О Иаково и Исаво поладисардэ машкар пэстэ

О Иегова дя алав лэ Иаковости, кай лэла тэ фэрий лэс кадя же, сар фэрияс лэ Авраамос и лэ Исаакос. О Иаково ля тэ жувэл андо форо Харрано. Котэ во женисайля, лэстэ арақаделэпэ бут бэятцэ, и во ашэля фартэ барвало.

И акэ о Иегова ԥэндя лэ Иаковости: «Рисав андэ кодэя ԥув катар ту авелян». Важ када о Иаково пэстирэ ереса жыля андо баро дром. Па дром во диқля лэ манушэн, савэ лэсти ԥэндэ: «Каринг тутэ жал тиро ԥрал о Исаво и лэса инке 400 мурша!» О Иаково пэрэдарайля, кай о Исаво закамэла тэ стерэл варисо вэрыто лэсти и лэстирэ ерести. Во мангля лэ Иеговас: «Мангав тут, фэрисар ман мэрнэ ԥралэстар». Пэ авэр дес о Иаково бишалдя бутэн бакрэн, бузнэн, гурувэн, верблюдонэн и ишаконэн.

Андэ кодэя же рят, кала о Иаково сас екжэно, во додиқля лэ анӷелос! О анӷело ля тэ борийпэ лэса жы кай тэсара. Тердяпэ кадя, кай лэ Иаковостэ ля тэ дуқал о пэрно. Но во всаек на здэласпэ. О анӷело ԥэндя: «Одмэк ман». Но Иаково ԥэндя лэсти: «На одмэкава, пока на ԥэнэса, кай мандэ авэла вся драго».

Тоди о анӷело ԥэндя лэ Иаковости, кай лэстэ авэла вся драго. Акана о Иаково ӷангля, кай о Иегова на домэкэла, кай о Исаво тэ стерэл лэсти варисо вэрыто.

Тэсара о Иаково додиқля, кай пашол о Исаво и лэса 400 мурша. О Иаково жыля май англэ пэстирэ ерестар, кай вонэ тэ ашэнпэ палал и семь разоря тэлеля пэстирэ ԥралэсти. О Исаво прастая каринг о Иаково и обля лэс. Тоди и ԥрала линэ тэ ровэн, и поладисардэ машкар пэстэ. Сар па тирятэ, чалеля лэ Иеговасти, сар андярдя пэс о Иаково андэ кадэя ԥари время?

О Исаво рисайля каринг пэстэ цэрэ, ай о Иаково жыля пэстирэ дромэса. Кай о Иаково арақаделэпэ 12 шавэ. Лэн ақарэнас Рувимо, Симеоно, Левиё, Иуда, Дано, Неффалимо, Гадо, Асиро, Иссахаро, Завулоно, Иосифо и Вениамино. Через ек андар лэндэ, о Иегова спасысардя пэско народо. Кодэлэ шавэс ақарэнас Иосифо. Сар када сас? Уӷанам.