ алавэсти.