Амэ жаса тумэнца

1. Со о Иегова ԥэндя па амари время?

О ИЕГОВА ԥэндя па амари время: «Андэ кодэла деса дэш мануш анда всаворэ нацыи, савэ дэн дума пэ разни шыба, астардёна пала лэ иудеёстири йда, астардёна и ԥэнэна: „Амэ жаса тумэнца, важ кода кай амэ ашундям, кай тумэнца о Дэл“» (Захария 8:23). О «иудеё» катэ сыкавэл лэ памазаниконэн. Пэр лэндэ ԥэнэн «лэ Дэвлэско Израилё» (Галатам 6:16). И «дэш мануш», када мануша, савэ аштярэн о лашимос, кай жувэна вечно пэ ԥув. Вонэ ӷанэн, кай лэ памазаниконэн витидя о Иегова. Важ лэндэ бари бах тэ служын лэнца еқэҭанэ.

2. Сар тэ полэс, кай и «дэш мануш» моӷут «тэ жан» лэ памазаниконэнца?

² Амэ адес на ӷанас, сар ақарэн всаворэн памазаниконэн, савэ инке жувэн пэ ԥув. И мануша, савэ аштярэн о лашимос пэ ԥув, моӷут «тэ жан» лэнцаb. Сар када можэт тэ авэл? Андэ Библия пистромэ, кай и «дэш мануш» «астардёна пала лэ иудеёстири йда, астардёна и ԥэнэна: „Амэ жаса тумэнца, важ кода кай амэ ашундям, кай тумэнца о Дэл“». Хоть катэ и дума жал пала ек иудеё, о алав «тумэнца» сыкавэл, кай и дума жал най пала ек памазанико, ай пала бут памазаникоря. Кодэла, ко най помазано лэ свынтонэ духоса, служын еқэҭанэ лэнца. Но вонэ на гиндон, кай и памазаникоря варисавэ барэ ашунглэ мануша, ай полэн, кай амаро само баро учителё, када о Иисус Христос (Матфея 23:10).

3. Пала савэ вопросоря подаса дума андэ кадэя статья?

³ Важ кода кай адес машкар амэндэ инке жувэн пэ ԥув и памазаникоря, амэндэ моӷут тэ авэн вопросоря. Пэрво, сар и памазаникоря трэбуй тэ полэн корко пэс? Дуйто, сар трэбуй тэ полас кодэлэн, ко хал о марно и пэл о вино по Вэчэро, кай сэрэн лэ Иисусостири смэрть? Трито, трэбуй чи най тэ пэрэжываем, кай кацавэ манушэн ашэл май бут? Давайте роздиқаса и атветоря пэ кадэла вопросоря.

САР И ПАМАЗАНИКОРЯ ТРЭБУЙ ТЭ ПОЛЭН КОРКО ПЭС?

4. Пэр со лэ памазаниконэнди трэбуй фартэ тэ шон сама, сар пистромэ андэ 1 Коринфянам 11:27—29?

⁴ Лэ памазаниконэнди трэбуй фартэ тэ шон сама пэ кода, со пистромэ андэ 1 Коринфянам 11:27—29c (адиносар). Со можэт тэ терэлпэ, кай о памазанико лэл тэ хал о марно и тэ пэл о вино по Вэчэро, кай сэрэн лэ Иисусостири смэрть, и тэ ашэлпэ «дошало»? Кацаво можэт тэ терэлпэ, если во андэ кодэя время на жувэл па лэ Иеговастирэ законоря (Евреям 6:4—6; 10:26—29). И памазаникоря полэн, если вонэ камэн, кай лэнди тэ дэн «наӷрада, сави дя о Дэл, через о Иисус Христос», кай тэ жувэн по нэбо, лэнди трэбуй тэ на парашэн тэ кандэн лэ Иеговас (Филиппийцам 3:13—16).

5. Сар и памазаникоря трэбуй тэ полэн корко пэс?

⁵ Лэ Иеговаско духо поможый лэ христианонэнди, кай вонэ тэ на гиндон пала пэстэ бут и тэ на заваздэн о шэро (Эфесянам 4:1—3; Колоссянам 3:10, 12). Важ када и памазаникоря на гиндон, кай вонэ май лашэ аврэндар. Вонэ полэн, кай о Иегова на дэл май бут свынто лэнди, чем кодэлэнди, ко лэла тэ жувэл андо раё пэ ԥув. Вонэ на ԥэнэн, кай вонэ май бут полэн о чачимос анда Библия. И вонэ на ԥэнэн аврэнди, кай кодэла тожэ памазаникоря и вонэ кадяжэ трэбуй тэ хан о марно и тэ пэн о вино по Вэчэро. Вонэ полэн, кай кати о Иегова витидэл, ко анда мануша лэла тэ жувэл по нэбо.

6. Сар трэбуй тэ андярэн пэс и помазани христианоря, сар пистромэ андэ 1 Коринфянам 4:7, 8?

⁶ Хоть тэ получис о лашимос тэ жувэс по нэбо, када бари бах, но и памазаникоря на гиндон, кай лэн трэбуй май фартэ тэ шон сама, чем аврэн (Филиппийцам 2:2, 3). И памазаникоря ӷанэн, кала о Иегова дэл о свынто духо лэнди, во на ԥэнэн пала када аврэнди. Важ када и памазаникоря на удивинпэ, кай дэсавэ христианоря на патян, кай вонэ лэна тэ жувэн по нэбо. Вонэ сэрэн о совето анда Библия, саво важ и христианоря, кай тэ на грабин тэ патян, кала варико ԥэнэн, кай о Дэл лэн витидя важ особо дила (Откровение 2:2). Кай тэ на шон фартэ бут сама пэр пэстэ, и помазани христианоря на лэна тэ росԥэнэн, сар кати варикас диқэн пэрво разо, кай вонэ аштярэна лашимос тэ жувэн по нэбо. И канешно, вонэ на лэна тэ абурон, кай лэн витидя о Дэл. (Адиносар 1 Коринфянам 4:7, 8d.)

7. Со на терэн и памазаникоря и васо?

⁷ И памазаникоря на гиндон, кай вонэ май ашунглэ аврэндар, и на гиндон, кай лэнди трэбуй тэ проандярэн время кати аврэ памазаниконэнца. Вонэ на родэн аврэн памазаниконэн, кай тэ подэн дума лэнца пала лашимос, саво авэла лэндэ по нэбо. Вонэ на стидэнпэ кацавэ манушэнца, сар вонэ, кай еқэҭанэ тэ уӷанэн май драго и Библия (Галатам 1:15—17). Кадэлэса вонэ роздилисардоп и собрания и жылоп против о свынто духо, савэстар мирно и ладно андэ лэ Дэвлэско народо (Римлянам 16:17, 18).

САР ТРЭБУЙ ТЭ ПОЛАС ЛЭ ПАМАЗАНИКОНЭН?

8. Васо трэбуй тэ диқас пала кода, сар амэ пэс андярас лэ памазаниконэнца? (Диқэн кадяжэ и сноска.)

⁸ Сар амэ трэбуй тэ полас лэ ԥралэн и лэ ԥэян, савэ памазаникоря? На трэбуй лэн фартэ бут тэ шас сама, дажэ если вонэ помазани лэ Христостирэ ԥрала (Матфея 23:8—12). Например, андэ Библия пистромэ, кай амэндэ тэ авэл кацави жэ вера, сар кай и старейшыноря. Но и Библия амэн на сытярэл тэ зваздас лэ манушэс, и тэ полас лэс, сар фартэ ашунглэ манушэс (Евреям 13:7). Канешно, андэ Библия пистромэ, кай дэсавэнди «дувар май бут патив». Важ кода кай вонэ «пала вся драго диқэн» и «стон бут зор, кай тэ росԥэнэн и тэ сытярэн», ай най важ кода, кай вонэ памазаникоря (1 Тимофею 5:17). Амэ на ласа фартэ бут тэ хвалисарас лэ памазаниконэн чи тэ шас фартэ бут сама, кай лэнди тэ на авэл лажавоe. Инке через када вонэ моӷут тэ заваздэн о шэро (Римлянам 12:3). Амэ на камлоп, кай через амэндэ варико анда лэ Христостирэ ԥрала тэ терэл бари ошыбка! (Луки 17:2).

9. Сар тэ стас патив пэ кодэла, кас о Иегова витидя тэ жувэн по нэбо?

⁹ Сар жэ амэнди тэ сыкавас, кай стас патив пэ кодэла, кас о Иегова витидя тэ жувэн по нэбо? Када тэ на задас лэнди вопросоря пала кода, сар вонэ ашэлэ памазаникоря? Када ек лэндири дила и амэнди на трэбуй пала када тэ ӷанас (1 Фессалоникийцам 4:11; 2 Фессалоникийцам 3:11). Кадяжэ амэ на ласа тэ гиндосарас, кай лэнго дад чи дэй, чи лэнго хулай чи хулаи, чи авэр родо, кадяжэ памазаникоря. Лэ манушэсти када на пэрэдэлпэ лэ дадэстар чи ла датар, ай када лэ Дэвлэстар (1 Фессалоникийцам 2:12). Ай инке на трэбуй тэ допушас лэ хуластар чи ла хулаятар, ко помазано, пала кода, со лэндэ по ди, кала вонэ гиндон, кай лэна тэ жувэн вечно пэ ԥув би пэстирэ хуласко чи хулаяко. Кацавя думатар лэнди можэт тэ авэл ԥарэс по ди. Ай амэ фартэ патяс, кай андо раё пэ ԥув о Иегова дэла «кажнонэсти, ко жувэл... вся, со во камэл» (Псалом 145:16).

10. Состар амэ фэрисараса пэс, если на ласа тэ диқас пэ манушэндэ, сар пэ фартэ ашунглэ мануша?

¹⁰ Кодэла, ко годявэрнэс диқэн пэ памазаникоря, фэрин пэс. Состар? Андэ Библия пистромэ, кай дэсавэ памазаникоря моӷут тэ отжан лэ Дэвлэстар (Матфея 25:10—12; 2 Петра 2:20, 21). Если амэ на диқас пэ манушэндэ, сар пэ фартэ ашунглэ мануша, тоди амэ на тераса, сар вонэ. Амэ тераса правильно дажэ, если када и памазаникоря чи ашунглэ христианоря, чи кодэла, ко служый лэ Дэвлэсти бут бэрша (Иуды 16). Тоди, если кадэва мануш ашавэла лэ Дэвлэс чи ужала анда собрания, амари дружба лэ Иеговаса всаек ашэлапэ лащи и амэ на парашаса лэсти тэ служысарас.

ТРЭБУЙ ЧИ НАЙ ТЭ ПЭРЭЖЫВАЕМ, КАЙ ЛЭ ПАМАЗАНИКОНЭН АШЭЛ МАЙ БУТ?

11. Сар паруделяпэ кода, скати мануша варикала по Вэчэро ханас о марно и пэнас о вино и скати акана?

¹¹ Бут бэрша лэ манушэн, савэ хан о марно и пэн о вино по Вэчэро, кай сэрэн лэ Иисусостири смэрть, ашэлас май набут. Но андэ послиднё время лэн ашэл май бут. Трэбуй чи най амэ пала када тэ пэрэжываем? Най. Давай роздиқам васо.

12. Васо на трэбуй тэ пэрэжываем, кай лэ памазаниконэн ашэл май бут?

¹² «О Иегова ӷанэн кодэлэн, ко лэско» (2 Тимофею 2:19). И ԥрала, савэ адинон скати мануша халэ о марно и пилэ о вино по Вэчэро, кай сэрэн лэ Иисусостири смэрть, на ӷанэн, ко андар лэндэ па чачимастэ памазанико. Када ӷанэн ек о Иегова. Важ када андэ кадэва чи́сло ужан и кодэла, ко кати гиндон, кай вонэ памазаникоря. Например, дэсавэ андэр лэндэ парашэлэ тэ хан о марно и тэ пэн о вино по Вэчэро, кай сэрэн лэ Иисусостири смэрть. Ай авэр через пэско ԥаримос чи насвалимос гиндон, кай лэна тэ правин лэ Иисусоса по нэбо. Дицол, кай точно на вижал тэ ԥэнас, скати памазаникоря инке жувэн пэ ԥув.

13. Андэ Библия пистромэ чи най, скати памазаникоря ашэнапэ пэ ԥув, сар залэлапэ и само бари бида?

¹³ Кала о Иисусо авэла, кай тэ залэл лэ памазаниконэн по нэбо, вонэ андэ кодэя время авэна андэ разни ҭана пэ ԥув (Матфея 24:31). Андэ Библия пистромэ, кай андэ послидни деса люмати, савяса правий о Сатана, пэ ԥув авэна набут памазаникоря (Откровение 12:17). Но андэр латэ най пистромэ, скати лэн ашэнапэ, сар залэлапэ и само бари бида, и кай вонэ жувэна.

14. Со, сар пистромэ андэ Римлянам 9:11б, 16, трэбуй тэ полас, кала о Дэл витидэл лэ памазаниконэн?

¹⁴ Ек о Иегова ӷанэн, кала тэ витидэл лэ памазаниконэн (Римлянам 8:28—30). О Дэл ля тэ витидэл лэ памазаниконэн посли кода, сар о Иисусо рисайля каринг и жызня. Файма, андэ пэрво вико всаворэ чачунэ христианоря сас памазаникоря. Но кала прожылэ бут бэрша, кодэла, ко ԥэнэнас пэр пэстэ, кай вонэ лэ Христостирэ ученикоря, на сас кацавэ. Но дажэ андэ кодэя жэ время, о Иегова помазал лэ свынтонэ духоса кодэлэн христианонэн, савэ на парашэнас лэс тэ кандэн. Вонэ, можно тэ ԥэнэс, када о «зэрно», саво, сар ԥэндя о Иисусо, барёлас машкар и бурьяноря (Матфея 13:24—30). Андэ «послидни деса» о Иегова на парашэл тэ витидэл кодэлэн, ко ужал андэ 144 000f. Важ када, если о Дэл витидя варикас, кай тэ жувэл по нэбо, кала кончийпэ кадэя время, тоди, ко амэ кацавэ, кай тэ на патяс андэ лэстири мудрость? (Адиносар Римлянам 9:11бg, 16h.)i Амэнди трэбуй тэ фэрисавас, кай тэ на авас, сар и холинатирэ рабочи, пала савэ росԥэндя о Иисусо андэ ек примеро. Вонэ дэнас дума холяса через кода, скати ловэ потиндя о хулай кодэлэнди, ко тердя бути кати ек часо (Матфея 20:8—15).

15. Всаворэ чи най памазаникоря, када о «годявэрно и кандино рабо», пала саво пистромэ андэ Матфея 24:45—47? Росԥэнэн.

¹⁵ Най всаворэ, ко жувэна по нэбо, када «годявэрно и кандино рабо». (Адиносар Матфея 24:45—47j.) Сар и андэ пэрво вико, адес о Иегова и о Иисусо праварэн чи сытярэн бутэн через и набут. Андэ пэрво вико кати дэсавэ помазани лэ свынтонэ духоса христианоря пистронас Христиански Гречески Писания. Адес тэ роздэн о «хамос, кала када трэбуй» кадяжэ приԥэндя кати найбутэ памазаниконэнди.

16. Со тумэ уӷанглэ анда кадэя статья?

¹⁶ Акана, со амэ уӷанглям анда кадэя статья? Бутэнди пэстирэ служытелёнэнди о Иегова витидя тэ дэл вечно жызня пэ ԥув. Ай по нэбо лэна тэ жувэн кати кодэла набут мануша, ко лэла тэ правий лэ Иисусоса. О Иегова наӷрадия всаворэн, ко лэсти служын. И кодэлэ иудеёс и кодэлэ дэшэн манушэн. Во аштярэл, кай и кадэла и кодэла, лэна тэ жувэн па ек законо и на парашэна лэс тэ кандэн. Всаворэнди амэнди трэбуй тэ на заваздас и шэрэ. Амэ трэбуй тэ служысарас еқэҭанэ и тэ авас, сар ек. Амэнди всаворэнди трэбуй тэ терас вся, кай тэ авэл мирно андэ собрания. Важ кода кай послидни деса йто кончинапэ, давайте тэ на парашас тэ служысарас лэ Иеговасти, сар ек стадо, пала саво диқэл о Христос (Иоанна 10:16).