Ашэнпэ вужэ англа лэ Дэвлэстирэ яқа!

1. Сар кадэла трин лэ Иеговастирэ свидетеля на парашэлэ тэ кандэн лэ Дэвлэс?

ПРЕДСТАВЬТЕ трин ситуацыи. 1) О учителё ԥэнэн лэ класости, андэ саво сытёл тэрнёры христианка, кай йто авэла празнико и котэ авэна всаворэ ученикоря. И ԥэй полэл, кай кадэва празнико на чалёл лэ Дэвлэсти и важ када вой пативалэс отԥэндёлпэ тэ жал пэр лэстэ. 2) Тэрно ԥрал, саво сас лажавно, росԥэнэн важ о Дэл па цэра. Во ӷанэн, кай андэ авэр цэр жувэл раклоро, саво сытёл лэса андэ ек класо и саво асалпэ лэ Иеговастирэ свидетелёнэндар. Но во всаек жал каринг лэско цэр и стучий андэ двэри. 3) Еқэ ԥралэсти прижалпэ бут тэ терэл пэ бути, кай тэ проправарэл пэстирэ ерес. Еқвар о начальнико мангэл лэс тэ хохавэл чи тэ стерэл варисо най па законо. О ԥрал полэл, кай важ када лэс моӷут тэ вишон па бути. Но во росԥэнэн лэ начальникости, кай на терэла кадя, важ кода кай о Дэл камэл, кай лэстирэ служытеля тэ терэн вся па чачимастэ и па законо (Римлянам 13:1—4; Евреям 13:18).

2. Савэ вопросоря амэ роздиқаса и васо?

² Саво качество сас кай кадэла трин христианоря? Тумэ додиқлэ, кай вонэ сас смили и чачунэ. Но ек качество, саво лэндэ сас фартэ куч. Када, кай вонэ ашэлэпэ вужэ англа Дэл. Андэ всаворэ кадэла трин ситуацыи вонэ на парашэлэ тэ кандэн лэ Иеговас. Вонэ кадя стердэ, важ кода кай закамлэ тэ ашэнпэ вужэ англа лэ Дэвлэстирэ яқа. О Иегова фартэ абурой андэ кажно андэр лэндэ. Амэ кадяжэ камас, кай амаро небесно Дад тэ абурой андар мэндэ. Кай тэ авэл кадя, роздиқам трин вопросоря. Пэрво, со када тэ авас вужэ англа Дэл? Дуйто, васо када фартэ куч? Трито, со дэл амэнди зор тэ ашаспэ вужэ англа Дэл андэ кадэя ԥари время?

СО КАДА ВУЖЭ АНГЛА ДЭЛ?

3. а) Андэр со дицол, кай лэ Иеговастирэ служытеля вужэ англа лэстэ? б) Савэ примероря поможын амэнди тэ полас, со када вужэ англа Дэл?

³ Кала и дума жал важ амэндэ, важ лэ Дэвлэстирэ служытеля, тоди вужо англа Дэл, када, кала амэ любисарас анда вся оди лэ Иеговас и на парашас лэс тэ кандас. Кадяжэ, кала амэ ласпэ варисо тэ терас, май англал амэ гиндосарас, ай сар пэ када диқэла о Иегова. Еврейско алав, саво андэ Библия пэрэандярдо «вужо англа Дэл», сыкавэл инке пэ кода, со найнасвало, найримомэ и цыло. Па законо и жывотни, савэн израильтяноря анэнас андэ жэртва лэ Иеговасти, трэбуй сас тэ авэн «найнасвалэ» (Левит 22:21, 22). О законо на домэкэлас тэ анэн лэ Дэвлэсти жывотнонэн, савэ сас би пэрнэско, би канэско чи би яқако. Важ о Иегова сас фартэ важно, кай о жывотно тэ авэл найнасвало чи варисо най кадя лэса (Малахия 1:6—9). Амэ полас, васо о Иегова кадя камэлас. Кала амэ тинас и фрукты, амэ на камас, кай вонэ тэ авэн римомэ. Чи кала тинас книжка, амэ на камас, кай андэр латэ тэ авэн вишындэ и листоря. Чи кала тинас варисаво инструменто, ай котэ тэ на хутилэл запчасти. Амэнди камэлпэ вся, со тинас, тэ авэл лашо. Кадяжэ о Иегова камэл, кай амэ тэ авас вужэ англа лэстэ. Во камэл, кай амэ тэ любисарас и тэ кандас лэс анда вся оди.

4. а) Вижал кай и найсовершэни мануша тэ авэн вужэ англа Дэл? Росԥэнэн. б) Со амэндар аштярэл о Иегова, сар пистромэ андэ книӷа Псалом 103:12—14?

⁴ Амэ на трэбуй тэ гиндосарас, кай вужэ англа Дэл кати моӷут тэ авэн и совершэни мануша. Амэ полас, кай амэ найсовершэни и амэндэ бут со най кадя. Роздиқам дуй причины, васо амэнди на трэбуй кадя тэ гиндосарас. Пэрво, о Иегова на диқэл кати пэ кода, со амэ терас най кадя. Андэ лэско алав пистромэ: «Если бы ту, Иегова, кати тэ диқэс, кай вся най па тирятэ, ко тоди моӷ бы тэ ашэлпэ» (Псалом 130:3). Во ӷанэн, кай амэ найсовершэни мануша и анда вся оди простий амэн (Псалом 86:5). Дуйто, о Иегова ӷанэн, со па амаро зор, ай со най, и важ када во на аштярэл амэндар май бут. (Адиносар Псалом 103:12—14b.) Тоди, со када тэ авас вужэ англа Дэл?

5. Васо, кай тэ авас вужэ англа Дэл, амэ трэбуй тэ любисарас лэ Иеговас?

⁵ Кай тэ ашаспэ вужэ англа лэ Дэвлэстирэ яқа, трэбуй фартэ лэс тэ любисарас. Кадяжэ тэ сыкавас, кай любисарас лэс анда вся оди и на парашас тэ кандас андэ вся. Амэ ашаспэ вужэ англа Дэл, кала амэндэ ԥаримос и амэ всаек на парашас тэ любисарас лэс (1 Летопись 28:9; Матфея 22:37). Подам дума пала трин христианоря, пала савэ сас дума май англал. Со, и тэрнёры христианка на камэл тэ порадуийпэ кодэлэнца, каса сытёл андэ ек класо? Хэба, лэ тэрнорэ ԥралэсти чалёл, кай лэстар асанпэ? И о ԥрал, саво терэл пэ бути, на гиндой, кай можэт тэ хасарэл пэстири бути? Вонэ ӷанэн, кай лэ Дэвлэстэ исин законоря, савэ фэрин. Вонэ камэн, кай тэ радуин оди лэ небеснонэ Дадэско. Важ кода кай вонэ любин лэ Иеговас, кала варисо камэн тэ терэн, вонэ гиндон, сар пэ када диқэл о Иегова и витидэн, сар май правильно. Кадя вонэ сыкавэн, кай вужэ англа лэ Дэвлэстирэ яқа.

ВАСО АМЭНДИ ТРЭБУЙ ТЭ АВАС ВУЖЭ АНГЛА ДЭЛ?

6. а) Васо амэнди трэбуй тэ авас вужэ англа Дэл? б) Васо кай о Адамо ла Еваса на вижыля тэ ашэнпэ вужэ англа Дэл?

⁶ Васо всаворэ христианонэнди важно тэ авэн вужэ англа Дэл? Важ кода кай ек анӷело, саво жыля против о Дэл, хохадя пэр лэстэ и пар мэндэ. Во ашэля Сатана или кодэва, ко жыля против о Дэл, инке андо Эдэмско садо. Во шутя чик по Дэл кодэлэса, кай наздоӷад ԥэндя, кай о Иегова найлашо, гиндой кати пала пэстэ и хохавно правителё. Фартэ жалко, кай о Адамо ла Еваса жылэ против о Дэл и терделэ пэ Сатанасти риг (Бытие 3:1—6). Кала вонэ жувэнас андо Эдэмо, лэндэ сас бут лашимос, через саво вонэ моӷли инке май фартэ тэ любин лэ Иеговас. Но кала о Сатана жыля против о Иегова, вонэ сыкадэ, кай на любинас лэ Иеговас анда вся оди. Но прожыля время и андэ лэ Иовостирэ деса вазгляпэ инке ек вопросо. Авэла хоть ек мануш, саво любий лэ Иеговас, и важ када на парашэл лэс тэ кандэл? Аврэ алавэнца, моӷут и мануша тэ авэн вужэ англа лэ Дэвлэстирэ яқа?

7. Со, сар пистромэ андэ книӷа Иово 1:8—11, гиндояс о Дэл важ о Иово и со гиндояс о Сатана?

⁷ О Иово жувэлас андэ кодэя время, кала израильтяноря слинэ андо Египто. Тоди нико кадя на кандэлас лэ Дэвлэс, сар во. Кадя жэ сар и амэ, о Иово сас найсовершэно мануш и шылияспэ. Но о Иегова любияс лэс, важ кода кай о Иово ашэласпэ вужо англа лэстэ. Файма, о Сатана най пэрво разо найдраго дэл дума лэ Иеговаса. Во ԥэнэн, кай нинай мануша, савэ вужэ англа Иегова и кандэн лэс. Важ када о Иегова ԥэндя лэ Сатанасти тэ шол сама по Иово. Кода, сар жувэлас кадэва мануш, сыкавэлас, кай о Сатана хохавэл. О Сатана закамля тэ диқэл, ашэлапэ о Иово вужо англа Дэл чи най. О Иегова патялас андэ пэско друӷо, важ када домэкля лэ Сатанас тэ диқэл, со вижала. (Адиносар Иов 1:8—11c.)

8. Со терэлас о Сатана, кай тэ змарэл лэ Иовос?

⁸ О Сатана сас фартэ жэстоко. Во кодэва, ко умарэл. Во одля кай о Иово вся, со лэстэ сас. Во одля о барвалимос, лэ слуӷонэн и дажэ о лашо алав. Во бишалдя бида пэ лэско ери. О Сатана умардя дэшэ лэ Иовостирэн бэятонэн, савэн о Иово фартэ любияс. И по Иово бишалдя ԥаро насвалимос. Вся лэстири тила, жы лэ шэрэстар жы кай и пэрнэ, сас андэ чиркэндэ, савэндар тернёлас и тила. Лэсти хулаи задиляйля ла бидатар и ԥэндя лэсти: «Дэ амрая лэ Дэвлэс и мэр!» И екжэно о Иово камэлас тэ мэрэл. Но во всаек англа лэ Дэвлэстирэ яқа ашэляпэ вужо. Тоди о Сатана закамля тэ поджал лэстэ авря ригатар. Через лэстирэ друӷоря, во камля лэс тэ змарэл. И друӷоря авелэ каринг лэстэ и слинэ паша лэстэ бут деса. Но лэндирэ алавэндар лэ Иовости на ашэля фэдэр. Вонэ на гиндонас пала кода, со лэстэ андо ди. Вонэ линэ лэс тэ сытярэн и холяса тэ дошалярэн. Вонэ доԥэнэнас, кай када о Дэл бишалдя кадэва ԥаримос пэр лэстэ и важ о Дэл, кай о Иово вужо англа лэстэ, нинай нисо. Вонэ дажэ линэ тэ гиндон, кай во стердя бэзэх, и важ када во затердя кадэла всаворэ биды (Иов 1:13—22; 2:7—11; 15:4, 5; 22:3—6; 25:4—6).

9. Со на ля тэ терэл о Иово, кала лэстэ сас о ԥаримос?

⁹ Со терэлас о Иово, кала сас всаворэ кадэла биды? Во сас найсовершэно мануш, мустрияс и дэлас дума холяса кодэлэнца, ко авеля лэс тэ улэл. Важ лэстэ сас май куч лэско чачимос, ай най лэ Дэвлэско (Иов 6:3; 13:4, 5; 32:2; 34:5). И всаек, дажэ андэ само ԥари время, о Иово на отбанделя лэ Иеговастар. Во на патяя лэ друӷонэндирэ хохаимасти, савэ сас лишь бы друӷоря и ԥэндя лэнди: «Мэ никала на прижанава, кай тумэ праведни! Пока мэ на мэрава, ашавапэ вужо англа Дэл!» (Иов 27:5). Кадэла алава бут со ԥэнэнас. Но о Иово на диқля нипэр со и всаек на парашэля тэ кандэл лэ Дэвлэс.

10. Сар о вопросо, саво о Сатана вазглясас андэ лэ Иовостирэ деса, поджал каринг амэндэ?

¹⁰ О вопросо, саво о Сатана вазглясас андэ лэ Иовостирэ деса, поджал и каринг амэндэ. О Сатана доԥэнэн, кай амэ на любисарас и на кандас лэ Иеговас анда вся оди, и кай амэ парашаса тэ служысарас лэсти, важ кода кай тэ спасысавас (Иов 2:4, 5; Откровение 12:10). Кала кацаво ашунас, амэнди ашэл ԥарэс. Акана погиндосарам акэ пала со. О Дэл кадя патял андэр мэндэ, кай дэл амэнди лащи возможность. О Иегова домэкэл лэ Сатанасти тэ диқэл, ашасапэ амэ вужэ англа Дэл чи най. О Дэл ӷанэн, кай амэ на парашаса лэс тэ кандас и кадэлэса доԥэнаса, кай о Сатана хохавно. Во дэл алав, кай подритярэла амэн (Евреям 13:6). Амэнди патял о Иегова, саво хулай пэ вся и люма. Сави када бари бах! Акана полэн, васо важ амэндэ фартэ куч тэ авас вужэ англа лэ Дэвлэстирэ яқа? Важ кода кай кадэлэса амэ сыкаваса, кай всаворэ лэ Сатанастирэ алава нисо на ашэн. Кадя амэ фэрисараса о лашо алав амарэ Дадэско лэ Иеговаско и подритяраса диласа лэстири правления. Со амэнди трэбуй тэ терас, кай тэ авас вужэ англа лэ Дэвлэстирэ яқа?

САР ТЭ АШАСПЭ ВУЖЭ АНГЛА ЛЭ ДЭВЛЭСТИРЭ ЯҚА?

11. Сости амэн сытярэл лэ Иовоско примеро?

¹¹ Андэ кадэла «послидни деса» о Сатана инке май фартэ камэл тэ змарэл па правильно дром лэ Дэвлэстирэ манушэн (2 Тимофею 3:1). Кай тэ лас зор, кай тэ ашаспэ вужэ англа лэ Дэвлэстирэ яқа? И упалэ амэ бут сости сытювас кай о Иово. Инке жы каринг кода, сар лэстэ ашэля о ԥаримос, во най еқвар доԥэнэнас, кай кандэл лэ Иеговас. Роздиқам трин важни маменторя, анда савэ амэ можэм тэ сытювас кай о Иово, сар тэ на парашас тэ кандас лэ Дэвлэс.

12. а) Васо, сар запистромэ андэ Иов 26:7, 8, 14, кай о Иово сас бари патив андо ди каринг о Иегова? б) Со поможыя амэнди тэ полас лэ Иеговас кадя, сар полэлас о Иово?

¹² Кода, кай о Иово столас бари патив по Иегова, поможыяс лэсти инке май фартэ тэ любий лэ Иеговас. О Иово витидэлас время, кай тэ погиндой пала кода, со создал о Иегова. (Адинорас Иов 26:7, 8,d 14e.) Кала во гиндояс пала ԥув, нэбо, тучи и о ӷромо, во инке май бут столас патив по Иегова. И всаек во полэлас, кода, со во ӷанэн пала лэ Дэвлэсти тварения совсем набут. Лэ Дэвлэстирэ алавэндар лэстэ андо ди ашэля бари патив. Во ԥэндя пала лэндэ: «Манди куч лэстирэ алава» (Иов 23:12). Кай о Иово сас бари радость и бари патив андо ди каринг о Иегова. Во любияс пэстирэ Дадэс лэ Иеговас и камэлас, кай во тэ лошавэл. Вся када поможыяс лэсти тэ на парашэл тэ кандэл лэ Дэвлэс. Амэнди трэбуй тэ сытювас лэ Иовостар. Амэ ӷанас май бут пала кода, со создал о Иегова, чем кодэла, ко жувэнас андэ лэ Иовостирэ деса. Инке амэндэ исин лэ Дэвлэско алав, через саво амэ май драго уӷанас лэ Дэвлэс. Важ када амэндэ андо ди исин бари патив каринг амаро создателё. Через када амэ камас тэ любисарас, тэ кандас лэс и вся и время тэ ашаспэ вужэ андэ лэстирэ яқа (Иов 28:28).

13, 14. а) Андэр со, сар запистромэ андэ Иов 31:1, о Иово кандэлас лэ Иеговас? б) Сар амэ андэ када можэм тэ сытювас лэстар?

¹³ Кода, кай о Иово кандэлас лэ Дэвлэс, поможыяс лэсти тэ ашэлпэ вужо англа лэстирэ яқа. О Иово полэлас, кай нащи тэ авэс вужо англа Дэл, кала лэс на кандэс. Кажно разо, кала амэ кандас лэ Иеговас, амэ инке май фартэ камас тэ авас вужэ андэ лэстирэ яқа. О Иово старыияспэ тэ кандэл лэ Иеговас андэ вся. Во важ пэстэ драго поля, кай лэла тэ андярэл пэс кадя, сар када чалёл лэ Дэвлэсти. (Адиносар Иов 31:1f.) О Иово сас жэнато и ӷанэнас, кай найдраго тэ диқэл пэ авэр жувля найлашэ яқэнца. Адес амэ жувас андэ лэ Сатанастири люма, андэ сави бут билажавардимос. Сар и о Иово, амэнди на трэбуй фартэ бут тэ шас сама кодэлэнди, каса амэ най андо брако. Амэнди трэбуй тэ на диқас и билажавардэ картинки, савэ адес исин везде, кай камэс (Матфея 5:28). Если амэ кажно дес следисарас пала пэстэ андэ кадэва вопросо, амэнди авэла май вушэро тэ ашаспэ вужэ англа лэ Дэвлэстирэ яқа.

¹⁴ Кода, кай о Иово кандэлас лэ Дэвлэс дицолас анда кода, сар во диқэлас по барвалимос. О Иово полэлас, кай кала во гиндоя, кай лэско барвалимос поможыя лэсти андэ вся, тоди во терэла баро бэзэх, пала саво о Дэл спушэла лэстар (Иов 31:24, 25, 28). Адес и мануша фартэ бут шон сама лэ барвалимасти. Кала амэ жувас па библейски принцыпоря и правильно диқас пэ ловэ и по хабэ, тоди амэ ашасапэ вужэ англа лэ Дэвлэстирэ яқа (Притчи 30:8, 9; Матфея 6:19—21).

15. а) Андэр со фартэ патялас о Иово и сар када поможысардя лэсти тэ ашэлпэ вужо англа лэ Дэвлэстирэ яқа? б) Васо амэнди трэбуй кадяжэ тэ патяс?

¹⁵ Кода, кай о Иово аштярэлас лэ Дэвлэстар о лашимос, поможысардя лэсти тэ ашэлпэ вужо англа лэстэ. О Иово ӷанэнас, кай лэ Дэвлэсти най всаек, ашэлпэ во вужо андэ лэстирэ яқа чи най (Иов 31:6). Дажэ кала лэстэ сас ԥаримос, во на парашэлас тэ патял, кай о Иегова дэла лэсти важ када лашимос. Када поможыяс лэсти тэ ашэлпэ вужо англа Дэл. О Иегова кадя сас лошало кадэлэсти, кай анда вся оди блаӷословисардя лэ Иовос, хоть во и сас инке ӷрешно мануш (Иов 42:12—17; Иакова 5:11). Ай англэ кай о Иово авэла инке май бут лашимос. Ай тумэ фартэ патян кодэлэсти, кай о Иегова дэла тумэнди лашимос, важ кода кай тумэ ашэнпэ вужэ андэ лэстирэ яқа? Амаро Дэл на парудёлпэ (Малахия 3:6). Если амэ сэрас, кай о Дэл цэний кода, кай амэ вся и время лэс кандас, амэ никала на парашаса тэ аштярас о лашимос, саво авэла англэ (1 Фессалоникийцам 5:8, 9).

16. Со амэ трэбуй тэ камас тэ терас?

¹⁶ Терэн вся, кай вся и время тэ ашэнпэ вужэ англа лэ Дэвлэстирэ яқа! Дэкала тути можэт тэ здэлпэ, кай кадэлэ дромэса жас кати ту. Но сэр, кай ту никала на авэса екжэно. Ту лэса тэ служыс лэ Иеговасти милиононэ лэ ԥралэнца и лэ ԥэянца, савэ ашэнпэ вужэ англа лэстирэ яқа. Кадяжэ кодэлэнца, ко андэ дэлмутни время на парашэлас тэ кандэл лэ Иеговас жы каринг пэстири смэрть (Евреям 11:36—38; 12:1). Давайте тэ ритярас андо шэро лэ Иовостирэ алава: «Пока мэ на мэрава, ашавапэ вужо англа Дэл!» И мэк кодэлэса, кай амэ вужэ англа лэ Иеговастирэ яқа, во вся и время прославляеца!