Андэр со на шонпэ машкар пэстэ кодэла, ко кандэн лэ Дэвлэс и ко на кандэн?

1, 2. Саво исин ԥаримос кай лэ Дэвлэстирэ служителя? (Диқэн и картинка англа статья.)

КАЛА о врачо лечий лэ манушэс, савэстэ о насвалимос пэрэжал, о врачо трэбуй тэ сэрэл, кай трэбуй тэ фэрийпэ. Важ кода кай, кала во поможый аврэнди, во может екжэно тэ пэрэлэл о насвалимос. Када шолпэ, со исин андэ адесутни жизня. Амэ жувас машкар и мануша, ԥирас лэнца пэ ек бути. И амэ трэбуй тэ фэрисавас кодэлэстар, со лэндэ андо ди и пала со вонэ гиндон. Кода, кай вонэ пэс кадя андярэн, вонэ лэ Дэвлэсти по ди терэн найдраго.

² Андэ послидни деса на полэса, кай о лашимос, ай кай най. Андо 2 Тимофея, о апостоло Павло пэрэԥэндя кода, сар о мануш пэс андярэл, кала лэстэ нинай дружба лэ Дэвлэса. И андэ послидни деса кацавэн манушэн ашэл вся май бут и май бут. (Адиносар 2 Тимофея 3:1—5a, 13b). Кадэлэстар амэ на дас наздив. Но када на сыкавэл, кай амэ на пэрэласа лэ манушэндар, савэ жувэн андэ кадэва миро кода, со лэндэ андо ди, со во гиндон и сар андярэн пэс (Прит. 13:20). Андэ кадэя статья амэ подаса дума, андэр со на шонпэ, сар андярэн пэс и мануша андэ кадэва миро, андэ послидни деса, пэ Дэвлэстирэ служителя. Амэ кадяжэ подаса дума, сар тэ на пэрэлас кода, со андо ди и со гиндон и мануша, савэнди амэ росԥэнас важ о Дэл.

3. Пала кастэ пистросардя о Павло андо 2 Тимофея 3:2—5?

³ О Павло пистросардя, кай «андэ послидни деса авэла фартэ ԥари время». Тоди во пэрэԥэндя 19 моменторя, сар лэна тэ андярэн пэс и мануша андэ кодэя время. Када пистромэ андэ Римлянам 1:29—31. Но андо письмо Тимофея пистромэ алава, савэ будэр андэ Библия никай най пистромэ. Но кадя най всаворэ мануша лэна тэ андярэн пэс. И чачунэ христианоря андярэн корко пэс па аврятэ. (Адиносар Малахия 3:18c).

СО АМЭНДЭ АНДО ДИ КАРИНГ ПЭСТЭ?

4. Сар тумэ ԥэндоп, саво када мануш, кала во заваздэл о шэро?

⁴ О Павло пистросардя, кай и мануша лэна тэ любин кати корко пэс и тэ любин и ловэ. Во ԥэндя, кай вонэ кадяжэ лэна тэ патян андэр пэстэ, ай най андо Дэл, тэ гиндон пала пэстэ бут и тэ заваздэн о шэро. И мануша гиндон, кай вонэ май лашэ аврэндар, важ кода кай лэндэ бут со драго вижал, кай вонэ шукарнэ, барвалэ или барэ мануша пэ пэстири бути. И мануша, савэ кадя пэс андярэн, фартэ камэн, кай пэр лэндэ тэ шон сама, тэ дэн дума пала лэндэ и тэ тэлён лэнди. Акэ, со пистросардя ек учёно пала мануш, саво фартэ заваздэл о шэро: «Андэ лэско ди исин алтарё, кай во тэлёл корко пэсти, сар Дэвлэсти». Бут мануша ԥэнэн, кай кала о мануш заваздэл о шэро, када кадя ӷитко аврэнди, кай даже кацаво мануш вэрыцый аврэ манушэн, кала вонэ заваздэн о шэро.

5. Росԥэнэн пала лэ Дэвлэстирэ служителя, савэ завазглэ о шэро.

⁵ Кала о мануш заваздэл о шэро, лэ Иеговасти када гряца. Во вэрыцый кодэлэн, ко столо пэсти бари цэмин (Прит. 6:16, 17). Кала о мануш заваздэл о шэро, када на дэл лэсти, кай во тэ пашол каринг о Дэл (Пс. 10:4). Кадя андярэл пэс о Сатана (1 Тим. 3:6). Найдраго по ди, кала ашунэс, кала лэн тэ андярэн пэс кадя дэсавэ лэ Иеговастирэ служителя, савэ на парашэнас лэс тэ кандэн. О иудейско царё Озия бут бэрша на ашавэлас лэ Дэвлэс, важ кода кай любияс лэс. Но, андэ Библия ԥэнэнпэ: «Кала лэстэ ашэля бари власть, андэ пэско ди во ля тэ гиндой пала пэстэ бут и через када во хасардя вся. Во парашэля тэ кандэл пэстирэ Дэвлэс лэ Иеговас и зажыля андэ лэско храмо кордэ, кай по жертвеннико ԥабарэн и смесь, сави драго қандэл, кай тэ сԥабарэл ла». Май интя пэ дэсави время, кадяжэ о царё Езекия завазгля о шэро (2 Лет. 26:16; 32:25, 26).

6. Через со о Давидо мог тэ заваздэл о шэро? Васо во када на стердя?

⁶ Дэсавэ гиндон, кай лэндэ исин кода, васо вонэ могут тэ заваздэн о шэро. Када, кай вонэ шукарнэ, ашунглэ, драго дилабэн, баро зор или барэ мануша пэ пэстири бути. Кай о Давидо вся када сас. Но во всаек на заваздэлас о шэро. Кала во умардя лэ Голиафос, о Сауло ԥэндя лэсти, кай во тэ женийпэ пэ ек лэстири щей. Но о Давидо ԥэндя: «Ко кацаво мэ, мэрнэ дадэско ери, мэрно родо, андо Израилё, кай мэ тэ ашав лэ царёско зятё?» (1 Сам. 18:18). Со поможысардя лэ Давидости тэ на заваздэл о шэро? О Давидо ӷанэнас, кай вся со лэстэ исин када, кай о Дэл на заваздэл о шэро (Пс. 113:5—8). О Давидо полэлас, кай во сас баро мануш, бут со лэстэ драго вижалас и сар во пэс андярэлас, лэ Иеговастар. (Диқэн 1 Коринфянам 4:7.)

7. Со поможыя амэнди тэ на заваздас о шэро?

⁷ Андэ амарэ деса лэ Иеговастирэ служителя сытён кай о Давидо и бут со терэн, кай тэ на заваздэн о шэро. Амэн лэл лэ одестар, кала амэ ӷанас, кай о Иегова Всемогущё Дэл пэ дила сыкавэл, кай на заваздэл о шэро (Пс. 18:35). Амэ камас тэ терас кадя, сар пистромэ андэ Колоссянам 3:12: «Утидэнпэ андэ бари любовь, кай тэ полэн и тэ жалуин, и андо лашимос, на гиндон пала пэстэ бут, тэ авэл тумэндэ ковло ди, и ӷанэн тэ аштярэн». Амэ кадяжэ ӷанас, кала о мануш любий, во «на путёл, во на гиндой, кай май лашо аврэндар» (1 Кор. 13:4). Кала амэ на заваздас о шэро, тоди и мануша могут тэ закамэн тэ полэн лэ Иеговас. И хулая, савэ на терэн па лэ Дэвлэско алав, би алавэнго лэн тэ патян андэр лэстэ, через кода, кай и жувля драго андярэн пэс. Кадяжэ и мануша, савэ паша амэндэ, кала диқэн, сар амэ пэс андярас, кадяжэ закамэна тэ уӷанэн о чачимос анда Библия (1 Пет. 3:1).

САР АМЭ ОБЖАСПЭ АВРЭ МАНУШЭНЦА?

8. а) Со дэсавэ гиндон, кай и бэятцэ на кандэн лэ родителёнэн? б) Со андэ Библия ԥэнэнпэ, кай и бэятцэ трэбуй тэ терэн?

⁸ О Павло пистросардя, сар и мануша андэ послидни деса лэна тэ обжанпэ аврэнца. Па лэстирэ алава, и бэятцэ парашэна тэ кандэн лэ родителёнэн. Дэсавэ гиндон, кай и бэятцэ кадя и трэбуй пэс тэ андярэн. И киноря, и книжки, и передачи па телевизоро сытярэн кадэлэсти. Но, кала и мануша андо ери на кандэн, и еря могут тэ римонпэ. Када римой всаворэн манушэн андо миро. И када полэнас дэлмут. Андэ Древнё Греция лэ манушэстар, саво ваздэл о вас пэ родителя, залэнас гражданство. Ай андо Римо кодэва, ко дядап лэ дадэс спушэнас, сар кодэлэстар, ко умарэлас лэ манушэн. Андэ вся Библия ԥэнэнпэ, кай и бэятцэ трэбуй тэ стон патив и тэ кандэн пэстирэ родителёнэн (Исх. 20:12; Эф. 6:1—3).

9. Со поможыя лэ бэятонэнди тэ кандэн лэ родителёнэн?

⁹ Со поможыя лэ бэятонэнди тэ на пэрэлэн лэ миростар, кай тэ парашэн тэ кандэн лэ родителёнэн? Лэнди трэбуй тэ гиндон, со важ лэндэ терэн лэндирэ родителя. Кала вонэ лэна тэ сэрэн пала када, лэнди авэла май вушэро тэ сыкавэн пэ дила, кай благодарни лэ родителёнэнди. Тэ кандэн лэ родителёнэн, када лэ Дэвлэско законо, саво дя амаро небесно Дад. Кала и бэятцэ драго дэн дума пала пэстирэ родителя, лэндар могут тэ сытён кодэла, ко лэнца еқэ бэршэнца. Чаче, кала и родителя на полэн лэ родос, када кай лэн на цырдэл каринг и бэятцэ, тэ кандэн лэн найвушэро. Авря ригатар, кала и бэятцэ лэ одеса полэн, кай и родителя анда вся оди любин лэн, лэнди авэла май вушэро тэ кандэн лэн, даже тоди, кала может тэ камэлпэ тэ терэн варисо най кадя. Акэ, со ԥэнэн о Остино: «Манди часто камэласпэ тэ терав кода, со мэрно дад на мэкэлас тэ терав. Но и родителя ԥэнэнас, со, сар и кала тэ терав. Тоди ԥэнэнас, васо када трэбуй. И када сас годявэрнэс и драго. Вонэ вся время камэнас манца тэ подэн дума, кала манди када трэбуй сас. Када поможысардя манди лэн тэ кандав. Мэ диқавас, кай вонэ ман любин. И манди камэласпэ тэ радосарав лэн кодэлэса, сар мэ пэс андярав».

10, 11. а) Сар о мануш пэс андярэл, кала лэсти на дохутилэл и любовь? б) Со када важ и христианоря, тэ любин аврэн?

¹⁰ О Павло инке ԥэндя, сар о мануш может тэ андярэл пэс, кала лэсти на хутилэл любовь. Кала о Павло пистросардя, кай и бэятцэ на кандэн лэ родителёнэн, во кадяжэ ԥэнэн и пала мануша, савэ най благодарни. И када драго, кай во кадя ԥэндя. Важ кода кай, кала и мануша най благодарни, вонэ на ценин, со важ лэндэ терэн авэр. Кадяжэ о Павло пистросардя, кай и мануша лэна тэ ашавэн, важ кода кай на любин. Вонэ парашэна тэ ладин. Кадяжэ и мануша лэна тэ ԥэнэн найлашэ алава по Дэл и пэ мануша и тэ придэн. Инке, и мануша андэ послидни деса лэна тэ хохавэн. Вижал, вонэ лэна тэ пэрэтрадэн лэ манушэн и тэ ԥэнэн о найчачимосd.

¹¹ Када на шолпэ пэ чачуни любовь, сави исин кай лэ Иеговастирэ служителя каринг и авэр. И кадя сас вся время. О Иисусо ԥэндя «Любисар аврэс». Када дуйто баро законо анда лэ Моисеёско законо (катэ ԥэнэнпэ пала любовь ага́пе). Май баро законо кадэлэстар «Любисар пэстирэ Дэвлэс» (Матф. 22:37—39). Па лэ Иисусостирэ алава любовь каринг ек аврэстэ, када пар со ӷатярэн лэ чачунэ христианонэн. (Адиносар Иоанна 13:34, 35e). Вонэ даже трэбуй тэ любин пэстирэ ворогонэн (Матф. 5:43, 44).

12. Сар о Иисусо сыкавэлас пэ дила, кай любий лэ манушэн?

¹² О Иисусо анда вся оди любияс лэ манушэн. Во ԥирэлас па фороря и росԥэнэнас лащи весть важ лэ Дэвлэско царство. Во исцелияс лэ корэн, кодэлэн, ко лангал, кодэлэн, кастэ тернёлас и тила, лэ кашукэн и рияс каринг и жизня кодэлэн, ко муля (Луки 7:22). О Иисусо даже отдя пэстири жизня пала мануша, хоть лэс бут мануша и вэрыцынас. Кала во сыкавэлас пэ дила, кай любий, во андэ вся андярэлас пэс кадя, сар лэско Дад. Лэ Иеговастирэ свидетеля, савэ па вся ԥув, сытён лэ Иисусостар и важ кода кай любин, и обжанпэ аврэнца драго.

13. Сар через амари любовь и мануша могут тэ пашон каринг о Иегова?

¹³ Через амари любовь и мануша могут тэ закамэн тэ уӷанэн пала пэско небесно Дад. Акэ, со сас андо Таиландо. Кала ек мурш сас по регионально конгрессо, лэсти кадя чалеля, сави котэ любовь исин машкар и ԥрала и ԥэя, кай кала во рисайля цэрэ, во мангля, кай лэс тэ сытярэн па Библия дуйвар андо курко. Во ля тэ росԥэнэн пала Дэл всаворэ пэстирэ родости и через епаш бэрш ля тэ адиной алава анда Библия пэ сцена андо зало, кай тидэнпэ лэ Иеговастирэ свидетеля. Вижал тумэндэ тэ сыкавэн пэ дила любовь каринг авэр? Пуш пэстар: «Камав мэ тэ поможысарав пэстирэ родости, лэ ԥралэнди и лэ ԥэянди андэ собрания и кодэлэнди, касти росԥэнав важ о Дэл? Терав мэ вся, кай тэ обжавпэ лэ манушэнца кадя, сар о Иегова?»

РУВА И БАКРОРЭ

14, 15. Андэр со и мануша андярэн пэс кадя, сар и животни? Но, сар дэсавэндэ вижыля тэ парудён?

¹⁴ Андэ Библия ԥэнэнпэ, кай и мануша, андэ послидни деса, инке бут андэр со лэна тэ андярэн пэс найдраго. Лэ христианонэнди када нащи тэ пэрэлэн. Исин бут мануша, савэ на любин тэ терэн лашимос. Андэ авэр переводоря Библии пэ кацавэ мануша ԥэнэн, кай вонэ «ворогоря лэ лашимасти» (Современно русско переводо). Ай андо Современно переводо пэ кацавэ мануша ԥэнэн, кай вонэ «шон вэрыцыя по лашимос». Вонэ на ӷанэна тэ ритярэн пэс андэ вас и лэнго ди авэла баруно. Дэсавэ лэна тэ терэн вся па пэстирятэ. Када дицол, кай вонэ йто вижан андар пэстэ и на гиндон пала авэр мануша, со лэндэ авэла по ди, кала вонэ пэс кадя андярдэ.

¹⁵ Кала и мануша пэс кадя андярэн, када сар андярэн пэс животни. Но дэсавэндэ вижыля тэ парудён. Пала кода, кай о мануш может кадя тэ парудёл, дэлмут сас пистромэ андэ Библия. (Адиносар Исаия 11:6, 7f). О Исаия пистросардя лэ Дэвлэстирэ алава пала кода, со трэбуй тэ авэл англэ. Во пистросардя пала время, кала и дыки животни, о рув и о лево парашэна тэ хан лэ бакрорэн и лэ гуруворэн. Васо кадя авэла? Андэ Библия росԥэнэнпэ: «Важ кода кай пала Иегова авэна тэ ӷанэн па вся ԥув» (Ис. 11:9). Но и животни нэ могут тэ уӷанэн пала Иегова. Вижал, кода, со сас дэлмут ԥэндо, трэбуй тэ авэл англэ пэ мануша.

16. Сар кода, со пистромэ андэ Библия, поможый, кай о мануш тэ парудёл?

¹⁶ Бут мануша сас варикала, сар и рува. Но акана вонэ паруделэ и ладин аврэнца. Пала дэсавэ кацавэ мануша можно тэ проадинос андэ статьи, савэндэ ек названия «Кода, со пистромэ андэ Библия, парувэл и жизня». Пала кодэла, ко уӷангля лэ Иеговас и ля лэсти тэ служий, на ԥэнэса, кай вонэ притерэнпэ, кай на ашавэн лэ Дэвлэс, важ кода кай любин лэс, но отшон лэско зор. Аврэ алавэнца, вонэ на шонпэ пэ мануша, савэ кати притерэнпэ, кай на парашэн лэс тэ кандэн, хоть пэ дила вонэ када и на сыкавэн. Ай авря ригатар, кодэла, ко варикала йто холявэлас паруделэ и ашэлэ кацавэ, сар камэл о Дэл, кандэн лэ Дэвлэс па чачимастэ и на ашавэн, важ кода кай любин (Эф. 4:23, 24). Кала и мануша уӷанэн лэ Дэвлэс, вонэ полэн, кай лэнди трэбуй тэ кандэн лэс. Вонэ камэн тэ пэрэдиқэн кода, андэр со патян, ай кадяжэ тэ парудён. Тэ парудёс найвушэро. Но о мануш может када тэ стерэл, кала лэсти поможый о Дэл, саво дэл пэско свынто духо кодэлэнди, ко анда вся оди камэл тэ радосарэл лэс.

«КАЦАВЭНДАР РИТЯРДЮ МАЙ ДУР»

17. Со фэрия амэн лэ манушэндар, савэ андярэн пэс кадя, сар на чалёл лэ Дэвлэсти?

¹⁷ Май бут лэл тэ дицол кода, андэр со на шонпэ кодэла, ко служин лэ Дэвлэсти, ай ко най. Амэнди трэбуй тэ фэрисавас, кай тэ на пэрэлас кода, сар и мануша найдраго пэс андярэн и кода, пала со вонэ гиндон и со лэндэ андо ди. О Иегова приԥэнэн амэнди тэ ритярдювас май дур лэ манушэндар, пала савэ пистромэ андо 2 Тимофея 3:2—5. Чаче, на вижала никала тэ на дас дума и тэ на диқаспэ лэ манушэнца, савэ андярэн пэс кадя, сар на чалёл лэ Дэвлэсти. Амэ лэн диқас андэ школа, пэ бути и даже цэрэ. Но анда амаро зор тэ на пэрэлас кода, сар вонэ гиндон, ай кадяжэ, сар вонэ найдраго пэс андярэн. Со амэнди поможыя тэ терас, кай амари дружба лэ Иеговаса тэ авэл май бари? Трэбуй тэ сытювас па Библия, тэ проандярас и время кодэлэнца, ко любин лэ Иеговас, кадя сар и амэ.

18. Сар кода, сар амэ пэс андярас и амарэ алава, могут тэ поможын аврэнди тэ уӷанэн лэ Иеговас?

¹⁸ Амэ кадяжэ камас, кай и авэр тэ уӷанэн лэ Дэвлэс. Важ када амэнди трэбуй тэ на умэкас и время, кай тэ подас дума лэ манушэнца пала чачимос анда Библия. И кала росԥэнас, тэ мангас лэ Иеговас, кай во тэ поможый амэнди тэ ԥэнас лашэ алава андэ время, сави поджал важ и мануша. Трэбуй, кай и авэр кадяжэ тэ ӷанэн, кай амэ лэ Иеговастирэ свидетеля. Тоди кода, кай амэ пэс драго андярас, анэн слава лэ Дэвлэсти, ай най амэнди. Амэ сытелям «тэ отшас о найлашимос и кода, со камэлпэ лэ манушэнди андэ кадэва миро. Тэ ритярас лэ Дэвлэско законо и тэ на ашавас лэс, важ кода кай любисарас, и тэ жувас андэ кадэва миро годяса» (Титу 2:11—14). Амэ терас вся, кай тэ радосарас лэ Дэвлэс кодэлэса, сар амэ пэс андярас. Кала и мануша када диқэн, вонэ могут тэ ԥэнэн: «Амэ жаса тумэнца, важ кода кай амэ ашундям, кай тумэнца о Дэл» (Зах. 8:23).