И мануша терэн вся, кай тэ уӷанэн, со авэла англэ
Камлоп о мануш тэ диқэл, со авэла англэ и тэ уӷанэн, со авэла лэстэ и кай лэстирэ чаче? Барвалимос чи чорымос? Любовь чи во авэла никасти на трэбуй? Авэла о мануш тэ жувэл бахталэс бут бэрша чи во йто мэрэла? И мануша бэршэнца фартэ камэн када тэ уӷанэн.
Адес исин кацавэ мануша, савэндэ кацави бути, кай драго тэ полэн кода, со терэлпэ андэ вся миро. Инке кадэла мануша терэн вся, кай тэ полэн, со авэла англэ. Дэкала терэлпэ кадя, сар вонэ ԥэндэ, ай дэкала най, и када анэн каринг кода, кай лэ манушэсти ашэл найдраго, кай на вижыля кадя, сар во аштярэлас. Андо 1912 бэрш о Гульельмо Маркони, саво стердя о телеӷрафо би проводоско ԥэндя: «Авэла время, андэ сави бут со авэла би проводонэнго и через када и война на авэла». О барэдэр андэ фирма «Декка», андэ сави запистрон и диля, андэ 1962 бэрш, саво отԥэндя лэ манушэнди анда ӷруппа «Битлз», гиндояс, кай и мануша, савэ дилабэн пэ ӷитары, вижан анда мода.
Бут мануша камэн тэ уӷанэн, со авэла англэ и важ када жан кодэлэндэ, ко драбатярэн найманушыканэ зорэса. Дэсавэ жан каринг и мануша, савэ драбатярэн па черӷая. Ай авэр диқэн, сжалпэ кода, со лэндэ андэ жизня кодэлэса, со ԥэнэнпэ андо ӷороскопо чи най. Кода, со ԥэнэн и мануша, савэ драбатярэн па черӷая и со ԥэнэнпэ андо ӷороскопо, линэ тэ пистрон андэ журналоря и андэ ӷазеты. Ай варико жал каринг кодэла, ко драбатярэн, кай тэ ԥэнэн, со авэла англэ чи каринг кодэла, ко калдуин, савэ ԥэнэн, кай ӷанэн тэ драбатярэн па патря, па вас чи па числоря.
Андэ дэлмутни время, дэсавэ мануша жанас каринг кодэла, ко пэрэдэнас и алава лэ найчачунэ дэвлэндар, савэ ԥэнэнас, со авэла англэ. Пэ кацаво мануш, савэстэ жанас, ԥэнэнас ора́куло, кадяжэ ԥэнэнас жрецо чи жрица. О лидийско царё Крёзо бишалдя кучутнэ подаркоря лэ оракулости андэ Греция андо пурано форо Дельфы. Состэ? Кай тэ уӷанэн, вицэлэла во андэ война, кала жала по персидско царё по Киро чи най. О ора́куло ԥэндя, кай о Крёзо розмарэла «о баро ӷосударство» и жала войнаса пэ персоря. О Крёзо фартэ патяя андэ кода, со о ора́куло ԥэндя и важ када во кадя и стердя. Но каринг со када андя? Во процэлдя андэ война и вся лэско ӷосударство розмардэ!
Андэ кода, со о ора́куло ԥэндя, сас дуй гиндоря и када на андя нисаво лашимос андэ кодэя война. Всаек ек анда варисаво ӷосударство авелоп розмардо. О Крёзо бут со хасардя, важ кода кай на гиндосардя, со авэла англэ. Хэба, ԥэнэса, кай кодэла, савэ через о драбатяримос адес камэн тэ уӷанэн, со авэла англэ, на попэрэна андэ бида?