Лэ Иисусос залинэ

О Иисусо и апостолоря жылэ па дром Кедрон каринг о Маслично плай. Сас и рят. По нэбо сас ԥэрдо шон. Андо Гефсиманско садо о Иисусо ԥэндя лэ апостолонэнди: «Ашэнпэ катэ и терэн вся, кай тэ на засовэн». Тоди во отжыля лэндар набут и терделя пэ чанга. Лэсти сас фартэ ԥарэс по ди и во ля тэ мангэлпэ лэ Иеговасти: «Мэк вся авэла кадя, сар ту камэс». Тоди о Иегова бишалдя лэ анӷелос, кай тэ дэл лэ Иисусости зор. Кала о Иисусо авеля кай и апостолоря, во додиқля, кай вонэ совэн. Во ԥэндя: «Ущен! На трэбуй тэ совэн! Йто пала мандэ авэна мэрнэ вороӷоря».

Йто авеля о Иуда и андя пэса бутэ манушэн, сэвэндэ сас андэ вас мечоря и дубинки. Во ӷанэнас, кай тэ виарақэл лэ Иисусос. Катар во ӷанэнас? О Иисусо най еқвар авэлас андэ кадэва садо пэстирэ учениконэнца. О Иуда ԥэндя лэ воинонэнди, кай сыкавэла лэнди лэ Иисусос. Во поджыля ворта каринг о Иисусо и ԥэндя: «Доров, Учителё!», и чуминдя лэс. О Иисусо пушля: «Иуда, ту придэс ман кодэлэса, кай чуминдэс?»

О Иисусо вижыля май англэ и пушля лэ манушэндар: «Кас тумэ родэн?» Вонэ ԥэндэ: «Лэ Иисусос, саво назаретянино». Тоди во ԥэндя: «Када мэ». И мануша йто оджылэ палпалэ и пэлинэ пэ ԥув. О Иисусо упалэ пушля: «Кас тумэ родэн?» Вонэ упалэ ԥэндэ: «Лэ Иисусос, саво назаретянино». О Иисусо ԥэндя: «Мэ уже тумэнди ԥэндэм, кай када мэ. Одмэкэн мэрнэ учениконэн».

Кала о Пётро поля, со терэлпэ, во йто виля пэско мечо и отшындя лэ рабости о кан. Кадэва рабо сас лэ само барэ рашаско. Но о Иисусо ляпэ кай лэ рабоско кан и исцелисардя лэс. После када во ԥэндя лэ Петрости: «Улэ пэско мечо. Сар ту лэс андэ вас о мечо, тоди лэ мечостар и мэрэса». И воиноря схутилдэ лэ Иисусос и сԥанглэ лэсти и вас. Всаворэ апостолоря унашлэтар. Тоди лэ Иисусос одындярдэ каринг о баро рашай, савэс ақарэнас Анна. О Анна допушля лэ Иисусос и бишалдя лэс андэ лэ Каиафоско цэр. О Каиафо сас само баро рашай. Ай со стердяпэ лэ апостолонэнца?