Тэлю лэ Дэвлэсти кадя, кай тэ уӷодис лэсти

1, 2. Со трэбуй тэ пушэс пэстар и васо?

ИСИН бут мануша, савэ ԥэнэн пэр пэстэ, кай патян андо Дэл, ай екжэнэ на сытярэн и на терэн кадя, кай тэ уӷодин лэ Дэвлэсти. И кала ту лян тэ сытёс па Библия, ту полян када (2 Коринфянам 6:17). О Иегова ԥэнэн амэнди, кай трэбуй тэ вижас анда хохавнэ веры, пэ савэ ԥэнэн «Вавилоно Велико» (Откровение 18:2, 4). Со терэса ту? Кажно андар мэндэ трэбуй тэ пушэл пэстар: «Сар мэ камав тэ тэлював лэ Дэвлэсти, кадя, сар во камэл, чи кадя, сар мэ присытелэм?»

² Если ту ужэ вижылян анда хохавни вера, када драго. Но, файма, тутэ всаек варикай андо ди инке исин кода, со чалёл анда абычаёря, савэ исин андэ хохавнэ веры. Подам дума пала кодэла абычаёря, савэ всаворэ терэн. Кадяжэ уӷанаса, васо пэр лэндэ трэбуй тэ диқэс кадя, сар пэр лэндэ диқэл о Дэл.

КАЛА МАНГЭНПЭ ПЭ КОДА, СО РИСУИН И ЛЭ МУЛЭНДИ

3. а) Васо варикасти можэт тэ авэл ԥарэс тэ мангэлпэ лэ Дэвлэсти би кодэлэско, со рисуин чи инке через варисо авэр? б) Со пала када пистромэ андэ Библия?

³ Дэсавэ мануша бут бэрша мангэнпэ лэ Дэвлэсти через кода, со рисуин, через и статуи чи инке через варисо авэр. Ай кадяжэ кай и мануша андо цэр исин свынто вуӷло. Можэт ту кадя и присытелян тэ тэлёс лэ Дэвлэсти. Би кадэлэско тути здэлпэ тэ тэлёс лэ Дэвлэсти чудно и нэправильно. Но на бистэр, кай ек о Дэл ришает, сар трэбуй лэсти тэ тэлён. Андэ Библия драго пистромэ, кай о Иегова на камэл, кай амэ тэ мангаспэ лэсти через и масхаря, статуи чи инке через варисо. (Адиносар Исход 20:4, 5; Псалом 115:4—8; Исаия 42:8; 1 Иоанна 5:21.)

4. а) Васо на трэбуй тэ мангаспэ лэ мулэнди? б) Васо о Иегова приԥэндя лэ израильтянонэнди тэ на дэн дума лэ мулэнца?

⁴ Дэсавэ мануша отдэн бут зор, время и тратин бут ловэ пэ кода, кай тэ уӷодин пэстирэ чаченди, савэ мулинэ. Файма, вонэ дажэ лэнди мангэнпэ. Но, сар амэ ужэ уӷанглям, и мулэ нэ моӷут ни тэ поможын, ни тэ терэн амэнди варисо вэрыто. Вонэ будэр никай на жувэн. Трэбуй тэ фэриспэ, кай тэ на дэс дума лэ мулэнца, важ кода кай любо «дума» лэнца, сави здэлпэ жал лэндар, па чачимастэ жал лэ найвужэндар. Акэ васо о Иегова приԥэндя лэ израильтянонэнди тэ на терэн нисо, кай тэ дэн дума лэ мулэнца. Вонэ трэбуй сас тэ обжан вся, андэр со исин бэнгалимос (Второзаконие 18:10—12; Дик и ссылка 26 и 31.)

5. Со поможыя тути тэ на мангэспэ лэ Дэвлэсти через кода, со рисуин чи инке через варисо авэр и тэ на мангэспэ лэ мулэнди?

⁵ Тоди тэ мангэспэ лэ Дэвлэсти через кода, со рисуин, и кадяжэ тэ мангэспэ лэ мулэнди, када нэправильно. Но сар тэ парашэс када тэ терэс? Адиносар и Библия и гиндосар, сар о Иегова диқэл пэ кода, кала мангэнпэ кадя. Важ лэстэ када гряца (Второзаконие 27:15). Кажно дес мангпэ лэ Иеговасти, кай во тэ поможый тути тэ диқэс лэстирэ яқэнца, сар ту мангэспэ. Манг, кай во тэ поможый тути тэ служыс лэсти кадя, сар во када камэл (Исаия 55:9). Патя, о Иегова дэла тути зор тэ отшос вся, со исин андэ хохавнэ веры.

ТРЭБУЙ ЧИ НАЙ АМЭ ТЭ ТЕРАС О РОЖДЕСТВО?

6. Васо о дес, кала арақаделяпэ о Иисусо, линэ тэ стон 25 декабря?

⁶ Само ашунгло празнико машкар и мануша, када Рождество. И мануша андэ кадэва дес стон празнико, кай арақаделяпэ о Иисус Христос. Тумэ ӷанэн, кай о празнико Рождество жал анда хохавнэ веры? Андэ ек инцыклапедия росԥэнэнпэ, кай 25 декабря и мануша, савэ жувэнас андо Римо и на сас христианоря, стонас о празнико, кай арақаделяпэ о қам. И рашая камэнас, кай и мануша, савэ найхристианоря, тэ авэн христианоря. Важ када, вонэ стердэ кадэва дес, сар дес, андэ саво арақаделяпэ о Иисусо. Но па чачимастэ о Иисусо най андэ кадэва дес арақаделяпэa (Луки 2:8—12). Лэ Иисусостирэ ученикоря на стонас о празнико, кала арақаделяпэ о Иисусо. Андэ ек книжка пистромэ, кай посли кода, сар арақаделяпэ о Иисусо, инке 200 бэрш «нико на шолас сама и нико на ӷанэнас, кала во арақаделяпэ» (Sacred Origins of Profound Things). О Рождество линэ тэ терэн, кала прожылэ най еқвар по сто бэрша посли кода, сар муля о Иисусо.

7. Васо и чачунэ христианоря на терэн о Рождество?

⁷ Бут мануша ӷанэн, кай и абычаёря, савэ исин по Рождество, када, кала дарин и подаркоря чи стон и мисяйля, вся када жыля лэ манушэндар, савэ найхристианоряb. Важ када варикала андэ Англия и андэ авэр ҭана андэ Америка, на мэкэнас тэ терэн о Рождество. Пэ кодэла, ко лэс терэлас, стонас штрафо. Но прожыля время и мануша упалэ линэ тэ терэн кадэва празнико. И чачунэ христианоря на терэн о Рождество, важ кода кай камэн тэ кандэн лэ Дэвлэс.

ТРЭБУЙ ЧИ НАЙ АМЭ ТЭ ТЕРАС ДЕНЬ РОЖДЕНИЯ?

8, 9. Васо и пэрви христианоря на терэнас день рождения?

⁸ Исин инке ек празнико, саво чалёл всаворэнди, када день рождения. Можно лэ христианонэнди тэ терэн кадэва празнико чи най? Андэ Библия пистромэ пала дэсавэ мануша, савэ терэнас день рождения. Но вонэ на сас лэ Дэвлэстирэ служытеля (Бытие 40:20; Марка 6:21). Пэ кацавэ празникоря и мануша прославинас лэ хохавнэ дэвлэн. Важ када, сар пистромэ андэ ек инцыклапедия, и пэрви христианоря «полэнас, кай любо день рождения, када о абычаё, саво терэнас и мануша, савэ на сас христианоря» (The World Book Encyclopedia).

⁹ И найхристианоря андэ дэлмутни время гиндонас, кай кажно мануш арақадёлпэ андо дес варисавэ еқэ дэвлэско. Вонэ патянас, кай о мануш трэбуй тэ стол пэско день рождения, кай лэско дэл тэ фэрий лэс вся лэстири жызня.

10. Васо и христианоря на трэбуй тэ терэн и день рождения?

¹⁰ Сар о Иегова диқэл пэ празникоря, савэ жан анда хохавнэ веры? (Исаия 65:11, 12). Вонэ лэсти на чалён. Важ када амэ на терас нисавэ день рождении, ни авэр празникоря анда хохавнэ веры.

ФАРТЭ КАДА ВАЖНО?

11. Васо лэ манушэнди чалёл тэ терэн празникоря? Со трэбуй важ амэндэ тэ авэл май важно?

¹¹ Дэсавэ мануша ӷанэн, кай о Рождество и авэр празникоря жылэ анда хохавнэ веры. Но вонэ всаек лэн терэн. Вонэ гиндон, кай пэ кадэла празникоря стидэлпэ вся о ери, кай драго тэ проандярэн и время. Ай со гиндос ту? Канешно, тэ проандярэс и время лэ ереса, када фартэ трэбуй. О Иегова, саво создал о ери, камэл, кай и еря тэ авэн дружни (Эфесянам 3:14, 15). Канешно, если амэ жаса кай о родо по празнико, саво жал анда хохавнэ веры, када лэнди чалёла. Но май важно важ амэндэ тэ фэрисарас и дружба лэ Иеговаса. О апостоло Павло ԥэндя: «Вся и время уӷан май драго кода, со чалёл лэ Дэвлэсти» (Эфесянам 5:10).

12. Савэ празникоря най уӷодни лэ Иеговасти?

¹² Бутэ манушэнди всаек катар жылэ празникоря. Но о Иегова кадя на гиндой. Лэсти най уӷодни и празникоря, савэ жан анда хохавнэ веры, или савэ прославин варикас анда мануша или празникоря, савэ исин андэ страна. Акэ ек примеро. Кай и египтяноря сас бут празникоря важ и хохавнэ дэвла. Кала и израильтяноря вижылэ анда Египто, вонэ линэ тэ терэн ек анда лэндирэ празникоря. И хоть вонэ ԥэндэ пэр лэстэ «празнико важ о Иегова», о Иегова наказал лэн важ када (Исход 32:2—10). Андэ Библия пистромэ важ амэндэ: «На лэнпэ каринг кода, со найвужо». (Адиносар Исаия 52:11.)

ГИНДОН, СО ПО ДИ АВРЭНДЭ

13. Савэ вопросоря моӷут тутэ тэ авэн, если ту витидэс тэ на терэс и празникоря?

¹³ Если тумэ витидэ тэ на терэн и празникоря, можэт тумэ всаек пэрэжываете и пушэн пэстар: «Со мэ ԥэнава кодэлэнди, каса пэ бутятэ, если вонэ пушэна мандар, васо мэ на терав лэнца и празникоря? Тэ лав и подаркоря, савэ дарин по празнико чи най? Со тэ терав, если о хулай чи и хулаи мангэл, кай мэ лэ ереса тэ терав о празнико? Ай со тэ терав, кай лэ бэятонэнди тэ на авэл обидно, важ кода кай на терав и день рождения или авэр празникоря?»

14, 15. Со тэ терэс, если тут поздравин лэ празникоса чи варисо дарин?

¹⁴ Исин разни маменторя. Важ када кажно разо трэбуй драго тэ погиндос пала кода, со тэ ԥэнэс и со тэ терэс. Например, если варико поздравий тут лэ празникоса, ту можэш тэ поблаӷодарис кодэлэ манушэс. Но если во чи вой камэл тэ уӷанэн, васо ту на терэс кадэва празнико, можно тэ росԥэнэс, васо ту лэс на терэс. Дэ дума вся и время ковлэс и полэ, со лэ манушэстэ по ди. Андэ Библия пистромэ: «Сар о хамос вкусно лонэса, мэк и дума тумари вся и время авэла приятно, кай тумэ тэ ӷанэн, сар тэ дэн дума кажнонэса» (Колоссянам 4:6). Например, можно тэ ԥэнэс, кай тути чалёл тэ проандярэс и время лэ друӷонэнца, тэ побэшэс лэнца и варисо тэ подарис, но тути на камэлпэ тэ терэс када по празнико.

¹⁵ Ай со тэ терэс, кала тути варисо дарин по празнико? Андэ Библия пала када най пистромэ. Но андэр латэ пистромэ, кай амари совесть трэбуй тэ авэл вужи (1 Тимофею 1:18, 19). Можэт о мануш, саво дарий о подарко, на ӷанэн, кай ту на терэс и празникоря. Или ӷанэн и всаек ԥэнэн: «Хоть ту на терэс кадэва празнико, мэ камав тути тэ дав кадэва подарко». Андэ лэдуй маменторя тэ лэс кода, со дарин чи най, тэ витидэс прижалапэ тути. Ӷлавно, кай тири совесть тэ авэл вужи англа Дэл. Амэ на камлоп тэ терас кода, со можэт тэ римой амари дружба лэ Иеговаса.

И ПРАЗНИКОРЯ И О ЕРИ

16. Со тэ терэс, кала тиро ери камэл, кай ту лэнца тэ авэс пэ варисаво празнико?

¹⁶ Со тэ терэс, если тиро ери, камэл тэ стол варисаво празнико? На трэбуй тэ спориспэ. На бистэр, кай кажно можэт тэ витидэл важ пэстэ, со тэ терэл. На доԥэн пэско, ай сто патив пэ кода, со витидэла о ери, важ кода кай и ту камэс, кай тэ стон патив пэ кода, со ту витидэс. (Адиносар Матфея 7:12.) Ай со если о ери камэл, кай ту лэнца тэ авэс по празнико? Со май пэрво, мангпэ каринг о Иегова. Манг лэс тэ поможый тути тэ витидэс, сар тэ терэс правильно. Старысав тэ уӷанэс май бут пала кадэва празнико и пала кода, сар во лэла тэ прожал. Кала витидэса, со тэ терэс, на бистэр, кай ӷлавно трэбуй тэ уӷодис лэ Иеговасти.

17. Со можно тэ стерэс, кай тирэ бэятонэнди тэ на авэл обидно, важ кода кай на терэс и празникоря?

¹⁷ Со можно тэ стерэс, кай тирэ бэятонэнди тэ на авэл обидно, важ кода кай на терэс и празникоря, сар терэн авэр? Время времятар ту можэш тэ стидэс лэ бэятонэн и тэ стерэс важ лэндэ варисо, кай лэнди тэ авэл интересно. Ту можэш тэ стерэс лэнди подаркоря, кала вонэ лэн на мангэн. Со май лашо ту можэш тэ дэс пэстирэ бэятонэнди, када тири любовь и внимания.

ТЭЛЮ ЛЭ ДЭВЛЭСТИ КАДЯ, САР ЛЭСТИ УӶОДНО

18. Васо важно тэ ԥирэс пэ собрании?

¹⁸ Кай тэ радуис лэ Иеговас, трэбуй тэ вижас анда хохавнэ веры. И тэ парашэс тэ ритярэс и абычаёря и празникоря, савэ жан анда хохавнэ веры. Но када на хутилэла! Трэбуй тэ тэлёс лэ Дэвлэсти кадя, сар лэсти уӷодно. Сар? Например, тэ на промэкэс и собрании. (Адиносар Евреям 10:24, 25.) Кала тэлёс лэ Дэвлэсти, фартэ важно тэ авэс пэ собрании (Псалом 22:22; 122:1). Ай инке пэ собрании и мануша подритярэн ек еқэс (Римлянам 1:12).

19. Васо трэбуй тэ росԥэнэс аврэнди, со ту уӷанглян анда Библия?

¹⁹ Кадяжэ трэбуй тэ росԥэнэс аврэнди кода, со ту уӷанэс анда Библия. Бут мануша фартэ пэрэжывают, кай андэ люма бут найлашимос. Файма, кацаво жэ по ди варикастэ, кас ту ӷанэс. Росԥэн лэнди пала лашимос, саво авэла англэ. Ԥир пэ христиански собрании и росԥэн аврэнди кода, со ту уӷанэс анда Библия. Прожала время и ту полэса, кай будэр на камэс нисо, со исин андэ хохавнэ веры. Патя, если ту лэса тэ тэлёс лэ Иеговасти кадя, сар лэсти уӷодно, тутэ авэла бут радость и лашимос лэ Иеговастар! (Малахия 3:10).