1 Каринфо

6 Если ту спорисайлян аврэ ԥралэса, трэбуй ту тэ мангэс лэ манушэндар, савэ на терэн правильно, тэ розлэн кадэя дила? Васо тумэ на мангэн када лэ свынтонэндар андо ӷурто? 2 Тумэ драго ӷанэн, кай и свынти лэна тэ сындон и люма. Ай если тумэ лэна тэ сындон и люма, хэба тумэндэ на вижала тэ розлэнпэ андэ найбари дила? 3 Хэба тумэ на ӷанэн, кай амэ ласа тэ сындосарас лэ анӷелонэн? Тоди васо тумэндэ на вижал тэ розлэнпэ андэ обычно дила? 4 Ай васо, кала трэбуй тэ розлэнпэ андэ кацави дила, тумэ жан кай кодэла*, ко най анда ӷурто? 5 Мэ ԥэнав када, кай тумэнди тэ ашэл лажаво. Хэба машкар тумэндэ нинай ни ек годявэрно мануш, саво розлиноп лэ ԥралэндири дила? 6 Но ек ԥрал тидэл мирос, кай тэ розлэлпэ аврэ ԥралэса, тай инке дошалярэл лэс англа кодэла, ко на андярэл лэ Дэвлэстири время!

7 Кала тумэ тидэн мирос ек пэ еқэстэ, тумэ ужэ процэлдэ. Най фэдэр тэ домэкэн, кай тумэнца найдраго тэ обжанпэ или тэ опхохавэн? 8 Но тумэ екжэнэ найдраго обжанпэ пэстирэ ԥралэнца и опхохавэн лэн.

9 Хэба тумэ на ӷанэн, кай о Дэл на мэкэла андэ пэско Царство кодэлэн, ко на уӷодий лэсти? На́ дилярэн корко пэс. Кодэлэс, ко здрал пала билажавардимос*, ко полэл лэ хохавнэ дэвлэн, ко придэл лэ хулас или ла хулая*, кодэлэ муршэс, саво цырдэлпэ каринг авэр мурш*, 10 кодэлэс, ко чорэл, ко чорымаско, ко допэлпэ, ко вэрыто ԥэнэн пала авэр и ко вимарэл и ловэ — никас андар лэндэ о Дэл на мэкэла андэ пэско Царство. 11 И дэсавэ андар тумэндэ кадя и жувэнас. Но о Дэл вихаладя тумэн и тумэ ашэлэ свынти. Акана о Дэл прижангля тумэн найдошалэнца через пэско свынто зор, кай тумэ тэ андярэн амарэ Барэ Хуластири лэ Исусостири лэ Христостири время.

12 Манди вся можно, но най вся анэн лашымос. Манди вся можно, но мэ на домэкава варисости тэ хулаий пэр мандэ. 13 О хамос трэбуй важ о жэлудко, ай о жэлудко важ о хамос, но о Дэл стерэла кадя, кай на ашэлапэ ни кода, ни авэр. Ай и тила трэбуй най кай тэ терэл билажавардимос, ай кай тэ терэл лэ Барэ Хуластири дила, и о Баро Хулай заботийпэ пала тила. 14 Пэстирэ зорэса о Дэл жундярдя лэ Барэ Хулас и амэн тожэ жундярэла.

15 Хэба тумэ на ӷанэн, кай тумари тила прижал лэ Христости? Правильно авэла тэ лас кода, со прижал лэ Христости, и тэ стидас када ла шоваркаса? Най, никала! 16 Хэба тумэ на ӷанэн, кай кодэва, ко стидэлпэ ла шоваркаса, ашэл ласа сар ек тила? Важ кода кай о Дэл ԥэнэн: «Дуй мануша ашэна сар ек». 17 Ай ко стидэлпэ лэ Барэ Хуласа, лэстэ ашэл ек гиндо лэса. 18 Нашэн май дур лэ билажавардимастар! Любо авэр бэзэх, саво терэл о мануш, на мэлярэл* лэстири тила. Но кодэва, ко терэл билажавардимос, терэл бэзэх против пэстири тила. 19 Хэба тумэ на ӷанэн, кай тумари тила — када лэ свынтонэ зорэстири қандири? Кадэва зор андэр тумэндэ, и лэс дя о Дэл. Тумэ на прижан корко пэсти, 20 важ кода кай о Дэл потиндя бари цэмин пала тумэндэ. Ни акэ терэн вся, кай через тумари тила о Дэл тэ авэл ашунгло!