Важ о Иегова куч лэстирэ служытеля, савэ на заваздэн о шэро

1. Сар о Иегова диқэл пэ мануша, савэ на заваздэн о шэро? Росԥэнэн.

О ИЕГОВА любий кодэлэн, ко на заваздэл о шэро. Кати кодэлэндэ, ко па чачимастэ на заваздэл о шэро, можэт тэ авэл лащи дружба лэ Иеговаса. Ай кодэлэн, «ко ӷорди [во] дажэ на камэл тэ ӷанэн» (Псалом 138:6). Амэ всаворэ камас тэ радосарас лэ Иеговас и тэ полас, сар во амэн любий. Важ када кажнонэсти андар мэндэ трэбуй тэ сытювас тэ на заваздас о шэро.

2. Пала со амэ подаса дума андэ кадэя статья?

² Андэ кадэя статья амэ подаса дума пала трин вопросоря. 1) Сар када тэ на заваздэн о шэро? 2) Васо амэнди трэбуй тэ сытювас тэ на заваздас о шэро? 3) Кала дицол, кай амэ на заваздас о шэро? Андэ статья амэ диқаса, кала амэ сытювас тэ на заваздас о шэро, кадэлэса амэ радосарас лэ Иеговас и када анэна амэнди лашимос (Притчи 27:11; Исаия 48:17).

САР КАДА ТЭ НА ЗАВАЗДЭН О ШЭРО?

3. Сар када тэ на заваздэн о шэро?

³ Кала о мануш на заваздэл о шэро, тоди во найӷордо, и на гиндой, кай во май лашо аврэндар. Сар пистромэ андэ Библия, о мануш, саво на заваздэл о шэро, драго полэл со за ҭан во залэл англа о Иегова и англа мануша. Инке во полэл, кай кажно мануш андэ варисостэ май лашо лэстар (Филиппийцам 2:3, 4).

4, 5. Васо можэт тэ здэлпэ, кай о мануш заваздэл о шэро, кати важ кода, сар во пэс андярэл?

⁴ Дэсавэ мануша здэлпэ, кай на заваздэн о шэро. Можэт лэндэ жэ бэятостар спокойно характеро или андэ лэндири культура трэбуй тэ дэн дума лэ манушэнца пативалэс и тэ обжанпэ драго. Но, файма, варикай андо ди вонэ фартэ ӷорди. Прожала время и кода, со исин андо ди, дицола (Луки 6:45).

⁵ Авря ригатар исин кацавэ мануша, савэ здэлпэ фартэ патян андэр пэстэ и ԥэнэн ворта пэстирэ гиндоря. Но най всаворэ андар лэндэ ӷорди (Иоанна 1:46, 47). Если амэ любисарас фартэ бут тэ дас дума, амэнди трэбуй тэ авас осторожни, кай тэ на гиндосарас, кай амэ вся драго ӷанас. И всаек, со за амэндэ тэ на авэл характеро, амэнди трэбуй тэ стас зор, кай па чачимастэ тэ на заваздас о шэро.

6. Сости, сар пистромэ андэ 1 Коринфянам 15:10, амэ трэбуй тэ сытювас, кай апостоло Павло?

⁶ Шам сама, со амэ можэм тэ сытювас кай о апостоло Павло? Через лэстэ о Иегова стидэлас и собрании андэ фороря ек пала ек аврэстэ. Файма, во май бут домарделя андэ служэния, чем любо авэр лэ Христоско апостоло. Но о Павло на гиндояс, кай во май лашо аврэ ԥралэндар. Во на заваздэлас о шэро и ԥэндя: «Мэ само найбаро анда апостолоря и на ашав, кай пэр мандэ тэ ԥэнэн, кай мэ апостоло, важ кода кай мэ ӷонисаравас лэ Дэвлэстири собрания» (1 Коринфянам 15:9). Потом о Павло пистросардя, кай во затердя лащи патив кай о Иегова, най важ пэстирэ качестворя или важ кода, кай бут со домарделя, ай через лэ Дэвлэско лашимос. (Адиносар 1 Коринфянам 15:10b.) Дэсавэ мануша андэ кодэла собрании старыинаспэ тэ сыкавэн, кай вонэ май лашэ лэ Павлостар. Но о Письмо лэ коринфянонэнди драго сыкадя, сар тэ на заваздас о шэро (2 Коринфянам 10:10).

7. Росԥэнэн пала кода, сар и ашунглэ ԥрала андэ амари время сыкавэнас, кай на заваздэн о шэро?

⁷ Лэ Иеговастирэ свидетелёнэнди бутэнди чалёл тэ уӷанэн пала манушэстири жызня, кадяжэ и пала ԥрал Карло Клейно, саво служыяс андо Руководящё совето. О ԥрал Клейно на заваздэлас о шэро и росԥэнэнас пала ԥаримос, саво лэсти прижыляпэ тэ пэрэжувэл важ пэстири жызня. Например, андэ 1922 бэрш во пэрво разо жыля тэ росԥэнэн важ о Дэл па цэра. И лэсти здяпэ, кай када фартэ ԥарэс, и посли када во дуй бэрш ни еқварэс на сас андэ кацави служэния. Прожыля время и кала во ужэ служыяс андо Вефилё, во фартэ холяйля пэ ек ԥрал, саво лэсти ԥэндя, со во стердя най кадя. Еқварэс во фартэ пэрэнервичисардя, и долӷо кадэлэстар отжалас. И всаек лэстэ вижалас тэ стерэл бут интересно и важно дила. Кати погиндон, скати трэбуй сас зор кацавэ ашунглэ ԥралэсти, кай тэ на заваздэл о шэро и тэ росԥэнэн, кай всаворэ тэ ӷанэн пала лэстирэ ошыбки! Бут мануша анда оди росԥэнэн пала ԥрал Клейно и пала лэстири фартэ интересно жызняc.

ВАСО ТРЭБУЙ ТЭ СЫТЮВАС ТЭ НА ЗАВАЗДАС О ШЭРО?

8. Сар и алава анда 1 Петра 5:6 поможын амэнди тэ полас, кай кала на заваздас о шэро, амэ радосарас лэ Иеговас?

⁸ Само ӷлавно, васо амэ старысавас тэ на заваздас о шэро, када, кай тэ радосарас лэ Иеговас. Пала када росԥэндя о апостоло Пётро. (Адиносар 1 Петра 5:6d.) Акэ со пистромэ пала кадэла алава андэ книжка «Приходи и следуй за мной»: «Кала о мануш заваздэл о шэро, када сар ядо, саво можэт тэ умарэл. Дажэ само лашэ манушэн, и ӷордость можэт тэ стерэл, кай вонэ на ашэна нисо англа Дэл. Ай кала на заваздэн о шэро, када зваздэл лэ манушэс кадя, кай само би шуто самако мануш ашэл фартэ куч важ о Иегова. [...] О Иегова вивазгля лэ Иисусос, важ кода кай во на завазгля о шэро. Амаро бахтало Дэл авэла лошало тэ дэл и тути лашимос»e. Нинай нисо май лашо, чем тэ радуис оди амарэ небеснонэ Дадэско лэ Иеговаско! (Притчи 23:15).

9. Васо и мануша цырдэнпэ каринг кодэла, ко на заваздэл о шэро?

⁹ Если амэ старысавас тэ на заваздас о шэро, када дэл радость най кати лэ Иеговасти, но и амэнди. И мануша цырдэнпэ каринг кодэла, ко на заваздэл о шэро. Кай тэ полэс васо, трэбуй пэс тэ стос пэ лэнго ҭан (Матфея 7:12). Никасти на чалёл тэ терэл дила кодэлэса, ко вся и время тердёл пэ пэско и на шол сама пэ кода, со гиндон авэр. И амэнди фартэ драго тэ общяемся лэ ԥралэнца и лэ ԥэянца, савэ жувэн па библейско совето, кай всаворэ тэ авэн кацавэ, кай тэ полэн «со по ди ек еқэстэ, тэ авэл... ԥралицко любовь, фартэ тэ жалуин, и тэ на заваздэн о шэро» (1 Петра 3:8). Амэнди чалёл тэ проандярас и время лэ манушэнца, савэ на заваздэн о шэро. Кадяжэ и лэнди чалёл, кала амэ на заваздас о шэро.

10. Васо лэ манушэнди, савэ на заваздэн о шэро, май вушэро тэ пэрэандярэн о ԥаримос?

¹⁰ Лэ манушэнди, савэ на заваздэн о шэро май вушэро тэ пэрэандярэн о ԥаримос. Можэт амэ шас сама, кай и жызня дэкала найсправедливо. О мудро царё Соломоно ԥэндя: «Мэ диқлэм лэ слуӷонэн пэ грас и лэ князёнэн, савэ жанас пешком, сар слуӷоря» (Экклезиаст 10:7). Дэкала, чаче, пэ мануша, савэндэ варисо драго вижал, най вся и время стон патив, сави трэбуй. Ай пэ кодэла, ко най фартэ варисо ӷанэн, пэр лэндэ стон май бари патив. И всаек о Соломоно полэлас, кай май годявэрнэс авэла тэ диқэл пэ жызня кадя, сар исин, и фартэ тэ на шос сама по ԥаримос (Экклезиаст 6:9). Када и поможый тэ на заваздас о шэро.

КАЛА ДИЦОЛ, КАЙ АМЭ НА ЗАВАЗДАС О ШЭРО?

11. Сар амэнди трэбуй тэ диқас пэ кода, кала амэнди подԥэнэн?

¹¹ Кажно дес амэ можэм тэ сыкавас, кай на заваздас о шэро. Када можэт тэ авэл, кала амэнди подԥэнэн, со амэ терас най кадя. Амэнди трэбуй тэ сэрас, если варико витидя время, кай тэ поджал и тэ подэл дума амэнца, файма, амари ошыбка май бари, чем амэ гиндосардям. Андэ кодэя время спэрва на камэлпэ тэ прилас кода, со амэнди подԥэндэ. Амэ можэм бут со тэ ԥэнас андо гиндо пала кодэва мануш и пала кода, сар во амэнца дя дума. Но если амэ на заваздас о шэро, амэ старысаваса тэ прилас кода, со амэнди подԥэнэн.

12. Васо, сар пистромэ андэ Притчи 27:5, 6, амэнди трэбуй тэ авас блаӷодарни важ кода, кай подԥэнэн? Росԥэнэн о примеро.

¹² Мануш, саво на заваздэл о шэро, блаӷодарно, кала лэсти подԥэнэн. Погиндосарам пала кацаво маменто. Например, англа кода, кай тэ залэлпэ и собрания, ту дэс дума лэ ԥралэнца и лэ ԥэянца, и катэ варико тут отцырдэл андэ риг и ԥэнэн, кай тутэ варисо исин пэ данда. Кадэлэ алавэндар тути, канешно, ашэла лажаво. Но ту, файма, авэса блаӷодарно кодэлэ манушэсти, кай во на ашэля мулком. Ту дажэ камлоп, кай во када тэ ԥэндоп май англал. Кадяжэ и амэнди трэбуй тэ на заваздас о шэро и тэ поблаӷодарисарас лэ ԥралэн и лэ ԥэян, савэ закамлэ тэ подԥэнэн амэнди, со терас най кадя. Вонэ амэнди друӷоря, ай най вороӷоря. (Адиносар Притчи 27:5, 6f; Галатам 4:16.)

13. Сар тэ на заваздас о шэро, кала аврэнди дэн почотно дила андэ служэния?

¹³ Кала аврэнди дэн почотно дила андэ служэния. Ек старейшына, савэс ақарэн Джэйсон, росԥэнэн: «Дэкала мэ уӷанав, кай аврэ ԥралэнди дэн варисави дила, и гиндосарав: „Со, во май лашо мандар?“» Сас тумэндэ кацаво? Кала камэс тэ терэс почотно дила андэ служэния, када драго (1 Тимофею 3:1). Но всаек трэбуй тэ следис пала пэстирэ гиндоря. Если на аваса осторожни, тоди андэ амаро ди зажала и ӷордость. Например, кай о христианино можэт тэ авэл кацаво гиндо, кай кадэя дила кати во можэт тэ стерэл. Ай и хулаи варисавэ ԥралэсти можэт тэ гиндой: «Мэрно хулай стерэла када май драго, чем варико авэр». Если амэ па чачимастэ на заваздас о шэро, амэ никала на ласа кадя тэ гиндосарас.

14. Со терэлас о Моисеё, кала аврэнди дэнас почотно дила, и сости амэ андэ када сытювас?

¹⁴ На бистрам, со терэлас о Моисеё, кала аврэнди дэнас почотно дила. Важ лэстэ сас куч кода, кай о Иегова стодя лэс барэдэрэса тэ диқэл пала израильтяноря. Но сар о Моисеё диқля пэ кода, кай дэсо анда лэстири дила о Иегова пэрэдя аврэ муршэнди? Во пэ када на холяйля (Числа 11:24—29). Ай инке во на заваздэлас о шэро и домэкля, кай авэр тэ поможын лэсти тэ сындой лэ народос (Исход 18:13—24). Через када андо Израилё ашэля май бут мурша, савэ поможынас тэ роздиқэн и дила, важ сави сындонаспэ и лэ манушэнди на прижаласпэ долӷо тэ аштярэн. Лэ Моисеёсти сас найважно, кай во сас баро мануш, ай важ лэстэ сас май куч, кай аврэнди тэ авэл драго. Сар драго лэстар тэ сытювас! Амэнди трэбуй акэ со тэ сэрас. Если амэ камас драго тэ терас лэ Иеговастири дила, тоди най кадя важно, кай амэ бут варисо ӷанас, ай май важно, кай амэ на заваздас о шэро. Андэ Библия пистромэ: «Иегова упрэ, во диқэл кодэлэн, ко на заваздэл о шэро» (Псалом 138:6).

15. Со паруделяпэ андэ жызня бутэ ԥралэндэ и ԥэяндэ?

¹⁵ Кала варисо парудёл андэ жызня. Андэ послидни деса бутэ лэ Иеговастирэ служытелёнэнди, савэ ужэ бут бэрша служын, динэ нэви назначения. Кадя, андо 2014 бэрш лэ областнонэ надзирателёнэнди и лэндирэ хулаянди динэ нэвэ назначении. Андэ кодэва жэ бэрш прилинэ ришэния, кай и раёни надзиратели парашэна тэ служын андэ кадэя назначения посли кода, сар лэнди авэла 70 бэрш. Ай координаторя совета старейшын парашэна тэ служын андэ кадэя назначения посли кода, сар лэнди авэла 80 бэрш. Кадяжэ, андэ послиднё время бутэн вефильцонэн бишалдэ тэ служын андэ поля. Ай варикасти прижыляпэ тэ ашавэн пэсти спецыально полновременно служэния через кода, кай варисо най кадя лэ зорэса, через о ери чи па авэр причины.

16. Сар дицэля, кай и ԥрала и ԥэя на заваздэн о шэро, кала лэндэ варисо паруделя андэ жызня?

¹⁶ Кадэлэ ԥралэнди и ԥэянди сас найвушэро тэ залэн тэ жувэн па аврятэ, важ кода кай лэнди сас фартэ куч лэндири служэния. Ай бут андар лэндэ отдинэ кодэлэсти бут бэрша. Дэсавэнди сас фартэ ԥарэс тэ ашавэн кадэя назначения. Но прожыля время и вонэ присытелэ тэ жувэн па аврятэ. Со поможысардя лэнди? Лэнди поможысардя кода, кай вонэ любинас лэ Дэвлэс. Вонэ отдинэ пэс лэ Иеговасти, ай най варисавя дилати. Кадэла христианоря на динэсас лэ Иеговасти алав, кай лэна тэ служын лэсти, кати важ кода, кай во тэ дэл лэнди варисави важно дила (Колоссянам 3:23). Вонэ на заваздэн о шэро и лошалэ тэ служын лэ Иеговасти котэ, каринг во лэн бишалэл. Вонэ отдинэ всаворэ пэстирэ пэрэжывании лэсти и ӷанэн, кай во заботийпэ пала лэндэ (1 Петра 5:6, 7).

17. Васо амэ блаӷодарни лэ Дэвлэсти, кай и Библия сытярэл амэн тэ на заваздас о шэро?

¹⁷ Амэ блаӷодарни лэ Дэвлэсти, важ кода кай и Библия сытярэл амэн тэ на заваздас о шэро. Если амэ на заваздас о шэро, аврэнди драго тэ авэн паша амэндэ. А инке, если на заваздас о шэро, кодэлэстар драго най кати амэнди, но и кодэлэнди, ко паша амэндэ. Кадяжэ амэнди май вушэро тэ пэрэандярас о ԥаримос. Но май важно, кай через кода, кай амэ на заваздас о шэро, амэ ашас май пашэ каринг амаро небесно Дад. Сар жэ амэ лошалэ, кай «кодэва, ко упрэ, и фартэ дур», о Дэл Иегова любий и цэний пэстирэ служытелёнэн, савэ на заваздэн о шэро! (Исаия 57:15).