СТАТЬЯ, КАЙ ТЭ СЫТЮВАС 30
На парашэн тэ жувэн па лэ Дэвлэско законо
«Важ мандэ нинай май бари лош, сар тэ ашунав, кай всаворэ мэрнэ бэяцэ жувэн па лэ Дэвлэско законо» (3 ИОАННА 4).
ДИЛИ 54 «Вот путь»
ПАЛА СО УӶАНАСА АНДА СТАТЬЯ?a
1. Состар радуинпэ лэ Иеговастирэ служытеля, сар запистромэ андэ 3 Иоанна 3, 4?
ПОГИНДОН, сар лошавэлас о апостоло Иоанно, кай кодэла, касти во поможысардя тэ уӷанэн о чачимос пала Дэл, на парашэн тэ служын лэ Дэвлэсти. Кай кадэла христианоря, савэ на парашэнас тэ кандэн лэ Иеговас, и савэ сас важ о Иоанно, сар бэяцэ, сас бут ԥаримос. И важ када о апостоло Иоанно терэлас вся, кай тэ поможый лэнди май фартэ тэ патян лэ Иеговасти. Амэ кадяжэ фартэ лошавас, кала амарэ бэяцэ чи кодэла, кас амэ сытярас па Библия, болдён и на парашэн тэ служын лэ Иеговасти. (Адиносар 3 Иоанна 3, 4b.)
2. Васо о Иоанно пистросардя пэстирэ трин письморя?
2 Лэ апостолос лэ Иоаннос одбишалдэ по острово Патмос, и котэ во сас, сар андо баруно. Сар во рисайля котар, во, файма, ля тэ жувэл андо форо Эфесо чи варикай паша лэстэ. Андэ кодэя время, варикай андэ 98 бэрш лэ И. Х., через лэ Дэвлэско свынто духо во пистросардя трин письморя. Через кадэла письморя во камэлас тэ поможый лэ христианонэнди, савэ на парашэнас тэ кандэн лэ Дэвлэс, кай вонэ май фартэ тэ патян андо Иисусо и кай тэ на парашэн тэ жувэн па лэ Дэвлэско законо.
3. Пэ савэ вопросоря амэ уӷанаса атветоря анда кадэя статья?
3 О Иоанно сас послиднё, ко ашэляпэ жундо анда апостолоря. Во пэрэжывал важ и собрания, и фэрияс ла лэ отступниконэндар (1 Иоанна 2:18, 19, 26)c. Кадэла мануша ԥэнэнас, кай ӷанэн лэ Дэвлэс, но па чачимастэ вонэ на жувэнас па лэско законо. Подам дума, савэ советоря лэ Дэвлэстар дя о апостоло Иоанно лэ христианонэнди, и уӷанам атветоря пэ трин вопросоря. Сар тэ жувас па лэ Дэвлэско законо? Со можэт тэ змарэл амэн па лэ Дэвлэско дром? Сар тэ поможысарас ек еқэсти, кай тэ на отжас кодэлэстар, сости сытярэл о Дэл?
САР КАДА ТЭ ЖУВАС КАДЯ, САР СЫТЯРЭЛ О ДЭЛ?
4. Со, сар дицол анда 1 Иоанна 2:3—6 и 2 Иоанна 4, 6, амэнди трэбуй, кай тэ жувас кадя, сар сытярэл о Дэл?
4 Кай тэ жувас кадя, сар сытярэл о Дэл, амэнди трэбуй тэ ӷанас о чачимос, саво запистромэ андэ Библия. Кадяжэ амэнди трэбуй и тэ терас кадя, сар приԥэнэн о Иегова. (Адиносар 1 Иоанна 2:3—6d; 2 Иоанна 4e, 6f.) О Иисусо сыкадя со май лашо примеро андэ када. Вижал, если амэ камас тэ кандас лэ Иеговас, амэнди трэбуй май драго тэ сытювас лэ Иисусостар (Иоанна 8:29; 1 Петра 2:21).
5. Андэр со амэ трэбуй фартэ тэ патяс?
5 Кай тэ на парашас тэ жувас па лэ Дэвлэско законо, амэ трэбуй фартэ тэ патяс, кай о Иегова никала на хохавэл. Вся, со во ԥэндя амэнди через и Библия, када чачимос. Кадяжэ амэ трэбуй тэ патяс, кай о Иисусо, када о Христос. Адес бут мануша на патян, кай о Иисусо, када Царё андэ лэ Дэвлэско Царство, савэс стодя о Иегова. Андэ пэско письмо о Иоанно ԥэндя, кай андэ люма ашэля фартэ бут манушэн, савэ хохавэн, и савэ моӷут тэ змарэн кодэлэн, ко най фартэ патял андо Иегова и андо Иисусо (2 Иоанна 7—11). Во пистросардя: «Ко хохавно, если най кодэва, ко ԥэнэн, кай о Иисусо, када най о Христос?» (1 Иоанна 2:22). Ек со можэт тэ фэрий, кай амэн тэ на обхохавэн, када если амэ сытювас па Библия. Кати кадя амэ драго уӷанаса лэ Иеговас и лэ Иисусос (Иоанна 17:3). И кати кадя амэ поласа, кай ӷанас о чачимос пала лэндэ.
СО АМЭН МОЖЭТ ТЭ ЗМАРЭЛ?
6. Саво ԥаримос исин кай и тэрнэ христианоря?
6 Всаворэ христианонэнди трэбуй тэ авэн осторожни, кай тэ на гиндон, сар и мануша, савэ на ӷанэн лэ Иеговас (1 Иоанна 2:26). Май фартэ кадэлэстар трэбуй тэ фэринпэ лэ тэрнэ манушэнди. Акэ, со ԥэнэн и Алексьяg анда Франция, савяти 25 бэрш: «Кала мэ сытювавас андэ школа, амэн сытярэнас, кай най о Дэл создал лэ манушэн, ай вонэ появисайлэ корко пэстар. Ай кадяжэ росԥэнэнас бут со авэр, андэр со патян и мануша, савэ на ӷанэн лэ Дэвлэс. Дэкала манди здэласпэ, кай када вся правильно. Но мэ ужэ на ӷанавас, кай о чачимос и дошаляравас пэс пала када. Мэ гиндосаравас, кай авелоп нэправильно просто тэ ашунав лэ учителёнэн и тэ на шав сама пэ кода, сости сытярэл и Библия». И Алексья проадиносардя и книжка «Жизнь — как она возникла? Путем эволюции или путем сотворения?». Вой упалэ ля тэ патял, кай о Дэл создал лэ манушэн. Вой ԥэнэн: «Мэ полэм, кай о чачимос андэ Библия и кай если мэ лава тэ жував кадя, сар котэ пистромэ, мэ авава лошали и по ди мандэ авэла драго».
7. Состар амэ трэбуй тэ фэрисавас и васо?
7 Всаворэ амэ и тэрнэ и ԥурэ, трэбуй тэ фэрисавас кодэлэстар, кай тэ притераспэ, кай служысарас лэ Иеговасти, и андэ кодэя жэ время тэ терас нэправильно дила. О Иоанно ԥэндя, кай амэ нэ можэм тэ жувас па лэ Дэвлэско законо и андэ кадэя жэ время тэ на терас кадя, сар во сытярэл (1 Иоанна 1:6). Если амэ камас, кай о Иегова тэ лошавэл, тоди амэ вся и время ласа пэс тэ андярас кадя, кабута вся, со амэ терас дицол, сар пэ палматэ. Па чачимастэ, нинай кацаво ӷрехо, саво угаравэса. Дажэ если пала варисавэ ӷрехоря на ӷанэн и мануша, пала лэндэ ӷанэн о Иегова (Евреям 4:13).
8. Саво гиндо амэ нащи тэ домэкас?
8 Амэ на трэбуй тэ диқас по бэзэх кадя, сар диқэн и мануша, савэ на полэн лэ Иеговас. О апостоло Иоанно пистросардя: «Кала амэ ԥэнас: „Амэ би бэзэхэско“, амэ хохавас корко пэс» (1 Иоанна 1:8). Андэ кодэя время, кала жувэлас о Иоанно, и отступникоря ԥэнэнас, кай можно тэ терас о бэзэх и андэ кодэя жэ время тэ на хасарас и дружба лэ Дэвлэса. Адес бут мануша гиндон кадяжэ. Вонэ ԥэнэн, кай патян андо Дэл, но всаек нэ соӷласни кодэлэса, сар о Иегова диқэл по бэзэх. И май фартэ вонэ нэ соӷласни, кала и дума жал пала билажавардимос. Кода, пэр со о Иегова ԥэнэн, кай када билажавардимос, вонэ ԥэнэн, кай андэ када нинай нисо вэрыто. И вонэ моӷут када тэ терэн, если камэлпэ.
Шавэ и щея, тумэнди трэбуй екжэнэнди тэ полэн, кай кода, сар о Дэл диқэл по билажавардимос, када правильно. Тоди тумэ сможэте тэ зашонпэ пала кода, андэр со патян (Диқэн о абзацо 9.)l
9. Саво лашимос анэна лэ тэрнэ манушэнди, кала вонэ ритярдён кодэлэсти, сости сытярэл и Библия?
9 Лэ тэрнэ христианонэнди можэт тэ авэл фартэ ԥарэс тэ виритярэн, кала пэр лэндэ тасавэн кодэла, каса вонэ сытён андо ек класо чи кодэла, каса вонэ терэн бути. Кодэла мануша моӷут вся и время тэ ԥэнэн лэнди, кай вонэ тэ гиндон кадя жэ, сар и вонэ пала кода, со билажавардо, ай со най. Акэ со росԥэнэн о ԥрал, савэс ақарэн Александро: «Андэ школа, сас кацавэ рақлёра, савэ фартэ камэнас, тэ терав лэнца билажавардимос. Кала мэ отԥэнделэм, вонэ ԥэндэ, кай манди чалён и мурша». Если тумэнди прижалпэ тэ пэрэандярэн кацаво, сэрэн акэ со. Если тумэ лэна тэ терэн кадя, сар сытярэл и Библия, тумэ на хасарэна и патив каринг пэстэ, на хасарэна о зор и по ди авэла драго. Ай кадяжэ тумэ фэрина и дружба лэ Иеговаса. Сар тумэ на подэнапэ, тоди кажно разо тумэнди авэла май вушэро тэ терэн кода, со правильно англа Дэл. На бистрэн, кай кадэва найлашо гиндо пала билажавардимос лэ Сатанастар. Важ када, кала тумэ отԥэндён тэ гиндон кадя, сар и мануша, савэ на ӷанэн лэ чачунэ Дэвлэс, тумэ победин лэ Сатанас (1 Иоанна 2:14).
10. Сар и алава анда 1 Иоанна 1:9 поможын тэ служысарас лэ Иеговасти вужэ одеса?
10 Амэ полас, кай кати о Иегова можэт тэ ԥэнэн, со ӷрехо, ай со най. И амэ стас вся о зор, кай тэ на ӷрешысарас. Но если амэ шылисайлям, тоди амэ росԥэнас пала када лэ Иеговасти андэ молитва. (Адиносар 1 Иоанна 1:9h.) Ай кала стердям о ӷрехо, амэ мангас помощь кай и старейшыноря, савэнди о Иегова ԥэндя тэ заботинпэ пала амэндэ (Иакова 5:14—16). Но амэ на трэбуй тэ дошалярас пэс важ кодэла ошыбки, савэ стердям дэлмут. Васо? Важ кода кай амаро любящё Дад, отдя пэстирэ Шавэс, саво муля важ амэндэ, кай тэ простинпэ амарэ ӷрехоря. О Иегова простий амэн, кала амэ па чачимастэ каисавас. Важ када амэн нисо на ритярэла тэ служысарас лэ Иеговасти вужэ одеса (1 Иоанна 2:1, 2, 12; 3:19, 20).
11. Сар тэ фэрисавас кодэлэстар, состар можэм тэ на допатяс лэ Дэвлэсти?
11 Амэ трэбуй тэ на ашунас кода, сости сытярэн и отступникоря. Сар кати появисайля и христианско собрания, о Сатана стол зор, кай лэ Дэвлэстирэ служытеля, савэ на парашэн тэ кандэн, тэ на допатян лэ Дэвлэсти. Важ када трэбуй тэ ӷанас, сар тэ полас, кай о чачимос, ай кай о хохаимосi. Амарэ вороӷоря через интэрнэто и соцыальни сети розындярэн о хохаимос, кай амэ тэ на допатяс лэ Иеговасти и най кадя фартэ тэ любисарас лэ ԥралэн. Сэрэн, ко тердён пала кадэва хохаимос и на патян кадэла хохаимасти, саво лэ Сатанастар! (1 Иоанна 4:1, 6; Откровение 12:9).
12. Васо трэбуй май фартэ тэ патяс андэ кода, со уӷанглям анда Библия?
12 О Сатана камэл тэ дэл пар мэндэ, кай тэ змарэл амэн па лэ Дэвлэско дром. Но кай тэ виритярас, амэнди трэбуй май фартэ тэ патяс лэ Иисусости и андэ кода, сар о Иегова через о Иисусо терэл кода, со загиндосардя. Кадяжэ трэбуй тэ патяс лэ годявэрнэ и кандинэ рабости и тэ патяс, кай кати через лэстэ о Иегова диқэл пала пэстири арӷанизацыя (Матфея 24:45—47). Амэ ласа май фартэ тэ патяс андэ када, если на ласа тэ промэкас тэ сытювас па Библия. Тоди амари вера андо Дэл авэла, сар витка, савятэ корнёря ужан фартэ дур андэ ԥув. Кацаво жэ гиндо ԥэндя о апостоло Павло андэ пэско письмо, саво пистросардя ла собранияти анда форо Колоссо. Во пистросардя: «Важ кода кай патяе андо Ӷосподо, андо Иисус Христос, и май дур гиндон и терэн кадя, сар во. Май драго полэн лэс, май фартэ патян андэр лэстэ и нико тумэн мэк на змарэл, кай тумэ тэ патян андэр лэстэ» (Колоссянам 2:6, 7). Если о христианино терэл вся, кай май фартэ тэ патял лэ Дэвлэсти, лэ Сатанастэ и кодэлэндэ, ко залэл лэсти риг, на вижала лэс тэ змарэн (2 Иоанна 8, 9).
13. Сости амэ на трэбуй тэ удивисавас и васо?
13 Амэ на трэбуй тэ удивисавас, кала и мануша, савэ на ӷанэн лэ Дэвлэс, нэнавидят амэн (1 Иоанна 3:13). О Иоанно пистросардя, кай «всаворя люмаса правий о Найлашо» (1 Иоанна 5:19). Со май пашэ о концо ла люмако, савяса правий о Сатана, со май бари лэсти холи (Откровение 12:12). Во най вся и время дэл пар мэндэ чоралэс, кай амэ тэ закамас тэ терас билажавардимос и чоралэс заставий, кай амэ тэ патяс лэ отступниконэнди. Ай инке во можэт ворта тэ вишол пэстири холи пэ Дэвлэстирэ служытеля. О Сатана ӷанэн, кай лэсти ашэляпэ совсем мало время, кай тэ тердярэл и дила, кай росԥэнас важ о Дэл и кай тэ стерэл, кай амэ тэ парашас тэ патяс лэ Дэвлэсти. Важ када амэ на удивисавас, кай дэсавэ страны дэсо на домэкэн тэ терас андэ служэния лэ Дэвлэсти, ай дэкай совсем заԥандавэн амари дила. Но дажэ андэ кадэла страны амарэ ԥрала и ԥэя на парашэн тэ служын лэ Иеговасти. Кода, сар вонэ пэс андярэн, сыкавэл, скати бы о Сатана тэ на стол зор, амэ сможэм лэс тэ победисарас!
ПОМОЖЫН ЕК ЕҚЭСТИ, КАЙ ТЭ НА АШАВЭН ЛЭ ДЭВЛЭС
14. Сар тэ поможысарас лэ ԥралэнди и лэ ԥэянди, кай вонэ тэ на ашавэн лэ Дэвлэс?
14 Кай тэ поможысарас лэ ԥралэнди и лэ ԥэянди тэ ашэнпэ лэ Иеговаса, амэнди трэбуй тэ полас и тэ жалуисарас лэн (1 Иоанна 3:10, 11, 16—18). Тэ любисарас ек еқэс трэбуй най кати, кала вся драго, но и кала терэлпэ бида. Если варико андэ собрания хасардя чаче манушэс, можэте тумэ тэ подритярэн лэс чи варисар тэ поможын лэсти? Ай можэт тумэ уӷанглэ, кай амарэ ԥрала и ԥэя мучинпэ через и бида андэ природа. Можэте тумэ тэ поможын лэнди тэ виваздэн палпалэ и цэра и Залоря Царства? Пэстири любовь и кай полас и жалуисарас лэн, амэ сыкавас най кати лэ алавэнца, но со май важно, амари любовь дицол пэ дила.
15. Со амэнди трэбуй тэ терас, сар пистромэ андэ 1 Иоанна 4:7, 8?
15 Если амэ любисарас амарэ ԥралэн и ԥэян, тоди амэ шаспэ пэ амаро небесно Дад. (Адиносар 1 Иоанна 4:7, 8j.) Ай кай тэ любисарас, трэбуй тэ простисарас ек еқэс. Если амэн варико холярдя, амэнди трэбуй тэ простисарас кадэлэ манушэс и будэр тэ на сэрас пала када. Кадя амэ сыкаваса, кай любисарас лэс (Колоссянам 3:13). Акэ, со сас лэ ԥралэса, савэс ақарэн Альдо. Еқварэс, лэсти на чалелэ и алава, савэ ԥэндя лэсти о ԥрал, пэ саво во столас фартэ бари патив. Кадэва ԥрал дя дума най драго пала мануша, савэ сас андэ кодэя жэ нацыя, анда сави сас о Альдо. И во ԥэнэн: «Мэ вся и время мангаваспэ лэ Иеговасти, кай во тэ поможый манди тэ на гиндосарав вэрыто пала кадэва ԥрал». Но када инке най вся. О Альдо ақардя лэс андэ служэния. Котэ лэстэ сас маменто тэ росԥэнэн лэ ԥралэсти пала кода, со лэсти на чалеля. О Альдо росԥэнэн: «Кала о ԥрал поля, сар манди ԥарэс ашэля лэстирэ алавэндар, во мангля, кай тэ простисарав лэс. Па кода, сар во дя дума, дицолас, кай во на камля кадя тэ ԥэнэн. И кодэва ԥаримос, саво сас по ди, прожыля. И амэ на парашэлям лэса тэ дружысарас».
16, 17. Со амэ трэбуй тэ терас?
16 Кала адиносарас и письморя, савэ пистросардя о апостоло Иоанно через лэ Дэвлэско свынто духо, амэ диқас, сар дэ фартэ во любияс лэ ԥралэн и лэ ԥэян. Ай кадяжэ диқас, сар во камэлас, кай вонэ фартэ тэ патян лэ Дэвлэсти. Амэ радосавас, кай кацавэ лэ Дэвлэстирэ служытеля, сар о Иоанно, лэна тэ правин еқэҭанэ лэ Иисусоса! (1 Иоанна 2:27).
17 Амэнди трэбуй тэ сэрас, пала со амэ дям дума андэ кадэя статья. Кадяжэ трэбуй тэ на парашас тэ жувас па лэ Дэвлэско законо, вся и время и андэ вся тэ кандас лэ Иеговас. Сытён па лэ Дэвлэско алав, па Библия, и патян кодэлэсти, со котэ запистромэ. Май фартэ патян андо Иисусо. На домэкэн, кай тумэ тэ лэн тэ гиндон кадя жэ, сар о миро, саво на ӷанэн лэ чачунэ Дэвлэс и на патян кодэлэсти, сости сытярэн и отступникоря. Сэрэн, на вижала тэ служын лэ Иеговасти и андэ кадэя жэ время тэ терэн кода, со на чалёл лэ Дэвлэсти. Важ када на подэнпэ, кала пэр тумэндэ тасавэн и мануша, кай тумэ тэ стерэн бэзэх. Кандэн лэ Иеговас и на терэн кода, со билажавардо. Простин кодэлэн, ко тумэн холярдя и подритярэн кодэлэн, касти када трэбуй. Кадя тумэ поможына, кай лэндэ тэ на авэл ԥарэс по ди, кай вонэ тэ на умэкэн и вас, и кай вонэ тэ на парашэн тэ служын лэ Иеговасти. Тоди саво бы ԥаримос тэ на авэл, амэ на парашаса тэ жувас па лэ Дэвлэско законо.
ДИЛИ 135 Иегова анда вся оди ԥэнэн: «Ав мудро, мэрно шаво»
a Адес ла люмаса правий о Сатана. Во дад лэ хохаимаско. Важ кода и тэ жувас па лэ Дэвлэско законо амэнди фартэ найвушэро. Кай и христианоря, савэ жувэнас андэ пэрво вико, сас кацаво жэ ԥаримос. Кай тэ поможый лэнди, о Иегова ԥэндя лэ апостолости лэ Иоанности, кай тэ пистрой трин письморя, савэ и амэнди фартэ поможын и подритярэн. Кадэла письморя поможын тэ полас, со амэн можэт тэ змарэл па лэ Дэвлэско дром. Ай кадяжэ через лэндэ амэ уӷанаса, со поможыя тэ на парашас тэ ритярас лэско законо.
b 3 Иоанна 3, 4: «Мэ сымас фартэ лошало, кала авелэ и ԥрала и ԥэндэ, кай ту на отжас кодэлэстар, сости сытярэл о Дэл. Мэ лошало, кай ту на парашэс тэ жувэс кадя, сар во сытярэл. Важ мандэ нинай май бари лош, сар тэ ашунав, кай всаворэ мэрнэ бэяцэ жувэн па лэ Дэвлэско законо».
c Диқэн и рамка «Васо о Иоанно пистросардя письморя, савэ исин андэ Библия?».
d 1 Иоанна 2:3—6: «И акэ сар амэ можэм тэ полас, кай ӷанас лэс. Амэ ӷанас лэс, если терас кадя, сар во приԥэндя. Ко ԥэнэн: „Мэ ӷанав лэс“, ай на терэл кадя, сар во приԥэндя, кодэва хохавно, и кодэлэстэ нинай чачимос. Ай ко терэл кадя, сар во, тоди дицола, кай кадэва мануш па чачимастэ любий лэ Дэвлэс. Кадя амэ можэм тэ уӷанас, кай амэ гиндосарас и терас, сар во. Ко ԥэнэн, кай во гиндой и терэл кадя жэ, сар во, кодэва трэбуй и тэ терэл кадя, сар терэлас о Иисусо».
e 2 Иоанна 4: «Мэ фартэ лошавав, важ кода кай уӷанглэм, кай дэко анда тирэ бэяцэ жувэн па лэ Дэвлэско законо, сар и приԥэндя амэнди о Дад».
f 2 Иоанна 6: «Кала любис, тоди ритярэс лэско законо. Кадэва законо, тумэ и ашунглэ спэрва и трэбуй вся и время тэ дицол, кай тумэ любин».
g Андэ кадэя статья дэсавэн манушэн на ақарэн кадя, сар катэ пистромэ.
h 1 Иоанна 1:9: «Сар амэ прижандювас андэ амарэ ӷрехоря, во простия амэнди и ӷрехоря и вивужарэла амэн всаворэ найлашимастар, важ кода кай во никала на ашавэла и во справедливо».
i Диқэн и статья, кай тэ сытювас «Драго тумэ ӷанэн, кай када чачимос, чи най?» андэ «Сторожэво башня» пала августо 2018 бэрш.
j 1 Иоанна 4:7, 8: «Тумэ, ко важ мандэ куч! Давайте тэ любисарас ек еқэс, важ кода кай любовь жал лэ Дэвлэстар, и кажно, ко любисарэл, ашэля лэ Дэвлэско бэято и уӷанэн лэ Дэвлэс. Ко на любий, кодэва на уӷангля лэ Дэвлэс, важ кода кай о Дэл исин любовь».
l ПЭ КАРТИНКИ. Андэ школа ла ԥьяти фартэ часто попэрдёл пэ яқа и вой часто ашунэл, кай кала лэ муршэсти чалёл о мурш, ай ла жувляти и жувли, када правильно. Андэ бут страны и радуӷа сыкавэл пэ кадэва билажавардимос. Потом вой екжэни сытёл па Библия, кай май фартэ тэ патял лэ Иеговасти и кай тэ полэл, кай кода, андэр со вой патял, када правильно. Када поможый лати тэ витидэл кода, со чалёл лэ Дэвлэсти.