Галатия

6 Ԥрала, варико можэт тэ змардёл* и дажэ тэ на полэл када, но тумэ, дэвликунэ и састэ мануша*, пристон о зор, кай тэ рин лэс по правильно дром. И тэ терэн када трэбуй ковлэс и спокойно. Кадяжэ авэн осторожни, кай екжэнэ тэ на подэнпэ лэ бэзэхэсти. 2 Дэн зор ек еқэсти андэ ԥари время*, и кадя тумэ лэна тэ ритярэн лэ Христоско законо. 3 Если варико гиндой, кай варисо ашэл, хоть во нико, тоди во обдилярэл корко пэс. 4 Но мэк кажно диқэл* пала пэстири дила, и тоди во на лэла тэ сыстой пэс аврэнца и сможэт тэ лошавэл кодэлэсти, со екжэно домарделя. 5 Важ кода кай кажно трэбуй екжэно тэ терэл пэстири дила*.

6 Инке, мэк кажно мануш, савэсти поможын тэ сэрэл о алав лэ Дэвлэстар, делийпэ всаворэса, со лэстэ исин лашо, кодэлэса, ко лэс сытярэл.

7 На́ дилярэн корко пэс: на вижала тэ приасанпэ лэ Дэвлэстар. Со посадия о мануш, кода и стидэла. 8 Ко садий кода, каринг со лэс цырдэл лэстири бэзэхэстири тила, во стидэла латар бида*, ай ко садий кода, со жал лэ Дэвлэстирэ зорэстар, во стидэла лэстар вечно жызня. 9 Ай акана на ласа тэ умэкас и вас, кала терас лашымос, важ кода кай если на здасапэ*, тоди андэ время, сави стодя о Дэл, стидаса бут со лашо*. 10 Важ када, пока исин время*, ласа тэ терас лашымос всаворэнди, но май бут лэ ԥралэнди и лэ ԥэянди па лэ Дэвлэстири время.

11 Диқэн, савэ барэ буквэнца мэ пистросардэм тумэнди кадэва письмо пэстирэ вастэса.

12 Кодэла, ко камэл тэ уӷодий лэ мирости, заставин тумэн тэ опшындён. Вонэ камэн кати ек — кай лэн тэ на ӷонин сар кодэлэн, ко андярэл лэ Христостири время, саво муля по столбо*. 13 Важ кода кай дажэ кодэла, ко опшындёл, екжэнэ на ритярэн о законо. Но вонэ заставин тумэн тэ опшындён, кай лэндэ тэ авэл васо тэ абурон тумэнца*. 14 Ай мэ нисоса на камав тэ абуросарав — кати лэ столбоса, пэ саво сас казнисардо амаро Баро Хулай о Исусо Христос. Через лэстэ и люма муля* андэ мэрнэ яқа, ай мэ мулэм андэ ла люматирэ яқа. 15 Неважно, опшынделя о мануш или на опшынделя — па чачимастэ важно кода, кай во ашэл нэвэ манушэса*. 16 И тэ авэл о Дэл одяло и тэ дэл мирно жызня всаворэнди, ко жувэл па кадэва порядко, — лэ Дэвлэстирэ Израилёсти.

17 Акана мэк нико на́ терэл манди ԥарэс, важ кода кай пэ мэрни тила исин шраморя, савэ сыкавэн, кай мэ лэ Исусоско рабо.

18 Ԥрала, мэк амаро Баро Хулай о Исусо Христос дэл тумэнди лашымос па пэско баро ковло ди важ кода, кай тумэн цырдэл каринг и лащи дила. Аминь.