Васо амэнди трэбуй тэ авас блаӷодарни?

1. Сар о самаритянино поблаӷодарисардя лэ Иисусос, важ кода кай во лэс виличисардя?

ЧИРКИ, савэндар тернёлас и тила, савэ сас кай и дэш мурша, када сас фартэ ԥаро насвалимос. Кадэлэстар лэнди сас ԥарэс. И англэ вонэ на аштярэнас нисаво лашимос. Но еқвар вонэ найдур додиқлэ лэ Иисусос, само барэ учителёс. Вонэ ашунэнас, кай во виличий любо насвалимос и патянас, кай во поможыя и лэнди. Вонэ фартэ зацыписайлэ: «Иисусо, учителё, пожалуисар амэн!» И о Иисусо поможысардя лэнди и всаворэ дэш мануша виличисайлэ. Канешно, вонэ всаворэ слинэ блаӷодарни лэ Иисусости пала кацаво лашимос. Но кати ек андар лэндэ поблаӷодарисардя лэ Иисусос. О мурш, саво виличисайля, о самаритянино, ля фартэ тэ прославляет лэ Дэвлэс (Луки 17:12—19).

2, 3. а) Васо дэкала амэ на блаӷодарисарас аврэн? б) Пала со амэ уӷанаса анда кадэя статья?

² Амэ, сар кодэва самаритянино, камас тэ блаӷодарисарас кодэлэн, ко терэл амэнди лашимос. Но амэ просто забистрас тэ ԥэнас наис манушэсти чи варисар па аврятэ тэ сыкавас, кай амэ лэсти блаӷодарни.

³ Андэ кадэя статья амэ подаса дума, васо фартэ трэбуй тэ сыкавас пэсти блаӷодарность алавэнца чи ла диласа. Андэ Библия пистромэ пала кодэла, ко сыкавэлас пэсти блаӷодарность и пала кодэла, ко на сыкавэлас. Амэ подаса дума пала лэндэ и инке подаса дума, сар тэ сыкавас пэсти блаӷодарность.

ВАСО ТРЭБУЙ ТЭ АВАС БЛАӶОДАРНИ?

4, 5. Васо амэнди трэбуй тэ авас блаӷодарни?

⁴ О Иегова сыкавэл амэнди, сар тэ авас блаӷодарни. Во терэл лашимос кодэлэнди, ко лэс радуий (2 Самуила 22:21; Псалом 13:6; Матфея 10:40, 41). Андэ Библия пистромэ: «Терэн кадя, сар о Дэл, важ кода кай тумэ лэстирэ любими бэятцэ» (Эфесянам 5:1). Вижал, амэ трэбуй тэ авас блаӷодарни, важ кода кай камас тэ терас, сар о Иегова.

⁵ Но исин инке, васо тэ блаӷодарисарас. И блаӷодарность, сар лашо хамос. Канешно, кала хас лашо хамос, фэдэр авэла, кала ту лэс хас варикаса. Вижал, кала блаӷодарин амэн, амэ лошалэ, ай кала амэ блаӷодарисарас аврэн, лошалэ вонэ. О мануш, савэс блаӷодарисарас, полэл, кай най евья стодя зор тэ поможый амэнди чи тэ дэл кода, со амэнди трэбуй. И тоди, кадэлэстар амари дружба лэса авэла май састи.

6. Васо пэ алава, савэнца блаӷодарисарас, ԥэнэса, кай вонэ, сар сомнаконэ ԥаба?

⁶ И блаӷодарность нэ бывает фартэ бут. Андэ Библия пистромэ: «Сар и сомнаконэ ԥаба по рупуно, вся вишындо тэляри, кадя и о алав, саво ԥэндо тоди, кала во трэбуй» (Притчи 25:11). Кати погиндон, сар када дэ шукарнэс, сомнаконэ ԥаба по рупуно тэляри! Ай инке вся када фартэ кучутно. Тумэ фартэ авелоп лошалэ кацавэ подаркости. Кала блаӷодарисарас лашэ алавэнца, када тожэ фартэ куч. Ай инке, и сомнаконэ ԥаба вонэ вечни. Кадя и тумарэ алава, савэнца тумэ блаӷодарин, варико можэт тэ фэрий лэн андэ пэско ди вся и жызня.

ВОНЭ САС БЛАӶОДАРНИ

7. Сар о Давидо и авэр псалмопевцоря, сар запистромэ андо Псалом 69:30, сыкавэнас пэсти блаӷодарность лэ Иеговасти?

⁷ Андэ дэлмутни время бут лэ Дэвлэстирэ служытеля сыкавэнас пэсти блаӷодарность. Ек андар лэндэ, када сас о Давидо. (Адиносар Псалом 69:30b.) Важ лэстэ фартэ куч сас кода, кай во служыяс лэ чачунэ Дэвлэсти. Во сыкавэлас када пэ дила. Во пожэртвовал май бут чем епаш анда пэско хабэ, кай тэ строин о храмо. Ай о ери, саво жыля лэ Асафостар, сыкавэнас пэстири блаӷодарность лэ Иеговасти кодэлэса, кай хвалинас лэс андэ диля. Андэ ек кацави дили вонэ блаӷодарин и фартэ радуйнпэ важ лэстирэ «лашэ ди́лы» (Псалом 75:1). Да, о Давидо и лэ Асафаско ери, саво жыля лэстар, камэнас тэ сыкавэн лэ Иеговасти, сар вонэ блаӷодарни лэсти пала вся лашимос. Андэр со амэ можэм тэ сытювас лэндар?

8, 9. а) Сар о апостоло Павло сыкавэлас, кай цэний лэ ԥралэн и лэ ԥэян? б) Со кадэлэстар ашэля?

⁸ О апостоло Павло цэнияс лэ ԥралэн и лэ ԥэян. Када дицолас па кода, сар во пала лэндэ дэлас дума. Андэ пэстирэ молитвы во на бистрэлас тэ блаӷодарий лэ Дэвлэс пала лэндэ. Пэсти блаӷодарность во сыкавэлас, кала пистрояс и письморя. Андэ Римлянам 16 ӷлава, андэ пэрви 15 стихоря, о Павло ақарэл па алавэндэ 27 ԥралэн и ԥэян. И со май фартэ во пистрой пала Приска и Акила, савэ ради лэстэ «рискуинас пэстиря жызняса», ай пэ Фива ԥэнэн, кай вой «фэрияс бутэн», кадяжэ и фэрияс лэс. О Павло похвалисардя кадэлэ ԥралэн и ԥэян, савэ сас лэсти куч и савэ бут терэнас важ о Дэл.

⁹ О Павло ӷанэнас, кай кадэлэ ԥралэндэ и ԥэяндэ исин кода, кай вонэ моӷут варисо тэ терэн чи тэ ԥэнэн най кадя. Но кала о Павло допистросардя пэско письмо, во пистросардя ек важ лэнго лашимос. И кала вонэ адинонас кадэва письмо, лэнди сас драго по ди кодэлэстар, кай о Павло хвалий лэн. Кадэлэстар лэнди дружба лэ Павлоса ашэля инке май састи. Ай тумэ вся и время старыинпэ тэ блаӷодарин лэ ԥралэн и лэ ԥэян андэ тумари собрания пала лэндирэ лашэ алава и дила?

10. Сости амэн сытярэл кода, кай о Иисусо блаӷодарияс пэстирэ учениконэн?

¹⁰ О Иисусо ԥэндя тэ пистрон андэ собрании, савэ андэ Мало Азия. Во блаӷодарияс пала дила, сави стердэ лэстирэ ученикоря. Андэ собрания, сави андэ Фиатира, во ԥэндя: «Мэ ӷанав тири дила, тири любовь, тири вера, служэния и кода, кай ту виритярэс о ԥаримос. Ай кадяжэ мэ ӷанав, кай тири дила андэ послиднё время май бари чем сас май англал» (Откровение 2:19). О Иисусо най кати ԥэндя пала мануша анда собрания, кай вонэ линэ май бут тэ терэн андэ служэния, но и похвалисардя лэн пала лэндирэ качестворя, через савэ вонэ линэ тэ терэн лашимос. Лэ Иисусости прижыляпэ тэ дэл советоря дэсавэ христианонэнди андэ Фиатира. Но во всаек пэско письмо и залэл и заканчивает кодэлэса, кай хвалий лэн (Откровение 2:25—28). Кати погиндон, о Иисусо ӷлава важ и всаворэ собрании и важ када во нэобязано тэ хвалий амэн пала кода, со амэ важ лэстэ терас. Но во всаек амэн блаӷодарий. Саво лашо примеро важ и старейшыноря.

ВОНЭ НА ӶАНЭНАС, СО КАДА ТЭ АВЭН БЛАӶОДАРНИ

11. Со сас андо ди кай о Исаво каринг о «свынто», сар пистромэ андэ Евреям 12:16?

¹¹ Дэсавэ мануша, пала савэ пистромэ андэ Библия, на сас блаӷодарни. Ек андар лэндэ, када о Исаво. Лэско дад и дэй старыинаспэ тэ сытярэн лэс, кай во тэ любий и тэ полэл лэ Иеговас, но во на цэнияс кода, со сас «свынто». (Адиносар Евреям 12:16c.) Андэр со дицолас, кай во на сас блаӷодарно? О Исаво дажэ на загиндосайля пала кода, кала битиндя важ ек чаро хамос пэсти ԥралэсти лэ Иаковости, саво сас цыкнэдэр, пэстири блаӷословения, сави пэрэлас лэсти, сар барэдэрэ шавэсти (Бытие 25:30—34). Май англэ о Исаво фартэ пожалел, важ кода со во стердя. Но кода, кай во сас найблаӷодарно и на цэнияс кода, со «свынто», лэсти най васо сас тэ холявэл, кай на доросляпэ и блаӷословения, сави пэрэлас лэ барэдэрэ шавэсти.

12, 13. Андэр со дицэля, кай и израильтяноря найблаӷодарни, и каринг со када лэн андя?

¹² Кай израильтяноря сас бут, васо тэ авэн блаӷодарни лэ Иеговасти. Во виандярдя лэн анда рабство, бишалдя по Египто дэш биды. Посли када во спасысардя лэн ла бидатар, умардя вся египетско войско андэ лоли моря. Израильтяноря кадя сас блаӷодарни лэ Дэвлэсти, кай линэ тэ хвалин лэс андэ диля. Но ашэляпэ лэндэ када андо ди?

¹³ Кала кай и израильтяноря упалэ ашэля ԥаримос, вонэ йто бистэрдэ вся лашимос, со стердя важ лэндэ о Иегова. И йто кода, кай вонэ на сас блаӷодарни, дицэля (Псалом 106:7). Сар пистромэ андэ Библия «всаворэ израильтяноря линэ холяса тэ дэн дума пала Моисеё и Аароно», можно тэ ԥэнас, вонэ када ԥэнэнас по Иегова (Исход 16:2, 8). О Дэл холяйля, кала диқля, кай вся о народо найблаӷодарно. Посли када о Дэл ԥэндя, кай цыло поколения лэ израильтянонэн, савэ дэнас дума холяса, помэрэна андэ пустыня, кати о Иисусо Навино и о Халево ашэнапэ (Числа 14:22—24; 26:65). Погиндосарам, сости можэм тэ сытювас, кала гиндосарас пала кадэла примероря.

АВЭН БЛАӶОДАРНИ

14, 15. а) Сар о хула́й и хулаи́ моӷу тэ сыкавэн, кай цэнин ек аврэс? б) Сар и дада и дэя моӷут тэ сытярэн лэ бэятонэн тэ авэн блаӷодарни?

¹⁴ Андо ери. Если кажно андо ери старыийпэ тэ авэл блаӷодарно, када авэла драго важ вся о ери. Со май часто о хулай и хулаи блаӷодарин ек аврэс, со май пашэ вонэ ашэн ек еқэсти и май йто простин ек аврэс. О хулай, саво цэний ла хулая, шол сама най кати пэ латирэ лашэ алава и дила, ай инке на промэкэл, кай тэ похвалий ла (Притчи 31:10, 28). Ай годявэрни хулаи́ на бистрэл тэ ԥэнэн пэстирэ хула́сти, пала со вой лэс цэний.

¹⁵ Сар и дада и дэя моӷут тэ сытярэн лэ бэятонэн тэ авэн блаӷодарни? На бистрэн, кай бэятцэ диқэн пала кода, со тумэ дэн дума и терэн, и вонэ сытён тумэндар. Важ када всегда блаӷодарин аврэн, важ кода со вонэ важ тумэндэ терэн. Кадяжэ сытярэн лэ бэятонэн тэ блаӷодарин аврэн. Мэк вонэ полэн, кай и блаӷодарность жал анда оди, и лашэ алава анэна бут лашимос. Акэ, со ԥэнэн ек тэрни манушни, савя ақарэн Клари: «Кала мэрня дади сас 32 бэрш, вой ашэляпэ екжэни тринэ бэятонэнца. Кала манди ашэля 32 бэрш, мэ погиндосардэм, сар жэ лати сас ԥарэс андэ кадэла бэрша. И мэ закамлэм тэ ԥэнав ла мамати, сар мэ ла фартэ цэнисарав пала кода, пэр со вой жыля, кай тэ вибарярэл ман и мэрнэ ԥралэн. Ай найдэлмут и мама ԥэндя, кай часто вспоминает мэрнэ алава и лати лэндар вся и время ашэл май драго по ди».

16. Росԥэнэн пала ԥрал, сар кода, кай лэс поблаӷодарисардэ, подритярдя лэс.

¹⁶ Андэ собрания. Кодэлэса, кай амэ сыкавас и блаӷодарность амарэ ԥралэнди и ԥэянди андэ собрания, амэ лэн подритярас. О Хорхе старейшына, савэсти сас 28 бэрш. Еқвар во фартэ занасвайля, и цыло шон нэ моӷ тэ авэл пэ собрании. Но дажэ, кала о Хорхе упалэ ля тэ ԥирэл пэ собрании, во всаек нэ моӷ тэ выступает пэ сцена, кай тэ проандярэл дэсо анда проӷрамма. Акэ со во росԥэнэн: «Мандэ сас андо ди, кай мандар нинай нисави польза, важ кода кай мандэ сас найлашо о зор и мэ нэ моӷ тэ терав пэстири дэла андэ собрания. Но еқвар посли собрания мандэ поджыля ек ԥрал и ԥэндя: „Наис тути, важ кода кай ту сыкавэсас мэрнэ ерести лашо примеро. Ту дажэ на ӷанэс, сар амэнди чалёнас тирэ речи, савэнца ту выступал послидни бэрша. Ту поможысардян амэнди тэ авэл и вера май састи“. Ман када ля лэ одестар и андэ яқа ԥэрделэ ясва. Сар манди на хутилэнас кадэла алава!»

17. Сар амэ можэм тэ сыкавас пэсти блаӷодарность лэ Иеговасти, саво дэл анда вся оди, сар пистромэ андэ Колоссянам 3:15?

¹⁷ Амарэ Дэвлэсти, саво дэл анда вся оди. О Иегова бут со дэл, пар со амэнди тэ сытювас. Када, кала амэ сытювас пэ амарэ христиански собрании, ай кадяжэ, кала амэ адиносарас библейско литература и статьи пэ амаро сайто. Сас тумэндэ кацаво, кай тумэ ашундэ и речь, проадиносардэ и статьи чи диқлэ варисо пэ амари интэрнэт телевидения, и погиндосардэ: «Када, со манди трэбуй!» Сар тэ сыкавас, кай амэ блаӷодарни лэ Иеговасти? (Адиносар Колоссянам 3:15d.) Можно кажно разо тэ ԥэнас андэ молитва наис пала вся кода, со во амэнди дэл (Иакова 1:17).

18. Сар амэ можэм тэ сыкавас амари блаӷодарность, важ кода кай амэндэ исин зало?

¹⁸ Амэ сыкавас пэстири блаӷодарность лэ Иеговасти, кала диқас пала вужимос андо зало, кай тидэнпэ лэ Иеговастирэ свидетеля. Амэ на промэкас, кала ақарэн тэ прилас андо зало и диқас пала лэстэ. Кодэла, ко диқэн пала аппаратура, драго следин пала латэ. Кала амэ май драго диқаса пала порядко андо зало, кай тидэнпэ лэ Иеговастирэ свидетеля, тоди амэ май долӷо котэ ласа тэ тидаспэ и на авэла трэбуй часто тэ терас ремонто. Кадя амэ ласа май набут тэ тратисарас и ловэ, савэ жан пэ кода, кай тэ строин и тэ терэн ремонторя андэ залоря, кай тидэнпэ и свидетеля па вся и ԥув.

19. Сости амэ сытювас кай кадэва раёно надзирателё и кай лэстири хулаи?

¹⁹ Кодэлэнди, ко бут терэл важ амэндэ. Амарэ лашэ алава моӷут тэ парувэн лэ манушэстирэ гиндоря каринг о ԥаримос, саво лэнди прижалпэ тэ пэрэжувэн. Акэ со сас кай ек раёно надзирателё и кай лэстири хулаи. Еқвар йвэндэ о дес цыло вонэ служынас и кала рисайлэ цэрэ, фартэ сас цыенэ. Сас кадя шудро, кай и хулаи пэля тэ совэл ку йда. Тэсара вой ԥэндя пэстирэ хуласти, кай латэ будэр нинай зор май дур тэ служын андэ разъездно служэния. Ӷэт май интя лэнди авеля о пи́сьмо анда вефилё, кадэва письмо сас важ латэ. Андэ кадэва письмо сас лашэ алава и ла похвалисардэ, кай вой на парашэл тэ служый лэ Иеговасти и кай вой виритярэл о паримос. Андо письмо сас пистромэ, кай када сас найвушэро кажно курко тэ пэрэладэл пэ авэр нэво ҭан. И акэ, со ԥэндя лако хулай: «Кадэва письмо фартэ ля ла лэ одестар, кай вой будэр никала на дэлас дума тэ ашавэл разъездно служэния. Вой най еқвар ман подритярэлас и май дур тэ служысарав, кала мэ гиндосаравас тэ ашавав кадэя служэния». Кадэва ери служынас андэ разъездно служэния почти 40 бэрш.

20. Со амэнди трэбуй тэ терас кажно дес и васо?

²⁰ Давайте кажно дес ласа тэ блаӷодарисарас аврэн алавэнца и диласа. Амарэ лашэ алава и дила моӷут тэ авэн кода, со трэбуй важ о мануш, кай тэ улэн о ԥаримос, саво исин кажно дес андэ кадэя найблаӷодарно люма. Кадяжэ када поможый, кай тэ авэл састи дружба и када можэт тэ авэл вся и вечность. Но со май ӷлавно, амэ ласа тэ терас кадя, сар амаро Дад о Иегова, саво дэл анда вся оди.