Ӷотово ту тэ росԥэнэс лэ манушэнди пала Дэл?

1. Со о Иисусо ԥэндясас лэ штарэ рыбаконэнди и со вонэ стердэ посли кода, со во ԥэндя?

О ПЁТРО, о Андреё, о Иоанно и о Иаково затерэнас пэ жызня кодэлэса, кай астарэнас мащё. Кати погиндон, сар вонэ удивисайлэ, кала о Иисусо ԥэндясас лэнди: «Жан пала мандэ, и мэ стерава, кай тумэ лэна тэ родэн лэ манушэн кадя, сар астарэн о мащё»b. Со вонэ стердэ посли кода, со во ԥэндя? Андэ Библия ԥэнэнпэ, кай вонэ сразу ашадэ и сетки и жылэ пала лэстэ (Матфея 4:18—22). Кода, со вонэ витидэ, парудя вся лэндири жызня. Вместо мащё вонэ линэ «тэ родэн лэ манушэн» (Луки 5:10). Адес о Иисусо ԥэнэн кацавэ жэ алава лэ манушэнди, савэ любин о чачимос пала Дэл и савэндэ лашо ди (Матфея 28:19, 20). Ай тумэ линэ тэ терэн кадэя дила?

2. а) Васо трэбуй тэ погиндон, камэн тумэ тэ ашэн вазвещятеля? б) Со поможыя тумэнди андэ када?

² Можэт тумэ дэсави время сытён па Библия и ужэ варисо парудэ андэ пэстири жызня. Акана тумэнди трэбуй тэ полэн, камэн тумэ тэ ашэн вазвещятеля. Если тумэ инке на ӷанэн, со тэ терэн, нэ пэрэжывайте. Када сыкавэл, кай тумэ полэн, пэ скати дэ важно кадэва шаго. Канешно, андэ Библия ԥэнэнпэ, кай о Пётро, о Андреё, о Иаково и о Иоанно «сразу ашадэ и сетки» и жылэ пала Иисусо. Но када на сыкавэл, кай вонэ на гиндонас, со тэ витидэн. Вонэ ӷанэнас лэ Иисусос ужэ май бут чем епаш бэрш и полинэ, кай во Христос (Иоанна 1:35—42). Ту можэт ужэ бут со уӷанглян пала Иегова и пала Иисусо и камэс, кай тири дружба лэ Иеговаса тэ авэл май лащи. Тоди тути трэбуй драго тэ погиндос, ӷотово ту тэ ашэс вазвещятелё чи най. Со поможысардя кодэлэ штарэ рыбаконэнди, кай вонэ тэ полэн, со тэ витидэн?

3. Со поможыя амэнди драго тэ росԥэнас важ о Дэл и тэ сытярас лэ манушэн па Библия?

³ И пэрви лэ Иисусостирэ ученикоря любинас и ӷанэнас пэсти дила. Вонэ сас смили и полэнас, кай важно тэ стон зор, кай тэ терэн и дила, хоть дэкала и на камэласпэ. Вонэ драго ӷанэнас тэ астарэн мащё и када поможысардя лэнди кадяжэ драго «тэ родэн лэ манушэн», када тэ росԥэнэн пала Дэл. Андэ кадэя статья амэ подаса дума со поможыя, кай амэ драго тэ росԥэнас пала Дэл и драго тэ сытярас лэ манушэн па Библия.

СЭРЭН, ВАСО ТРЭБУЙ ТЭ РОСԤЭНЭН ВАЖ О ДЭЛ

4. Васо о Пётро залэласпэ лэ мащеса?

⁴ О Пётро залэласпэ лэ мащеса, най кати ек важ кода, кай тэ проправарэл лэ ерес. Во любияс кадэя дила (Иоанна 21:3, 9—15). Во кадяжэ полюбисардя и дила, сави лэсти дя о Иисусо «тэ родэл лэ манушэн», када тэ росԥэнэн пала Дэл. О Иегова подритярэлас лэ Петрос, и важ кода лэстэ фартэ драго вижалас тэ терэл кадэя дила (Деяния 2:14, 41).

5. а) Состар даралас о Пётро, сар пистромэ андэ Луки 5:8—11? б) Со поможыя, если тумэндэ авэла кацаво жэ по ди?

⁵ Амэ росԥэнас пала Иегова, важ кода кай любисарас лэс, и када само ӷлавно. Кадэя любовь поможыя амэнди тэ улас и гиндоря, кай амэндэ на хутилэла зор тэ стерас лэ Дэвлэсти дила. Кала о Иисусо ԥэндясас лэ Петрости «тэ родэл лэ манушэн» кадя, сар во астарэлас о мащё, во кадя жэ ԥэндясас лэсти: «На дар». (Адиносар Луки 5:8—11c.) О Пётро пэрэдарайля най кодэлэстар, со авэла, кала во ашэла лэ Иисусостирэ ученикоса. Во пэрэдарайля, кай о Иисусо поможысардя лэсти и лэстирэ амалэнди тэ астарэн кадя дэ бут мащё. Во полэлас, кай када сас чуда, и гиндояс, кай во на ашэл кода, кай тэ терэл дила еқэҭанэ лэ Иисусоса. Тумэндэ можэт тэ авэл дар. Можэт тумэ даран кодэлэстар, со тумэн аштярэл, кала тумэ лэна тэ служын лэ Иеговасти. Тоди терэн вся, кай инке май фартэ тэ любин лэ Иеговас, лэ Иисусос и лэ манушэн. Када поможыя тумэнди тэ терэн кадя, сар ԥэндясас о Иисусо, «тэ родэн лэ манушэн» (Матфея 22:37, 39; Иоанна 14:15).

6. Васо инке амэ камас тэ росԥэнас важ о Дэл?

⁶ Ай васо инке амэ камас тэ росԥэнас важ о Дэл? Амэ камас тэ терас кадя, сар ԥэндясас о Иисусо: «Жан... сытярэн лэ манушэн, кай вонэ тэ авэн ученикоря» (Матфея 28:19, 20). Инке амэ росԥэнас о чачимос анда Библия, важ кода кай и мануша «вицыенэ и росшутэ, сар и бакрорэ би лэ пастухоско» и лэнди фартэ трэбуй тэ уӷанэн о чачимос важ лэ Дэвлэско Царство (Матфея 9:36). О Иегова «камэл, кай и разни мануша тэ спасынпэ и драго тэ полэн о чачимос» (1 Тимофею 2:4).

7. Сар и алава анда Римлянам 10:13—15, сыкавэн, васо важно тэ росԥэнас важ о Дэл?

⁷ О рыбако астарэл мащё, кай тэ битинэл лэс чи варисо тэ гитой андар лэстэ. Если амэ полас, кай амари служэния спасый лэ манушэнди жызня, тоди амэ закамаса тэ служысарас. И амэ родас лэ манушэн, кай тэ спасысарас лэн. (Адиносар Римлянам 10:13—15d; 1 Тимофею 4:16).

МАЙ БУТ УӶАНЭН ПАЛА КОДА, САР ТЭ РОСԤЭНЭН ПАЛА ДЭЛ

8, 9. Со трэбуй тэ ӷанэн о рыбако и васо?

⁸ Андэ лэ Иисусостири время о рыбако, трэбуй сас тэ полэл, со исин андо паи, кай во можэт лэс тэ астарэл (Левит 11:9—12). Кадяжэ во трэбуй сас тэ ӷанэн, андо саво ҭан тэ зашол и сетки. Обычно о мащё плавуий котэ, кай лэсти чалёл и кай исин важ лэстэ хамос. Но инке важно андэ сави время о мануш тэ астарэл о мащё. Ек ԥрал, саво жувэлас по острово андо Тихо океано, ақардя лэ мисианерос тэ астарэл мащё. О мисианеро ԥэндя, кай тэ диқэнпэ тэсара часиков в девять. О ԥрал пэ када ԥэндя лэсти, кай кадя на вижала. Катэ трэбуй тэ витидэл, чи май долӷо тэ посовэл, чи мащё тэ астарэл.

⁹ О рыбако витидэл время и ҭан, кай тэ астарэл май бут мащё. Кадяжэ андэ пэрво вико кодэла, ко «родэнас лэ манушэн», витидэнас кацавэ ҭана и время, кай лэндэ тэ вижал тэ подэн дума май бутэ манушэнца. Лэ Иисусостирэ ученикоря росԥэнэнас пала Дэл па цэра, па базаро, андо храмо и андэ синагоги (Деяния 5:42; 17:17; 18:4). Амэнди тожэ важно тэ ӷанас, кала и мануша цэрэ, ай кала вонэ андэ авэр ҭана. Если амэ камас, кай важ о Дэл тэ уӷанэн со май бут мануша, амэнди трэбуй тэ авас ӷотови тэ парувас и время и о ҭан важ и служэния (1 Коринфянам 9:19—23).

10. Савэ инструменторя амэнди дя лэ Иеговасти арӷанизацыя?

¹⁰ Кай и рыбакоря исин соса тэ астарэн мащё. Амэнди кадяжэ трэбуй инструменторя важ и служэния и важно тэ ӷанас, со лэнца тэ терас. О Иисусо росԥэндя пэстирэ учениконэнди, со тэ лэн пэса, со тэ ԥэнэн и кай тэ дэн дума пала Дэл (Матфея 10:5—7; Луки 10:1—11). Адес лэ Иеговасти арӷанизацыя дэл амэнди инструменторя, савэ точно поможынe. И амэн сытярэн, со лэнца тэ терас. Важ када амэ полас, кай амэндэ вижала драго тэ сытярас лэ манушэн па Библия (2 Тимофею 2:15).

АВЭН СМИЛИ

11. Васо кодэла, ко росԥэнэн пала Дэл, трэбуй тэ авэн смили?

¹¹ О рыбако трэбуй тэ авэл смило, важ кода кай и поӷода пэ моря на ӷатярэса. Можэт тэ авэл спокойно, ай потом можэт резко вся тэ парудёл и тэ ваздэлпэ бари балвал. Инке лэ рыбакости прижалпэ тэ астарэл рятянца. Кадяжэ трэбуй тэ авэн смили и кодэла, ко росԥэнэн пала Дэл. Кала амэ лас тэ росԥэнас важ о Дэл и ԥэнас, кай амэ лэ Иеговастирэ свидетеля, тоди пар мэндэ моӷут тэ тасавэн амаро родо, и мануша моӷут амэндар тэ подасанпэ и тэ на ашунэн, со амэ росԥэнас. Када вся можэт тэ авэл важ амэндэ, сар буря. Но амэ на удивисавас. О Иисусо ԥэндясас, кай лэстирэ ученикоря лэна тэ росԥэнэн и кодэлэнди, ко лэн вэрыцый (Матфея 10:16).

12. Со, сар запистромэ андэ книӷа Иисус Навин 1:7—9, поможый амэнди тэ авас смили?

¹² Сар тэ авас смили? Пэрво, патян, кай о Иисусо на парашэл тэ диқэл па нэбо пала амари служэния (Иоанна 16:33; Откровение 14:14—16). Дуйто, инке май фартэ патян, кай о Иегова позаботияпэ пала тумэндэ (Матфея 6:32—34). Со май фартэ тумэ патян, со май бари авэла тумэндэ смилость. О Пётро, о Андреё, о Иаково и о Иоанно сыкадэ, кай фартэ патян лэ Иеговасти. Када дицэля, кала вонэ ашадэ пэсти бути и ашэлэ лэ Иисусостирэ ученикоря. Тумэ кадяжэ сыкадэ, кай фартэ патян лэ Иеговасти, кала ԥэндэ, кай тумэ линэ тэ сытён па Библия лэ Иеговастирэ свидетелёнэнца и тэ ԥирэн пэ собрании. Кай тэ жувэн па лэ Дэвлэско законо, тумэнди бут со прижыляпэ тэ парувэн андэ пэстири жызня. Важ када тумэнди трэбуй сас тэ патян лэ Дэвлэсти и тэ авэн смили. Если тумэ авэна инке май смили, тоди тумэ додиқэна, кай кадэла алава, савэ запистромэ андэ Библия, чачунэ: «Тиро Дэл Иегова туса, каринг бы ту тэ на жылоп». (Адиносар Иисус Навин 1:7—9f.)

13. а) Сар и молитва поможыя амэнди тэ авас смили? б) Со поможыя тэ авас инке май смили и васо?

¹³ Со инке можно тэ терэн, кай тэ авэн смили? Трэбуй тэ мангэнпэ пала када (Деяния 4:29, 31). О Иегова ашунэл тумэн, и никала на ашавэла. Во вся и время авэла пашэ, кай тэ подритярэл тумэн. Кадяжэ можно тэ погиндон, сар андэ дэлмутни время о Иегова спасыяс пэстирэ служытелёнэн. Кадя жэ сгиндон, сар во поможыяс тумэнди, кала сас ԥарэс, и кала во дэлас зор тэ парувэн пэсти жызня. Патян, о Дэл, саво пэрэандярдя пэстирэ народос через и Лоли моря, поможыя и тумэнди тэ ашэн лэ Иисусостирэ ученикоря (Исход 14:13). Патян сар о псалмопевцо, саво пистросардя: «О Иегова важ мандэ, на лава тэ дарав. Со стерэла манди о мануш?» (Псалом 118:6).

14. Сости тумэ сытён кай кадэла дуй ԥэя?

¹⁴ Тэ авэн май смили, кадяжэ поможый кода, со сас лэ Иеговастирэ служытелёнэнца. Ек ԥэй, сас фартэ лажавни и гиндояс, кай латэ никала на вижала тэ росԥэнэн пала Дэл. Сар вой кати лэлас тэ гиндой пала када, вой ужэ лэлас тэ дарал. Вой столас бут зор, кай инке май фартэ тэ любий лэ Дэвлэс и лэ манушэн. И ԥэй гиндояс, сар дэ набут время ашэлпэ кадэла люмати и мангэласпэ, кай лати май фартэ тэ камэлпэ тэ росԥэнэн пала Дэл. Латэ вижыля тэ улэл и дар и вой дажэ ля тэ служый, сар общё пианеро. Ай акэ со сас авря ԥьяса. Кала вой кати ашэля вазвещятелёса и жыля андэ служэния, андэ пэрво жэ цэр ек манушни ля тэ цыпий пэр латэ: «Лэ Иеговастирэ свидетеля? Манди най пала со тумэнца тэ дав дума!» И вой заԥандадя и вудар. И ԥэй на пэрэдарайля и ԥэндя ла ԥьяти, сави сас ласа: «Ту ашундян? Мэ инке о муй на ԥэрнадэм, ай вой ужэ тай полэл, кай мэ лэ Иеговаско свидетелё. Мэ кацави лошали!» Акана кадэя ԥэй служый, сар общё пианеро.

СТОН ЗОР, КАЙ ТЭ ДОТЕРЭН И ДИЛА

15. Со терэл о лашо рыбако и васо када важно важ и христианоря?

¹⁵ Если о рыбако на стол зор, кай тэ терэл и дила, тоди лэсти най со тэ гиндой, кай во астарэла бут мащё. Лашо рыбако рано ущел, ашэлпэ пэ моря, пока на астарэла о мащё скати трэбуй, и во астарэл лэс андэ любо поӷода. Если тумэ камэн тэ виритярэн до конца и тэ дотерэн и дила, сави тумэнди динэ, тумэнди кадяжэ трэбуй тэ стон зор важ када (Матфея 10:22).

16. Со поможыя тэ стерэн и дила, сави трэбуй?

¹⁶ Лэ манушэнди чалёл тэ терэн кода, со май вушэро. Дэкала исин дила, сави фартэ важно, но ла ԥарэс тэ стерэн. Тоди всаек трэбуй тэ стон зор, кай тэ стерэн кода, со трэбуй, хоть и на камэлпэ. И о Иегова поможыя андэ када через пэско свынто духо (Галатам 5:22, 23).

17. Сар кай о Павло вижалас тэ терэл правильно, сар запистромэ андэ 1 Коринфянам 9:25—27?

¹⁷ О апостоло Павло столас зор, кай тэ терэл и дила, сави лэсти трэбуй. Во прижанэлас, кай лэсти, ԥэнэса, прижаласпэ тэ марэл екжэно пэс, кай тэ терэл правильно. (Адиносар 1 Коринфянам 9:25—27g.) Во ԥэнэнас аврэ христианонэнди, кай вонэ кадяжэ тэ стон зор, кай тэ терэн и дила, сави трэбуй и тэ авэл када сэжо и па порядко (1 Коринфянам 14:40). Амэнди кадяжэ трэбуй тэ стас зор, кай тэ на парашас тэ служысарас лэ Иеговасти, тэ росԥэнас пала лэстэ и тэ сытярас аврэн манушэн па Библия (Деяния 2:46).

И ВРЕМЯ НА АШТЯРЭЛ!

18. Пэр со о Иегова шол сама, кала диқэл, сар амэ служысарас?

¹⁸ О рыбако гиндой, кай лэстэ драго вижал тэ терэл и дила, кала во астарэл бут мащё. Ай амэ на гиндосарас, кай амэ служысарас драго тоди, кала поможысардям бутэ манушэнди тэ ашэн лэ Иеговастирэ свидетелёнэнца (Луки 8:11—15). Амэ сыкавас, кай кандас лэ Иеговас и лэстирэ Шавэс, кала на парашас тэ росԥэнас важ лэстэ и тэ сытярас аврэн па Библия. И када само ӷлавно важ о Иегова (Марка 13:10; Деяния 5:28, 29).

19, 20. Васо акана кадя важно тэ росԥэнас важ о Дэл?

¹⁹ Андэ дэсавэ страны тэ астарэс мащё можно кати андэ дэсавэ шона. И лэ рыбаконэнди трэбуй тэ грабинпэ, особенно, если о сезоно вижал. Кодэлэнди, ко росԥэнэн пала Дэл, кадяжэ трэбуй тэ грабинпэ, важ кода кай йто кацави люма будэр на авэла! Ашэлпэ совсем набут время, кай тэ спасынпэ и мануша. На отстон кадэя дила, сави фэрий лэ манушэнди жызня, и на гиндон, кай фэдэр тэ подаштярэн, кала авэла и май лащи время (Экклезиаст 11:4).

²⁰ На бистрэн, васо трэбуй тэ росԥэнэн важ о Дэл. Уӷанэн май драго пала кода, со пистромэ андэ Библия. Стон зор, кай тэ стерэн и дила, сави трэбуй, хоть дэкала и на камэлпэ. Май бут чем восемь милионоря мануша па вся и люма линэ тэ росԥэнэн пала Дэл. Терэн кадя жэ сар и вонэ и тоди тумэндэ авэла радость, сави дэл о Иегова (Неемия 8:10). Терэн вся, кай бут тэ служын жы каринг кодэя время, пока о Иегова на ԥэнэна, кай вся и дила достердэ. Андэ авэр статья амэ подаса дума, со поможыя амэнди, тэ на парашас тэ росԥэнас пала Дэл.