Римо
4 Со тоди амэ можэм тэ ԥэнас пала амаро ԥуро о Авраамо? 2 Если лэ Авраамос тэ прижанглоп найдошалэса важ лэстири дила, тоди лэстэ авелоп, соса тэ абурой, но най англа Дэл. 3 Ай со пистромэ андэ Свынти Лила? «О Авраамо патяя лэ Иеговасти*, и важ када о Дэл прижангля лэс найдошалэса». 4 Лэ бутярнэсти потинэн важ лэстири бути, най сар подарко, ай сар кода, со прижал лэсти. 5 Авря ригатар, если о мануш нисо на терэл, ай патял андо Дэл, тоди важ о Дэл, саво прижанэн лэ бэзэхэстирэ манушэн найдошалэнца, кадэва мануш ашэл найдошало, важ кода кай патял. 6 И о Давидо ԥэнэн, кай бахтало кодэва, кас о Дэл прижанэн найдошалэса най важ и дила. 7 «Бахталэ кодэла, кастири найлащи дила простисарди и ко ашэля вужо пэстирэ бэзэхэстар, 8 бахтало о мануш, каско бэзэх о Иегова на шол пэ яқа».
9 Но кати и опшындэ мануша бахталэ? Или и найопшындэ тожэ? Амэ жэ ԥэнас: «О Дэл прижангля лэ Авраамос найдошалэса важ кода, кай о Авраамо патяя». 10 Ай кала о Дэл прижангля лэс найдошалэса? Кала о Авраамо сас опшындо или найопшындо? Да, тоди, кала инке на сас опшындо. 11 И о Дэл ԥэндя лэ Авраамости тэ опшынэн пэс. Када сас сар знако*, саво сыкавэл, кай о Дэл прижангля лэс найдошалэса важ кода, кай во патяя. И када сас, кала во инке на сас опшындо. Кадя во моӷ тэ ашэл дадэса важ всаворэ мануша, савэ найопшындэ, но ко патял. Тоди о Дэл прижанглоп лэн найдошалэнца. 12 Кадяжэ во ашэля дадэса, но най кати важ кодэла, ко ужэ опшындо, но важ кодэла, ко патял кадя жэ, сар патялас амаро дад о Авраамо, кала во инке на сас опшындо.
13 О Дэл дя алав лэ Авраамости и лэстирэ бэятонэнди, кай лэнди дорэсалапэ и ԥув. И о Дэл прижангля лэ Авраамос найдошалэса най важ кода, кай о Авраамо ритярэлас о законо, ай важ кода, кай во патяя. 14 Если вся дорэсэлпэ кодэлэнди, ко ритярэл о законо, тоди тэ патяс на трэбуй и о алав, саво дя о Дэл, нисо на ашэл. 15 Чаче тэ ԥэнав, кала о мануш ԥагэл о законо, када холярэл лэ Дэвлэс. Ай если нинай о законо, тоди лэс и на ԥагэса.
16 Вижал, о Дэл дя алав лэ Авраамости через кода, кай о Авраамо патяя, и кадя здиқля пар мэндэ па пэско баро ковло ди. И через кадэва алав блаӷославинапэ всаворэ лэ Авраамостирэ бэяцэ. Най кати кодэла, ко ритярэл о законо, но и кодэла, ко патял кадя жэ, сар патялас амаро дад о Авраамо. 17 (Важ кода кай пистромэ: «Мэ стердэм, кай ту тэ авэс дад важ бут народоря».) О Авраамо патяя лэ Дэвлэсти, саво жундярэл лэ мулэн и ԥэнэн пала кода, со инке нинай, ԥэнэса када ужэ исин*. 18 О Авраамо не моӷ тэ надеийпэ, кай лэстэ авэна бэяцэ. Но всаек во патялас и надеияспэ, кай ашэла дадэса важ бут народоря. Важ кода кай о Дэл ԥэндя: «Скати жэ тутэ авэна бэяцэ». 19 Во гиндояс, кай лэстэ ужэ не моӷут тэ авэн бэяцэ, важ кода кай лэсти сас варикай 100 лет, ай и Са́рра фартэ ԥури, кай тэ анэн* бэятонэн. 20 Но во всаек на парашэлас тэ патял и на бистрэлас пала алав, саво дя о Дэл, и патялас андэр лэстэ. Во ля зор через кода, кай патялас, и кадя о Дэл ашэля инке май ашунгло. 21 Во допатялас, кай о Дэл можэт тэ зритярэл пэско алав. 22 И важ када о Дэл «прижангля лэс найдошалэса».
23 Но и алава «прижангля лэс» пистромэ най кати важ лэстэ, 24 но и важ амэндэ. О Дэл и амэн прижанэна найдошалэнца, важ кода кай амэ патяс андэр лэстэ, кай во рисардя каринг и жызня амарэ Барэ Хулас лэ Исусос. 25 О Дэл домэкля, кай лэ Исусос тэ умарэн важ амаро бэзэх, и жундярдя лэс, кай тэ прижанэн амэн найдошалэнца.