О царство, саво лэла тэ правий вечно

Еқвар и рят лэ царёсти лэ Навуходоносорости снисайля суно, саво во нащи полэлас. Во ля фартэ тэ загиндойпэ пала кода, со диқля и важ када во нащи засовэлас. Во ақардя пэстирэ манушэн, савэ драбатярэнас и ԥэндя лэнди: «Росԥэнэн манди, со сыкавэл мэрно суно, саво манди снисайля». Вонэ ԥэндэ: «Царё, росԥэн амэнди важ пэско суно». Но о Навуходоносоро ԥэндя: «Най, када тумэ трэбуй тэ росԥэнэн манди важ мэрно суно! Или мэ ԥэнава, кай тумэн тэ умарэн». И мануша, савэ драбатярэнас, упалэ манглэ лэ царёс: «Росԥэн амэнди важ пэско суно и амэ ԥэнаса, со сыкавэл кадэва суно». О царё ԥэндя: «Тумэ всаворэ хохавнэ! Йто росԥэнэн манди, со сыкавэл мэрно суно!» Вонэ ԥэндэ: «Нико анда мануша на ӷанэн када. Ту мангэс кода, со на стерэла нико».

О Навуходоносоро фартэ росхоляйля. Во приԥэндя тэ умарэн лэ манушэн, савэ подԥэнэнас лэсти, кадяжэ лэ Даниилос, лэ Седрахос, лэ Мисахос и лэ Авденагос. Но о Даниило мангля, кай о царё тэ дэл лэсти время, кай во тэ росԥэнэн, со сыкавэл лэско суно. После када о Даниило и трин лэстирэ друӷоря манглэпэ кай о Иегова, кай во тэ поможый лэнди. Со Иегова ԥэндя пэ лэндири молитва?

О Иегова дя лэ Даниилости тэ полэл лэ Навуходоносороско суно. Кадяжэ о Иегова росԥэндя лэ Даниилости, со сыкавэл кадэва суно. Пэ авэр дес о Даниило жыля кай ек лэ царёско слуӷо и ԥэндя: «На умар лэ манушэн, савэ подԥэнэн лэ царёсти. Мэ росԥэнава лэ царёсти лэско суно». О слуӷо андярдя лэ Даниилос каринг о Навуходоносоро. О Даниило ԥэндя лэ царёсти: «О Дэл сыкадя тути, со авэла англэ. Акэ со тути снисайля. Ту диқлян бари статуя. Лако шэро сас анда сомнак, о кулин и вас анда руп, о ило и кущик анда ха́ркум, и пэрнэ анда састри. Ай и талпы анда састри, савэ ӷамимэ ла ӷлинаса. Кадяжэ ту диқлян, кай лэ плаестар отԥаделя бар и дядап андэ ла статуятирэ талпы. И статуя росԥаделя и латар ашэляпэ ек о прахо, саво сԥурдя и балвал. Ай о бар ашэля барэ плаеса и ԥэрдя вся и ԥув».

Тоди о Даниило ԥэндя: «Акэ, со сыкавэл тиро суно. О шэро, саво анда сомнак, када тиро царство. Ла статуяти часть, сави анда руп, када авэр царство, саво лэла тэ правий после тутэ. Кадяжэ авэла трито царство анда ха́ркум, саво лэла тэ правий всаворя ԥувьяса. Штарто царство авэла састо, сар о састри. Ай о послиднё царство авэла, епаш састо, сар о састри, ай епаш авэла найсасто, сар и ӷлина. О бар, саво ашэля плаеса, када лэ Дэвлэско царство. Во улэла всаворэ царства и лэла тэ правий вечно».

Тоди о Навуходоносоро пэля англа Даниило пэ чанга, и тэлеля жы каринг и ԥув. О царё ԥэндя: «Кадэва суно росԥэндя тути тиро Дэл. Сар во, кацаво нинай нико». О Навуходоносоро най кати на умардя лэс. Во стодя лэс барэ манушэса понад кодэла, ко подԥэнэнас лэ царёсти. Кадяжэ, кай о Даниило тэ правий андо Вавилоно. Ту додиқлян, со о Иегова стердя после кода, сар Даниило мангляпэ?