Вонэ на зритярдэ о алав

О Иегова ԥэндя лэ Моисеёсти: «Ваздэпэ мандэ по плай. Мэ пистросарава законоря пэ бара и дава тути». О Моисеё вазгляпэ по плай и сас котэ 40 деса и 40 рятя. О Иегова запистросардя дэш барэ законоря пэ дуй бара и дя лэн лэ Моисеёсти.

Прожыля набут время. Израильтяноря линэ тэ гиндон, кай о Моисеё на рияпэ и ԥэндэ лэ Аароности: «Амэнди трэбуй, ко лэла тэ андярэл амэн. Стер амэнди дэвлэс!» О Аароно ԥэндя: «Анэн тумаро сомнак». О Аароно стидя о сомнак, росплависардя лэс и стердя гуруворэс. И мануша ԥэндэ: «Кадэва гуруворо, амаро Дэл, саво виандярдя амэн анда Египто!» Вонэ линэ тэ тэлён сомнаконэ гуруворэсти и стодэ важ када празднико. Драго када, со вонэ стердэ? Най! И мануша динэ алав тэ тэлён кати лэ Иеговасти. Кадя вонэ на зритярдэ пэско алав.

О Иегова диқля, со стердяпэ, и ԥэндя лэ Моисеёсти: «Жа тэлэ. И мануша на канглэ ман и линэ тэ тэлён хохавнэ дэвлэсти». Во ля тэ змэкэлпэ па плай, и андэ вас лэстэ сас дуй бара.

Кала о Моисеё поджалас каринг о лаӷерё, во ашундя, кай и мануша дилабэн, цэлэн и тэлён лэ гуруворэсти. О Моисеё фартэ росхоляйля. Во дядап дуй кадэла бара андэ ԥув и вонэ росԥаделэ пэ котора. После када во йто сԥабардя и вишутя лэ гуруворэс. Тоди во пушля кай о Аароно: «Со кацаво ԥэндэ тути кадэла мануша, кай ту стердян кадэва найлашимос?» О Аароно ԥэндя: «На холяв. Ту же ӷанэс кадэлэ манушэн. Вонэ закамлэ пэсти дэвлэс и тоди мэ шутэм лэнго сомнак андэ яг и ашэля кадэва гуруворо!» Лэ Аароности нащи сас када тэ терэл. О Моисеё рисайля по плай и ля фартэ тэ мангэлпэ, кай о Иегова тэ простий лэ манушэн.

О Иегова простисардя лэ манушэн, савэ камэнас лэс тэ кандэн. Ту диқэс, пэ скати сас трэбуй лэ израильтянонэнди тэ кандэн лэ Иеговас. Вонэ трэбуй сас тэ полэн, кай о Иегова стодя лэ Моисеёс, кай во тэ авэл барэдэр.