«Важ вся блаӷодарин»

ГИНДОС ту пала пэстэ, кай ту блаӷодарно мануш? Пала када ашэл тэ погиндос. Андэ Библия сас пистромэ, кай андэ амарэ деса бут мануша авэна найблаӷодарни (2 Тимофею 3:2). Файма, тумэ диқлэ манушэн, савэ гиндон, кай всаворэ лэнди вужылэ и кай вонэ на трэбуй никас тэ блаӷодарин. Хэба драго тэ авэс паша кацаво мануш?

Лэ Иеговастирэ служытелёнэнди сас ԥэндо: «Авэн блаӷодарни» и «Важ вся блаӷодарин» (Колоссянам 3:15; 1 Фессалоникийцам 5:18). Кала ӷанас тэ блаӷодарисарас, када анэн амэнди лашимос. Пэ када исин дэсавэ причины.

АМЭНДИ ДРАГО, КАЛА АМЭ БЛАӶОДАРНИ

Ек, васо амэ трэбуй тэ авас блаӷодарни, када, кай тэ полас, кай кадэлэстар амэнди май драго. Кала амэ варикас блаӷодарисарас, када анэн лашимос амэнди и аврэнди. Погиндон, кала мануш терэл варисо важ тумэндэ, хэба, када на сыкавэл, кай тумэ ашэн, кай авэр стодя зор, кай тумэнди тэ авэл драго? Во заботийпэ пала тумэндэ. И тумэ полэн, кай тумэ варисо ашэн. Файма, кадя сас ла Руфяса. И Руфь поля, кай о Воозо заботийпэ пала латэ анда оди. Кадэлэстар лати ашэля драго по ди, кай пала латэ варико заботийпэ (Руфь 2:10—13).

Фартэ важно тэ авас блаӷодарни лэ Дэвлэсти. Тумэ, файма, най еқвар гиндонас, скати лашимос терэл о Дэл важ амэндэ (Второзаконие 8:17, 18; Деяния 14:17). Трэбуй най еқвар тэ погиндос пала лэ Дэвлэско лашимос. Авелоп драго тэ витидэс и время, кай драго тэ погиндос пала лашимос, саво во сыкавэл каринг амэндэ и каринг амарэ чаче. Кала гиндон пала кода, кай о Дэл дэл анда оди, кадэлэстар тумари блаӷодарность ашэла май бари. И тумэ инке май фартэ полэна, кай во тумэн любий и тумэ важ лэстэ куч (1 Иоанна 4:9).

Трэбуй най кати тэ гиндосарас пала кода, кай о Иегова дэл анда оди и тэ гиндосарас, кай во заботийпэ, ай трэбуй инке тэ блаӷодарисарас лэс пала лэстири лащи дила (Псалом 100:4, 5). Сар пистромэ андэ ек научно книжка, «кай тэ авас бахталэ, трэбуй тэ сыкавас и блаӷодарность».

КАЛА ТУМЭ БЛАӶОДАРНИ, ТУМАРИ ДРУЖБА АВЭЛА МАЙ ЛАЩИ

Авэр лашимос, саво анэн амэнди блаӷодарность, када кай кадэлэстар амари дружба ашэл май лащи. Кажно камэл, кай лэс тэ полэн. Кала тумэ анда оди блаӷодарин варикас, кай во тердя варисаво лашимос, тумэ ашэн май пашэ ек еқэсти (Римлянам 16:3, 4). Ай инке и блаӷодарни мануша май часто поможын аврэнди. Вонэ диқэн о лашимос, саво лэнди тердэ, и важ када вонэ кадяжэ терэн лашимос. Кала поможысарас аврэнди, амэ ашас май бахталэ. О Иисусо ԥэндя най евья: «Май бари бах, кала дас, чем кала лас» (Деяния 20:35).

О Роберто Эммонсо, профессоро андо Калифорнийско университето, кай май драго уӷанэн пала блаӷодарность, ԥэндя: «Кай тэ авас блаӷодарни, амэ трэбуй тэ полас, кай амэ на обжасапэ ек би ек аврэско. Дэкала амэ дас, ай дэкала амэнди дэн». И па чачимастэ, амари жызня и кай амэ тэ авас бахталэ, на обжалапэ би аврэ манушэнго. Например, би лэнго амэндэ на авелоп хамос и амэ на личисайлоп (1 Коринфянам 12:21). Важ о блаӷодарно мануш куч кода, со терэн важ лэстэ авэр. Ай тумэ сытелэ тэ блаӷодарин аврэн чи най?

БЛАӶОДАРНОСТЬ И САР ТУМЭ ДИҚЭН ПЭ ЖЫЗНЯ

Исин инке ек маменто, васо трэбуй тэ сытювас тэ блаӷодарисарас. Блаӷодарность поможый амэнди май драго тэ диқас пэ жызня. Амаро гиндо можэт тэ витидэл варисо ек и тэ на шол сама пэ авэр варисо. Блаӷодарно мануш шол сама ек по лашимос и най фартэ шол сама по ԥаримос. Со май бут амэ блаӷодарисарас аврэн, со май бут амэ шас сама по лашимос и через када ласа май бут тэ блаӷодарисарас. Кала амэ шас сама пэ кода, пала со можно тэ блаӷодарисарас, амэнди авэла май вушэро тэ терас кадя, сар ԥэндя о апостоло Павло: «Лошавэн, кай тэлён лэ Ӷосподости [лэ Иеговасти]» (Филиппийцам 4:4).

И блаӷодарность поможый амэнди тэ улас и найлашэ гиндоря, када, кала вороӷуин, ԥаримос и холи. Ай инке блаӷодарни мануша май набут гиндон пала ловэ. Важ лэндэ куч кода, со лэндэ исин и на камэн со бы тэ на авэл, тэ лэн май бут (Филиппийцам 4:12).

ГИНДОН ПАЛА ЛАШИМОС, САВО ТУМЭНДЭ ИСИН

Амэ полас, кай о Сатана камэл, кай через о ԥаримос, саво амэндэ исин андэ кадэла послидни деса, кай амэ тэ умэкас и вас. Во авелоп лошало, кай амэнди тэ авэл ԥарэс по ди и кай амэ вся и время тэ роваспэ. Через када амэнди авелоп ԥарэс тэ служысарас. И блаӷодарность када ек, сости сытярэл о свынто духо. Кадяжэ кордэ ужал, кала амэ лошавас и патяс. Амэ лошавас, кала диқас, саво лашимос дэл амэнди о Дэл и патяс андэ кода, пала со во дэл алав (Галатам 5:22, 23).

Сар лэ Иеговастирэ свидетеля, тумэ авэна соӷласни кодэлэса, со пистромэ пала блаӷодарность андэ кадэя статья. Но тэ ӷанэс тэ авэс блаӷодарно и тэ диқэс ек о лашимос, када на авэл корко пэстар. Но на умэк и вас, кадэлэсти можно тэ сытёс. Сар? Кажно дес витидэ время, кай тэ погиндос, пала со ту блаӷодарно андэ пэстири жызня. Со май часто ту када терэса, со май драго тутэ вижала тэ блаӷодарис. Ту авэса май бахтало кодэлэндар, ко диқэл анда жызня ек о ԥаримос. Гиндосар пала лашимос, саво терэн важ тутэ о Дэл и мануша, савэ паша тутэ. Можно дажэ тэ запистрос, пала со ту санас блаӷодарно кажно дес.

И учони полинэ, кала амэ вся и время блаӷодарисарас аврэн, через када можэт тэ терэл па аврятэ амари годи, и амэнди кадэлэстар авэла май вушэро тэ жувас. Блаӷодарни мануша май бахталэ. Цэнин вся о лашимос, саво тумэндэ исин. Мэк важ тумэндэ авэл куч кажно лашо маменто андэ тумари жызня. Май бут блаӷодарин! На прилэн вся, кай кадя и трэбуй тэ авэл, «блаӷодарин лэ Иеговас, важ кода кай во добро». Да, «важ вся блаӷодарин» (1 Летопись 16:34; 1 Фессалоникийцам 5:18).