Филимоно
1 Мэ, о Павло, кас бэшардэ через о патяимос андо Христос Исусо, и амаро ԥрал о Тимафеё — пистросарас письмо тути, Филимо́но, амаро кучутно ԥрал, 2 ай кадяжэ амаря ԥьяти, ла Апфияти, лэ Архипости, кацавэ жэ халавдэсти, сар и амэ, и лэ ӷуртости андэ тиро цэр.
3 Мэк о Дэл, амаро Дад, и о Исусо Христос, амаро Баро Хулай, здиқэн пэр тумэндэ па пэско баро ковло ди и дэн мирно жызня.
4 Мэ вся и время блаӷодарисарав мэрнэ Дэвлэс, кала ԥэнав пала тутэ андэ пэстирэ молитвы, 5 важ кода кай мэ ашунав пала кода, сар ту патяс и любис лэ Барэ Хулас лэ Исусос и всаворэ́ свынтонэн. 6 Мэ мангавпэ, кай тиро патяимос, саво исин и кай авэр христианоря, тэ поможый тути тэ полэс, сар дэ бут лашымос исин амэндэ через о Христос. 7 Кала мэ ашундэм, сар ту любис лэ ԥралэн, мэ фартэ залошайлэм и лэм зор, важ кода кай ту, ԥрал, подритярдян лэ свынтонэн, и через када лэнди по ди ашэля май драго.
8 Сар лэ Христоско апостало, мэ моӷ тэ приԥэнав тути тэ стерэс кода, со трэбуй. 9 Но всаек мэ, о Павло, ԥуро мануш, савэс акана инке и бэшардэ через о патяимос андо Христос Исусо, камав коесо тэ мангав тутар, важ кода кай ӷанав, сар ту любис аврэн. 10 Мангав тут пала мэрно шаво, о Ани́симо, важ саво мэ ашэлэм сар дад, кала ман бэшардэ*. 11 Варикала тути лэстар* на сас нисаво толко, ай акана во трэбуй и тути, и манди. 12 Мэ рисарав лэс тути, да, лэс, кодэлэс, ко ашэля манди* кадя куч.
13 Пока мэ бэшав андо баруно через и лащи новость*, мэ камлоп, кай во тэ ашэлпэ катэ манца и вместо тутэ тэ поможый манди. 14 Но мэ нисо на камав тэ терав, пока ту на дэса пэстири соӷласия, кай ту тэ терэс и лащи дила най через оди, ай кай екжэно камэс када. 15 Можэт, важ када во и ашадя тут найпэдолӷонэстэ, кай тэ рийпэ каринг тутэ пэ вся и время 16 и тэ авэл ужэ най сар рабо, но май бут чем рабо — сар кучутно ԥрал. Во фартэ куч манди, пэскати май куч во авэла тути — и сар рабо, и сар христианско ԥрал. 17 Важ када, если ту полэс ман сар друӷос, анда ди прилэ лэс пэстэ, сар прилиноп ман. 18 Ай если во андэ варисостэ дошало или завужылисайля тути, мэ пала када потинава. 19 Мэ, о Павло, пистросарав пэстирэ вастэса: мэ пала вся потинава*. Мэ ужэ на дав дума пала кода, кай ту обязано манди пэстиря жызняса. 20 Кочай, ԥрал, стер када важ мандэ, важ кода кай амэ вместе терас лэ Барэ Хуластири дила. Сар лэ Христоско ученико, стер, кай манди тэ авэл драго по ди.
21 Пистросарав тути, важ кода кай патяв: ту стерэса, сар мэ мангав, и стерэса важ мандэ дажэ май бут. 22 Кадяжэ виарак манди ҭан, кай тэ жував. Мэ надеисавав, кай тумарэ молитвэнца мэ рисавава каринг тумэндэ*.
23 Пэрэдэл тути поклоно о Епафра́со, саво, сар и мэ, бэшэл андо баруно через о патяимос андо Христос Исусо, 24 ай кадяжэ мэрнэ амала о Марко, о Ариста́рхо, о Дима́со и о Лука́.
25 Тэ здиқэл пэр тумэндэ амаро Баро Хулай о Исусо Христос па пэско баро ковло ди важ кода, кай тумэндэ лашо ди.