И Хульда домарделя пэстири цэль

ЕСЛИ тумэ авелоп дэсавэ бэрша май палпалэ по найбаро острово Санги́хе андэ Индонезия, тоди по бэрэӷо наверно тумэ додиқлоп тринэ амарэ ԥэян. Вонэ драго ӷанэн лэ манушэн, савэ котэ жувэн. Важ кода кай поможын лэнди тэ уӷанэн пала Библия. Но пэ кадэва разо и ԥэя залэнаспэ совсем авря диласа.

Спэрва вонэ зажанас андэ моря и вицырдэнас по бэрэӷо барэ бара. Дэсавэ сас, сар о футбольно мячо. Тоди и ԥэя бэшэнас пэ каштунэ стулочки и чоканоса розмарэнас и бара, кай вонэ тэ авэн май цыкнэ, чем о парноро. Тоди вонэ стидэнас кадэла цынёне барора андэ пластикови вадры и андярэнас упрэ па лестница каринг пэско цэр. Котэ вонэ шушарэнас и бара андэ барэ гонэ. Тоди вонэ зашонас кадэла гонэ андэ машыны и одындярэнас кордэ, кай терэн и дрома.

Ек анда кадэла ԥэя сас и Ху́льда, обычно вой терэлас бути дэсавэ часоря, кай тэ затерэл ловэ пэ кода, со трэбуй латирэ ерести. Но латэ появисайля инке ек цэль — вой камэлас тэ тинэн планшэто. Важ кода кай латэ тоди авелоп JW Library^®. И Хульда ӷанэнас, кай если латэ авэла кадэя проӷрама, вой сможэт тэ сыкавэл и видеоря, статьи и тэ поможый лэ манушэнди май драго тэ полэн и Библия.

Шон и епаш и Хульда терэлас бути кажно тэсара пэ дуй часоря май бут. Вой розмардя кадя бут бара, кай лэнца можно сас тэ ԥэрэс найбаро ӷрузавико. Латэ вижыля тэ стидэл и ловэ, кай тэ тинэл о планшэто.

И Хульда ԥэнэн: «Тэ розмарэс и бара — дила найвушэро. И мэ канешно фартэ вицыювавас, вся и тила дуқалас. Но мэ ӥто бистэрдэм пала када, кала лэм андэ вас мэрно нэво планшэто. Лэса манди май вушэро тэ проповедую, тэ ӷотовлюсь каринг и собрании». Кадяжэ и Хульда ԥэнэн, кай о планшэто особенно приӷодисайля лати, кала сас и пандэмия. Андэ кадэя время всаворэ встречи и служэния сас па интэрнэто. Амэ фартэ ради важ и Хульда, кай вой домарделя пэстири цэль!