ӶЛАВА 25
Сар о мануш тэ парашэл тэ терэл билажавардимос корко пэса?
«Мэ лэм тэ терав билажавардимос корко пэсаa, кала манди сас 8 лет. Потом мэ уӷанглэм, сар о Дэл диқэл пэ када. Кажно разо, кала мэ када теравас, мэ нэнавидел пэс. Мэ часто гиндосаравас: «Хэба можэт о Дэл тэ любий кацавэс, сар мэ?» Луис
КАЛА о бэято лэл тэ ашэл май взросло, тоди кода, со исин кати машкар хулай и хулаи, кадэла жылании ашэн май барэ. И через када о мануш можэт тэ лэл тэ терэл билажавардимос корко пэса. Бут мануша гиндон, кай када нинай нисо и кадя ԥэнэн: «Кадэлэстар нико инке на муля!» Но исин ек фартэ бари причина, васо трэбуй тэ обнашас кацави поведения. Андэ Библия пистромэ и алава, савэ ԥэндя о апостало Павло: «Улэн и найлашэ жылании» (Колоссянам 3:5). Кала терэн билажавардимос корко пэса, када на улэл и жылания, ай наоборот терэл, кай май фартэ тэ камэлпэ када.
● О мануш терэл билажавардимос корко пэса, важ кода кай во любий кати корко пэс. Андэ кадэва маменто лэсти фартэ драго корко пэса.
● Кодэла, ко терэл билажавардимос корко пэса, диқэн пэ жувля чи пэ мурш кати сар пэ кодэла, каса вонэ моӷут просто тэ пэрэсовэн?
● Через кацави привычка о мануш лэл тэ гиндой май бут пала пэстирэ жылании и кадэлэстар можэт тэ авэл бари проблема андо брако. Васо? Важ кода кай кастэ ужэ исин кацави найлащи привычка, лэсти можэт ужэ тэ на чалёл кода, со трэбуй тэ авэл машкар хулай и хулаи.
Кажно разо, сар кай о мануш авэн кацавэ жылании, во трэбуй тэ старыйпэ тэ зритярэл корко пэс (1 Фессалоникийцам 4:4, 5). Во трэбуй тэ приашундёлпэ каринг о библейско совето и тэ обжал кода, через со можэт тэ появийпэ кацави жылания (Притчи 5:8, 9). Ай со если о мануш нащи мэкэл кадэя найлащи привычка? Можэт ужэ о мануш най еқвар камэлас тэ отшындёл кадэлэстар, но лэстэ кадя нисо и на вижыля и во ужэ лэл тэ гиндой, кай лэстэ на вижала тэ жувэл па лэ Дэвлэстирэ принцыпоря! Во гиндой, кай калэса нисо на терэса? Имено кацавэ гиндоря сас кай о Пэдро. Во росԥэнэн, кай кажно разо, кала лэстэ на вижалас тэ зритярдёлпэ, лэсти кадэлэстар сас фартэ ԥарэс по ди. Во гиндояс, кай лэс о Дэл никала на простия. Лэсти сас ԥарэс тэ мангэлпэ.
Если и тутэ кацаво по ди, на умэк и вас, важ кода кай бут тэрнэ и взросли мануша ужэ мэклэ кадэя привычка!
Сар о мануш фартэ тэ на дошалярэл пэс?
Кодэла, ко терэл билажавардимос корко пэса, моӷут пэс тэ дошалярэн. Но када можэт тэ поможый тэ ашавэл о мануш кадэя привычка, важ кода кай лэстэ авэла «сожаления, сави уӷодно лэ Дэвлэсти» (2 Коринфянам 7:11). Но и если черезчур о мануш пэс дошалярэл, када можэт тэ авэл опасно. Во можэт кадя тэ умэкэл и вас, кай потом лэсти авэла ԥарэс тэ борийпэ (Притчи 24:10).
Билажавардимос корко пэса – када мэлали привычка. Через латэ о мануш можэт тэ ашэл рабоса, и во ужэ нэ можэт тэ на гиндой пала када, и лэстэ май бут найлашэ жылании и найлашэ гиндоря (Титу 3:3). Но если тутэ исин кацави найлащи привычка, на гиндосар, кай терэс бэзэх, саво на простияпэ. Ӷлавно, на параш тэ терэс вся, кай кацави найлащи привычка тутэ тэ на авэл. Кадэя найлащи привычка — када най сар о билажавардо бэзэх, во нэ щитаеца грубо розврато (Иуды 7).
О мануш можэт вушэро тэ умэкэл и вас посли кода, сар на зритярделяпэ. Если када кацаво тердяпэ, то трэбуй о мануш тэ погиндой пала алава, савэ запистромэ андэ Притчи 24:16: «Ко кандэл лэ Дэвлэс, можэт и семь разоря тэ пэрэл, но всаек ущела, ай и вэрыти мануша пэрэна и на ущена, кала авэла и бида». Если о мануш домэкля и слабость, када на сыкавэл, кай о Дэл лэс никала на простия. Важ када на умэк и вас. Фэдэр розлэпэ, со имено андя тут каринг кода, кай ту на зритярделян и на тер упалэ кадэя жэ ошыбка.
Витидэ время, кай тэ погиндос пала кода, сар о Дэл любий и жалуий лэ манушэн. О псалмопевцо о Давидо пистросардя: «Сар о дад жалуий анда вся оди лэ шавэн, кадя о Иегова анда вся оди жалуий кодэлэн, ко дарал лэстар, важ кода кай во драго ӷанэн, андар со амэ стердэ. Во сэрэл, кай амэ прахо» (Псалом 103:13, 14). Да, о Иегова ӷанэн, кай амэ нэсовершэни, сар и сас о Давидо и «ӷотово тэ простий», кала амэ терас ошыбки (Псалом 86:5). Но во кадяжэ камэл, кай амэ тэ пристас зор тэ мэкас и найлашэ привычки. Со андэ када поможыя?
Ав осторожно, кала витидэс, сар тэ отцыёс. Пуш пэстар: диқав мэ кацавэ киноря или проӷрамы, через савэ моӷут тэ авэн найлашэ жылании? Или зажав мэ пэ кацаво сайто, кай котэ исин билажавардимос? О псалмопевцо мангэласпэ лэ Дэвлэсти: «Улэ па мэрнэ яқа кода, со нисо на ашэл» (Псалом 119:37)b.
Сытюв тэ гиндос пала варисо авэр. О христианино, савэс ақарэн Уильямо ԥэнэн, кай фэдэр пэ рят тэ адиносарас варисо пала Дэл. Фартэ важно англа кода, сар тэ засовэс, кай тирэ послидни гиндоря тэ авэн пала варисо лашо (Филиппийцам 4:8).
Росԥэн варикасти пала пэстири проблема. Можэт ту гиндос, кай пала кацаво лажаво тэ росԥэнэс. Но када поможыя тути тэ мэкэс кадэя привычка. О христианино, савэс ақарэн Давид, росԥэндя пала пэстири найлащи привычка пэстирэ дадэсти. Посли када лэстэ, ԥэнэса, бар па ди спэля, важ кода кай во диқля, кай лэско дад на холявэл пэр лэстэ. Во ковлэс ԥэндя: «Мэ фартэ абуросарав туса». Лэ Давидоско дад ӷанэнас, скати зор пристодя лэско шаво, кай тэ росԥэнэн лэсти када. О Давидо ԥэндя, кай нисо лэсти кадя на придиноп зор, сар кадэла лэ дадэстирэ алава.
Лэ Давидоско дад ԥэрнадя дэсавэ стихоря анда Библия и поможысардя пэстирэ шавэсти тэ полэл, кай во на зажыля дур. Потом о дад инке сыкадя дэсавэ стихоря, кай тэ полэл, пэ скати о Давидо полэл, кай кацави привычка нэправельно англа Дэл. О дад ԥэндя, кай прожала время, и во инке еқвар рияпэ кай кадэя дума. Ай инке ԥэндя, если дажэ када повторияпэ тэ на умэкав и вас, ай тэ проритярдював май бут. Со поля о Давидо? Во ԥэнэн: «Май бут всаворэстар манди поможысардя кода, кай пала мэрни проблема варико ӷанэнас и поможыяс манди»c.
Случайно билажавардимос – када терэлпэ най дэзначай. Васо када кадя?
[Сноски]
a Исин бари разница андэ кода, кала о мануш терэл билажавардимос корко пэса и кала кадэла жылании лэнпэ корко пэстар. Кай и щеёра када бывает или жы каринг кода, кала залэнпэ и месячни или посли лэндэ. Ай кай и шаворэ бывает кадя, кай вонэ прошонпэ кодэлэстар, кай лэндэ кацави жылания ашэля фартэ бари или о ҭан, пэ саво во совэл, ашэл вимақло. Ай кала о мануш терэл билажавардимос корко пэса, — када во спецыально терэл кадя, кай тэ авэн кацавэ жылании.
b Май бут инфармацыя можно тэ виарақэн андэ 33 ӷлава, том 2.
c Май бут инфармацыя можно тэ виарақэс пэ страницэ 239 — 241, том 2.
ӶЛАВНО СТИХО АНДА БИБЛИЯ
„Важ када наш кодэлэстар, со камэлпэ андэ тэрнэ бэрша, но домардюв, кай тэ ритярэс лэ Дэвлэско законо, тэ патяс, тэ любис и кай тэ авэл мирно вмести кодэлэнца, ко вужэ одеса ақарэл лэ Дэвлэс“. 2 Тимофею 2:22
СОВЕТО
Мангпэ жы каринг кода, сар и жылания тэ ашэл инке май бари. Манг кай о Иегова «зор, саво май баро обычнонэстар», кай тэ зритярдёс (2 Коринфянам 4:7).
АЙ ТУ ӶАНЭС...
Слабо мануш, кала ашэлпэ екжэно, можэт тэ стерэл билажавардимос, ай кодэва, ко можэт тэ ритярэл пэс андэ вас, када на терэла, дажэ кала лэс нико на диқэл.
МЭ СТЕРАВА КАДА
Мандэ авэна вужэ гиндоря, если мэ... ․․․․․
Мэ на терава кода, со манди камэлпэ, ай терава... ․․․․․
Кода, со мэ камав тэ пушав кай о дад и дэй... ․․․․․
САР ПА ТИРЯТЭ?
● Васо важно тэ сэрас, кай о Иегова «ӷотово» тэ простий? (Псалом 86:5).
● О Дэл создал лэ манушэн кадя, кай лэндэ тэ авэн жылании, савэ исин кай хулай и хулаи. Но во и ԥэнэн, кай и мануша тэ зритярдёнпэ андэ када. Кочай, со о Дэл камэл, кай ту тэ терэс?
[Вставка]
„Мэ справилась пэстиря проблемаса и акана мэрни совесть вужи англа Иегова. Ни пэр со на парувава кадэла чуства!“ Сара
[Картинка]
О спорцмено, саво нашэл, пэля, но када на сыкавэл, кай во ужэ процэлдя и лэсти будэр на трэбуй тэ прастэл. Если ту бориспэ ла привычкаса, сар билажавардимос корко пэса, и на зритярделян, када на римой кода, со ту ужэ домарделян